فصليتي القبيحه

الوداع ..

- چنت حاير وبصراع بين كلبي وعقلي شلون بريِمي الي اني احبها وشلون اعوفها بعد كل هذي المده وشلون اكللها لازم اتزوج غيرج بنيه ما اعرف شي عنها وشلون اخلف بوعودي الها وخطيه البنيه الي اني راح اتزوجها راح تنهان وتتأذى وهي مالها ذنب كله بسبب اخوها الحقير لو اكتله واخلص منه احسن على الاقل ماورط بنيه مالها ذنب بية واني گلبي مستحيل يصير لغير ريم ومستحيل اطخ بنيه غيرها بس عقلي يكلي هذا دم اخوك اذا اريد اكسر عين اخوها اكسره بأخته واني شفته اليوم شكد ضاج من جابو طاري خواته اكيد راح يتأذى من يشوف اخته هيج وهو هذا المطلوب وريمي اكدر اخذها زوجه ثانيه بعد ما أطلك ذيج بس منو يكول اهلها يقبلون بيه هو هسه واني اعزب واذا اتقدم راح انرفض انوب مطلگ
دگ التلفون مكتوب ( روحي ♥️ )
- ليث انتَ وين
- ها يروحي اني بالطريق للبيت
- تجي عليه نتغده ؟
" خطيه متدري بشي شلون راح اصارحها شلون راح اكدر اباوع بوجهه اصلاً وهي دتحجي بهذا الحب واللهفه كلها "
- ليث ليش صفنت
- ريم خلصتي دوامج؟ اريد اجيج احاجيج
- ماشي حبيبي بس شعجب صحتني باسمي مو من طبعك
- احب اسمچ
- صاحب الاسم هم يحبك
- نص ساعه واني يمج
- انتظرك عمري
" ياربي بس انطيني القوه حتى اصارح هاي المخلوقه واكدر اعبر هاي الفتره احس انهلكت واني اعرف انت متنطي الا اقوى اختباراتك لاقوى عبادك بس يارب ما اكدر اكثر من هيج "
وصلت ... ضليت ادور عليها بعيوني وشفتها .... عيونها تضحك وجهه يضحك شكد فرحانه لان شافتني ماريد اكسر هاي الفرحه ماريد هلابتسامه تتلاشى من وجهه بسببي شكد راح اكره نفسي
- حبيبييييييي
- ريمي شكد مشتاقلج
- مو بكدي ، باوع هلمره اني اختار المطعم لان دائما انت تختار ويطلع غالي ومتخليني ادفع شي
- اريد ادللج شعدي كم ريم اني
- معليه اني اريد اختار المطعم هلمره
- اختاري حبيبي
رحنه للمطعم الي اختارته هي والحمدلله طلع هادئ مابيه احد حتى احجي براحتي بس حرت شلون ابدي بالموضوع هي جانت دتباوع بالمنيو ومتحمسه اني حچيت بنبره جديه هي ممتعوده عليها
- ريم اريد احاجيج بشغله
- شبيك حبيبي مبين ضايج وملامحك تعبانه وتختلف كلش عن البارحه شكو وانت حتى البارحه مادزيتلي ولا مسج
- اريد اكلج شي واتمنى تتفهمين ضروفي وتأكدي اني كلش احبج وهاذا الكدامج مرح يخذلج ابد
- واني واثقه بيك احجيلي
- اني اخويه توفى وره ماوصلتج بالضبط وصلني الخبر ورحنه دفناه " ملامحها كبل تغيرت وقلقني هاي الشي "
- عود صدك تحجي؟
- اي
بدت تدمع - سوده عليه حبيبي بعده صغير الله يرحمه شلون توفى ؟
- لتبجين يروحي اني كوه لازم روحي ماريد ابجي
- احجيلي شلون توفى
- انكتل بعركة ورحنه اني وعمامي نفصلهم البارحه
- الفلوس عمرها مراح ترجع العزيز
- مااخذنا من عندهم فلوس " هنا ملامحها تغيرت من الحزن للقلق "
- لعد شنو اخذتو؟
- فصلية ... بنيه
- المن؟ " بخوف "
- الي
" سكتت وهي بس تباوعلي وعيونها تنزل دموع عشره عشره مثل شلال وضلينه فتره صافنين على بعض جانت عيونها دتعاتبني الا ان تأذيت من العتاب وحجيت "
- مو بيدي واني تفاجئت من كالو فصلية اني عبالي تنحل بفلوس وماردت اخذ بنيه واضلمها ويايه وانتي تعرفين تفكيري بس هذا دم اخويه والاخ عزيز مو بيدي اوكف ضد اهلي علمود قرار ممكن يكون صح .. اوعدج مراح اطخها ولا راح تكدر فد يوم تاخذ مكانج وحيبقه اسمج ببالي وملامحج وكلشي ومن تبرد السالفه ابقي منتظرتني اطلكها واخذج وهاي حجايه مني اخذيها
" هي كل هذا ساكته وماحجت شي وبس تبجي "
- احجي شي ريم دتأذيني بهذا السكوت
- شحجي بعد شنو بقه ينحجي ؟ البنيه مالها ذنب بتصرفات اخوها ليش حتى تاخذها وتطلكها وتبقون عايشين مثل الاخوان مستحيل راح تكدر ... ليث ماكدر اعتبر هاذا الوداع ماعدي شي اكوله الك بعد الله يوفقك ولتضلم هاي البنيه هي هم اكيد مكسوره عاملها عدل واني اعرف بيك شكد حنين لتقصر وياها اتمنالك كل خير انتبه لنفسك احبك كلش هوايه بس هاي نهاية القصه اذا تشوفني بدرب غير دربك ولتضعف وتجيني ابد لان خطيه كلبها ينكسر اذا تشوف زوجها مهتم بغير بنيه ... جانت فرصه سعيده انو اعرفك احلا ايام بحياتي عشتها وياك الله يعوضك ويعوضني باي
وركضت برا المطعم بسرعه بحيث مالحكت احجي شي وحقها ماكدر الومها .. متتصورون شكد بجيت بالطريق بيومها عبالك قطعه من كلبي انشلعت منين اتلكاها المن اروح بعد ريم واخويه جانو سندي وكلشي الي بهلدنيا وخسرتهم الخنكه الي حسيت بيها بذاك اليوم عبالك حجارة على زردومي  تمنعني اتنفس ... الله كريم ماكول غير الله كريم .. حشتاقلج حبيبتي ... الله يصبرني