فصليتي القبيحه

اني ! فصليه !

هنا جانت اكبر صدمه بحياتي من اجوي علي اخوي وعمامي ! بعد كل العذاب الي عشته بحياتي والامال الي رسمتهم على مستقبلي والعرس الي ردته يصير خيالي وكلشي انهدم !! تاليتي حروح فصليه اني وملابسي بدون جهاز او فستان عرس مثلي مثل اي عروس عاديه ! ابسط احلامي ماراح يتحقق
- ليش اني ؟ ليش اني زين ؟ ليش متنطون وحده من بناتكم! ليش ماتاخذون ميار ( اختي الجبيره) او زينب ( اختي الصغيره ) ليش اني !!!!
علي :- زينب صغيره عمرها 15 متكدر تعيش وبعدها طالبه تدرس اما ميار مخطوبه وعاقده شلون انطيها لشخص ثاني انت الخيار الوحيد ادري بهذا القرار صعب عليج بس اني اخوج اوعدج اخلصج من هذا الجحيم بأسرع وقت بس سايسيهم شويه
- شنو اسايسهم علي ؟ هذا مستقبلي اذا انكسرت منو راح ياخذني بعدها ؟ راح اكون مطلكه !! مطلكه وماعدي شهاده ومحلوه منو ياخذني بس فهمني !!
" عافني وراح واجتي امي تواسيني وتكلي صبري وضليت ابجي بحضنها لحد مانمت وثاني يوم الصبح جتي امي تكعدني تكلي امشي للسوگ اشتريلج كم شغله
- منيلج فلوس ؟ حتى مهر مراح نحصل
- معليچ بالفلوس حبيبتي هذا اقل حق الج
- حق؟ نسيت اصلاً شنو معنى هاي الكلمه
- معليج بنيتي خليها يم الله ، الله يفرجها
" رحنه للسوك اشترينه كم شغله واني ماعدي اي نفس ولا حتى انتبهت شنو اشترينه شنو تگلي اگلها اي حلو ناخذه كل بالي وكل همي جان شلون راح يكون مستقبلي وشلون راح اعيش ويه واحد ماعرف شلون حينتقم مني لان اني من دم چتال اخوه ووراها رجعنه وخابرني اخويه كالي انو باجر حيجون ياخذوني اهل الولد بس يسوون كعده كدام العالم اني بدون ما احس نزلت دموعي واني جنت كاعده يم امي بالكية كبل حضنتني وكامت تون عـ كيفها ويايه وحسيت كلبي انعصر مو لان اني حروح فصليه بس من سمعت صوت امي هيج تون .. مادري شلون حعيش بعيد عنها حياتي كلش راح تختلف بشكل اني مامتعوده عليه "