"بالنـسبـة لــيـه أحسن حاجة ممكن يديرها الشخص هو أنه ميفكرش بزااف ميسولش بزاف و ميتسناش بزاف..
ميفكرش فأي حاجة تافهة مكتستحقش يضيع فيها ثواني من حياته، وميسولش على حاجات ماغضيف ليه والو لحياته، وميتسناش أجوبة على تساؤلاته كشخص ملهوف مكينعسش إذا ضرو راسو، حيت الجواب إلى معرفتيهش فهاذيك اللحظة غادي تعرفو من بعد او مع الوقت، سرعة البحث أحيانا كترجع على صاحبها بمخاطر كبيرة، هادشي علاش زوين أنك متعرفش كلشي وميكونش كلشي بين يديك فاللحظة للي تمنيتيه، وهذا لا يدل على أن المعرفة غباء، بل هي حفاض على بزاف ديال الناس فحياتنا لأنه مع الوقت غادي تفهم انه ضروري في الحياة دير راسك ماعارف والو او ما فاهم والو ،..... وهذا باش تكمل السفينة طريق ديالها في بحور الحياة.
هو كيآمن بشدة بمقولة متعطيش كلشي ومتستناش كلشي، حيت كل نهار هو بداية جديدة ليك او بالأحرى فرصة جديدة لحياتك لأنه الماضي ديالك ماشي هو نتا دائما، من غدا تقدر تبدا تاريخ وصفحة جديدة كليا!! هادشي غادي يخليك تشكر المعيقات اللي وقفات فطريقك حيت هي السلم ديالك لحياة جديدة و أفضل، وهاذيك البداية الجديدة أو الفرصة هي اللي غتخلي العقل ديالك يتحرر من أي علاقة سامة فحياتك ، ومن أي ألـم فضيع، ومن أي غدر جارح، من غدا غاتبدى الحلقة ديالك الأولى نحو الحلم ومنطقة راحتك للي غاتعتاني فيها بنفسك وذاتك، وحتى قوة ماتقدرش تحبسك على هاذيك البداية البيضاء لأنه مكاينش حدود لجميع إمكانياتك.
"بالنــسـبـة لـيـهـا .... الرؤية ديال أي واحد تقدر تغير فأي لحظة، وتولي بزاف ديال الاشياء واضحة قدام عينيه.
مثلا فالوقت للي كنتو كتقولوا فيه أنكم في حالة حب عظيمة ماتقدروش تستغنيوا عليها، غادي تلقاوها فالواقع حالة دمار شامل عطيتو فيه أكثر ما كتعطيو لأنفسكم ولذاتكم اللي فالأصل ضيعتوها... "حالة حب" اللي كنتو كتآمنو بيها غتولي تبان ليكم بطريقة واضحة و واقعية من بعد ماا تنازلتو على حوايج مخاصكمش تنازلو عليها. وغاتعرفوا أن كل حاجة فكرتو فيها بطريقة زوينة وصلاتكم لطريق كلها خسائر فخسائر، وفالأخير غادي تخرجو بدرس كبير أوله نفسكم..
نفسكم الزوينة لي عطات فالوقت الصحيح للشخص الخطأ.. وهادشي قدما كان مؤلم غايكون نافع في نفس الوقت حيث غايخليك غتكون فالمنطقة اللي خاصك تكون فيها غتفكر بوعي أكثر وبمنطق ودائما غاتكون حذر من كلشي وغاتعرف فين كاتحط رجليك وغاتبدا تراعي لنيتك النقية وغادي تخرج رابح فالأخير. وغاتدرك أن النهايات أحيانا هي أكبر تعريف على راسنا على أننا كنستاهلو كثر من داكشي للي حنا فيه وأن كل طريق غير مستقيمة غادي يجي وقت اللي غادي تكون خط مستقيم وكلشي كايبدا منك ومن نقطة تغييرك للأفضل ومن تغيير الرؤية ديالك للأمور أو الحياة بصفة عامة."..
#يــتـبـع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
