عهد الأصدقاء

البارت الثالث

استاذ رحيم (المدير ) : شبيج بابا ليش تبجين منو كتل اخوانج
_ استاذ بالساحه صارت عركه وكتلوهم والله أستاذ اخوتي ماعليهم همه ذولاك عالو. كام المدير أخذ عوده مخليها ع المكتب يمه شالها بأيده وطلع من الإداره جان يشوف الطلاب صايره هوسه اللي يعارك واللي يحاجز واللي يتفرج والترابه والصايح صايره امالخ من الروس جان يعيط بيهم أستاذ رحيم بصوت عالي ولكمم شنو هاي فزت الطلاب وكلها شردت المتفرجين هجو بقى بس أصحاب العركة كلهم وراي للإدارة والي مايجي باجر لا يطب المدرسة جاي أدرسون لو تتعاركون جنكم ثيران..أخذهم للإدارة وكل واحد بيهم أكله عودتين وطلع
حيدر: بالله هسا أني شعليه وانكتل
أسامه: غير كلها من وراء هذا الصخل كبر الهل رأس
أمير: انجبو همه عالو بيه قابل اسكتلهم
حيدر: لاماتسكت شلون تسكت بس تهيج العركة وضم رأسك ومحد غير حيدر يطيح بيه
أسامه: كافي يلا امشو كتله واكلنها لا تتعاركون
أمير: أصلا ما توجع
حيدر : لا ماتوجع ابد ماتوجع شوف بعد ماتمشي ويانا تاخذ اختك وتولي وحدك
امير غلس بعد مارد هوا هذا طبعه من هوا مذنب يغلس مايحجي .
زينه مشينة للبيت لكينه عمتي تطبخ غدا وجدي استوه جاي من أهلنا مناك وجاب وياه روبه ولبن وحده من عماتي الزغار هم جايه وياه سلمت عليهم ورحنا نبدل حتى نتغدى
حجي منذر (أبو عماد): بوية أديان حضري روحج ترحين ويا اخوج العصر للعزبة اختج هاي مريضه ومناك نسوان اخوتج مايلحكن حلال ويطلعن للفلاحة أنت عاد تضليلهن بالبيت تساعدينهن وحوراء أضل يم أمها هنا ماعدهن شيء هم ترتاح ودير بالها ع اولإد أخوها
أديان: ميخالوف بوية ما عندي شيء منو يجيء يأخذني
أبو عماد: خالد بالسوك هسه يجي يلا أنه رايح للكاع ألفوك أطرك الزرع (أشوفه) من زمان مارايح
أم عماد: ولج موش اليوم خميس ماتاخذين ذوله المساكين لمهم وياج هسا طاك كلبها عليهم
أديان: لأعدهم امتحانات آخر السنه وأبوهم راح ينزل ويأخذهم وياه بعد عشرة أيام تخلص المدارس
أم عماد: خوش جاء أنه رايحه البيت عمج مرت عمج مريضة وفشله مامريتها
أديان: هي غير تستأهل واحد يروح الها لو كلشي مايغزر بعينها
أم عماد : فشله أضل تعتب ما تعرفينه أنت كاولي وبيده ربابة
أديان: بهاي صدكتي أضل تنعى وتبجي غريبة ومحد يريدني
راحت امي البيت عمي واني لملمة البيت وعزلته خطيه حوراء مريضه شويه هم ترتاح اليوم وهم اكضي وكت لما يجي خالد بين ما رحت انطيت الربايط (طليان مخلينهن حتى يسمنن ويبيعوهن) مي، وعلف كملت شغلي بعدني الم بهدومي طبك خالد سيارته بالحوش (الطرمه)
خالد : هاشلونكم
اديان وحوراء :هلا خويه تفضل
خالد :لايابه يلا نروح ماضلنا وكت جاوين امي
أديان: راحت على بيت عمي
خالد: هذا مسواك الكم نزليه تروحين انتي مو
اديان: أي جاشلون يلا بس انزل المسواك واجيب غراضي واجي.
أديان: يلا خويه اني جاهزه ماعندي شي
_ هاكملتي خوش يالله يلا اودعناكم
حوراء: الله وياكم خويه درب السلامه انشاءالله.
أديان: وصلنا لهناك المغرب تعشينا وذيج التعلوله الحلوه (الكعده ) وذاك الهوا الطيب وملتمين خواتي وخواني ونسوان اخوي خلص الوكت بين سالفه وضحكه وكلمن راح لفراشه جنا انام برا لاكهرباء ولا سبالات ومبردات ع الطبيعه .
صار الصبح وبدينا يوم جديد وكلمن راح الشغله اللي يسرح بالحلال واللي يروح للحصاد ومنا اللي يبقى بالبيت يحضرلهم خبزه ياكلونها بعد مايجون من الشغل
ومرات هم اسرح وياهم نسوي نوبه اعاونهم
اني اسرح بالهوايش(البقرات ) بيهن بالعشرين هايشه نطبك حلالنا سوا احنا وبنات عمي ونروح نسرح من نريد نروح (نرجع الاهلنا ) نورد الهوش من النهر يلا حتى مايضل عطشان ليش ما بيوم احنا سارحين وروحنا الاهلنا المغرب
طبيت الأهلي حليت حزامي غسلت وبدلت بين مايصير العشى
ماحس غير صوت عزيزه يلعلع : ولج اديان بعد وحده من الهوايش
رد عليها خالد: خاف ناسينها مامطببينها لو طالعه ويا النهر دوم تضل هناك تاكل لو ويا حلال عمي
عزيزه : مادري اجيت احلب وفكدتهن بعد وحده ماكو
ياسين : شو روحن اتاكدن يمعودات ماطول بعد وكت لا ضلت تنوكل
اديان :يمه من كالو هيج بكت طن هوا يربي شلون بيه شيخلصني من ابوي غير يفضحنا امشي وادعي بيني وبين روحي دخيلك ياعلي بلكت تطلع يم بيت عمي
أديان: ولج دموع الحكي بعد وحده من الهوايش واجيت اشوفها يمكم
دموع : عليج الله صدك بس لا ضلت بمكان ولج النوب إحنا نسينا ماتفكدنا ورانا
أديان: اخ ربي خايبه امشي شوفي بلكت يمكم غير ابوي يصلخني صلخ النوب هاي مال الغزره العزيزه ربي جاااا ماكو غير الهايشة مال عزيزه هسا لو ضايعات كلهن ولا عزيزه
دموع : ههه سويتي عزيزه هاشه دتعاي وذا مالكيناها اكل للولد هنا وهم يطلعون يطركون المكان الجنا سارحين بي لاتخافين
أديان : دورنا ويا حلالهم ماكو دموع كالت لخوانها وحده من هوايش بيت عمي ماهي ضايعه كالو هسا نجيب سلاحنا ونجي وراج ندورها واني رديت الأهلي انطيتهم خبر صرنا واحد يردم الثاني مستعجلين لايجلجل علينا اليل (يجي اليل)وتروح الدابه خالد: خل نتوزع وندور كل ثنين سوا اني وحده من البنات وياي وناخذ سلاح وياسين وهم وحده وياه
ومهيمن وحده وياه وكلمن يروح بصوب يدور وانتن الضالات هنا هم عينجن منا واذا احد عرف لكاها وجابها انتم واحد يصعد فوك البيت ويشعل مشعل ويضرب طلقه بالجو حتى يصير عدنا علم لكيتوها واحنا هم هيج نسوي
أديان: بعد خالد يحجي واجو ثنين من ولد عمي ودموع وحسنيه وياهم علمهم بالخطه ومشينا اني صارت روحتي ويا واحد من ولد عمي
توزعنا كل ثنين سوا وكلمن راح بجهه يدور .
غورب الغروب وصار اليل والجو بدا يضلم وبس صوت الواويه تعوي والطرفه والشوك صايره غابات كل وحده شعلوها ونهران منا ومنا اني امشي ويا صالح بس احس نفسي مكطوع من الخوف اريد اجر نفس ماكدر ركبتي انكسرت احس رادار مو ركبه امشي واتلفت خاف على فجأه ويطفر علينا ضبع ذيب كرطه
بهالاثناء واحنا نمشي شفنا شي اسود اندك عليه ضوا التريك (لايت أو شمعه شحن)مايبين لأن صاير جوا الطرفايه وتمنع الضوا
أني وصالح صح كبار بس تخورسنا
صالح كلي اسكتي ولا نفس لاتحجين
_ ولك ليش هو أني عندي لسان يحجي من الخوف اكلك خل نرد اتحمل حجي ابوي ولا اموت هنا وتاكلني الوحوش
صالح: اسكتي ولج لاتكركرين شو اسكتي خل اركز واشوف شنهو هذا
اديان :جا لازمه عيونك خيه ماتركز بس انه اريد ارد بروح امك خلنا نرد
هذا الحجي احنا بينا ومانتقرب للسواده ونمشي على كيف وصالح بارز روحه وماد سلاحه عود مركز مايدري انه وراه واسمع دكات كلبه عبالك دبيج حصان
شويه شويه نتقرب منها وصلنا شوي عنها وركزنا زين طلع برص مال شجره محروك نصها وصايره عبالك واحد متربع شكلها من بعيد كلش يخوف رأسها من فوك اسود محترك ومن جوا سمينه
صالح: خرا بروحج غير فحطتينا عبالي طنطل متربع احس كلبي وكف
أديان: هوا اني صوجي اجيت وياك اموت ناقصة عمر من ورا هالخوفه سوده بوجهي على هالجيه
صالح: حتى بعد من تسرحين تفتحين عيونج وتركزين زين يلا امشي
اديان : اكلك صارت الدنيا نص الليل عليك الله تعال نرجع أني اخاف نختل بمكان لمن يرجعون يلا نرجع وراهم
صالح: افا وأنا غلام ابوي تخافين وانتي وياي
أديان :أي وعود من ياكلك الضبع ذيج الساعه يكولون جان خوش ولد ماكمل العشرين لومن يركبك طنطل
__ انتي ليش ماتنطمين وتسكتين لاضلين تلغين وفكي عيونج زين ودوري حتى نرد كبل لايطلع طنطل ويركب راسج
__ اكلك لاضل اصيح ترا هيه مو ابره وادورها مبينه ذيج وينها شكبرها
بقينا ندور هواي مشينا وماكو عبالك فص ملح وذابت اني امشي وادعي ساعه اكول يارب نلكاها ونخلص وساعه اكول يارب رجعنا سالمين هذا صويلح خبل ومعاند بيه احسه ويريد يتيهني هنا بالوديان ويخلي الواويه تاكلني اي ادري بي
امشي وادردم بكلبي عليه
هوا كدامي واني وراه نمشي شوو فجأه وكف
صالح: اكلج تسمعين شي
اديان:مثل شنو
__ مادري بس أني اسمع حجي
__ شوف صويلح خلني ارد الأهلي لا وحك هوا علي هسا اسودن هنا اكلك ردني ترا طبكن عندي وعلي أني اخاف ولك الدنيا نص الليل ولك راح نوصل عرعر انته تهبد بالجزاير صدك جذب
صالح : ههههههه شبيج اشاقه وياج شفتج ساكته كلت اغيرلج جوو
__هاا وهو هيج اللي غير جوو ديلا هم نعمه عود يشاقه يلا خويه رد نكلهم مالكينها كتله من أبوي ولا اموت هنا وتضيع علومي
__ ديلا هااي الخاطرج وإلا اني مارد الا نلكه هايشت عزيزه
__لوو ماابن عمي واحترمك جان جبتك انته وعزيزه وسلكتكم سلك على هاليله الكشره اللي ماتخلص
صالح : مشكوره بت عمي ماتقصرين يلا تمونين نفس العمر انه وياج يلا خل نرجع من طريق ثاني
اديان: أخذنا طريق ثاني ونمشي لا خلينا نهر مادورنا لا خلينا زرع كلها دورناها واحنا راجعين سمعنا طلقه
صالح: سمعتي صوت طلقه
أديان: أي يمكن لكوها
كملنا طريقنا نمشي وجان نسمع الطلقه الثانيه ومن بعيد هيج بصيص مال ضوا ضعيف
صالح : ولج هذا الضوا بصوبنا خلي نكمل مشي يمكن لكوها
اديان : أي يالله اجانه الفررج

رجعنا أني وصالح لكيناهم جايبين الهايشه لاكينها ضاله بالجواير سارحه (كاع يكثر بيها الحشيش ) ماحجو بس كالو ربك ستر وتلاحكناها جان نوكلت وجيب إلي يخلصنا
اولاد عمي مارضينا يروحون بقو يمنا تعشو
صبولنا عشى وكعدنا جان صالح يصد بوجهي ويضحك كلهم اندارو يستفسرون شكو ليش تضحك سولفلهم صالح شلون شفنا الجذع وعبالنا جني وهاي أديان خبصتني النوب استلموني تصنيف وشلون تضيعين الهايشه ومخلصتها لعب وسوالف..
خلصناها ضحك وسوالف ويا محلا ذيج الأيام
الي بقت بس ذكرياتها....
الأيام تمشي ونفس الروتين بين البيت والحلال وكعداتنا وبين العزبه وبين بيت أهلي
إلى ان دخلنا بسنة 2003السنه المشؤؤمه الي
بدت بيها اوضاع العراق تدهور و بلشت  الاخبار تنشر عن خبر دخول  الاحتلال الامريكي وبدت الحرب والقصف  وااخ يالوعة كلبنا
ابوي كام ع الحلال والعزبه ورجعنا البيتنا إللي بالعرب لأن محد النا هنا.   اخواني الكبار بالجيش وذوله اخوتي مومال مسؤليه زغار عاد ردينا هناك أحسن وهم ااامن مانعرف شراح يصير والأخبار ماتبشر بخير وكلمن يحجي شكل
ادهور وضع العراق وبدت الحرب واغلب إلي بالجيش منهم إلي هربو ومنهم إلي بقو أكو ناس ماتكدر خوفاً من النظام إذا رجع مراح يرحم الهاربين
او بالاحرى الدفاع عن بلدهم بقينا نسمع الأخبار
وكلوبنا تدعي الاولادنا والاهلنا إللي بغداد  خاصه انو بغداد سقطت وصارت مجزره وخربت ذيج الجانت زاهيه وكل الدول تتمنى تصير مثلها
جنا كل يوم ناصبين مناحه وعزا إلي يدعي وإلي يبجي  وأحنا نسمع الأخبار وكلب الأم  مايسكت ولا يهدا وهي تعرف ولدها بنص الموت أمي مثل السمجه المزوهره على إخواني
خالد بعد تقريباً عشرين يوم نزل ويافرحتنا بي
ماصدكنا من اجانه سالم بقى بس عماد اخويه الجبير هذا كلش أتأخر ومانزل والحرب مشتعله وأحنا مانعرف أخباره ماخلينا أحد ماسالناه عليه أبوي يعرف أمر السريه مالتهم رايحله وسأله كايله مادري ناس ماتدري بناس وحتى اليعرف مايحجي يخاف
ظلينا بلوعتنا على اخوي كلش ظلمت الدنيا بعيونا وخفنا لا يروح وخاصه الامريكان دخلو بحيل صدر وكل المناطق دخلوها وثبتو بيها قاعده هنا إحنا فقدنا الأمل برجعة اخوي....كلنا راح انقتل بالحرب حاله حال هوايه ناس راحت ضحايا الحرب
إلي مجرب لوعة فكد الاعزاز يخاف لايخسر بعد
أمي راحو نص اهلها بحرب إيران وماعرفنا اخبارهم وهسى جملتها أمريكا الحروب اخذة من حيلنا حيل زرعت بكل بيت غصة وكسرة كلب. ..

لايكاتكم وتعليقاتكم حلواتي 💕🤏❤️لاتنسون التصويت
حتى تصعد القصه 🥺