انتقام بمنطق الحب ( الجزء الثاني زواج لم يكن في الحسبان)

الجزء السادس عشر

" انتقام بمنطق الحب "الجزء السادس عشر

في منزل والدي رغد
رغد : لا طبعا مش هسمح لبنتي تروح مكان متعرفش فيه حد
إياد : وفيها ايه يا رغد هتكون مع أبوها وفرصة تتعرف على عائلة باباها
روفيدة : وافقي يا مامي عايزة أروح الفرح مع بابي وأشوف العروسة وأتصور معاها
علي : أنا كمان رايح محمد عزمني ، بنت عمك حور يا يونس بحبها زي رغد بالظبط
يونس : حضرتك تعرفها ؟
علي : شوفتها قبل كده من زمان كانت صغيرة
رغد : بس يابابا أنا مش عايزة أروح الفرح دة
علي : الراجل قدرنا ولازم نروح كلنا
إياد: هو ده الكلام يا عمي
ونظر ليونس وغمز له

وصلت أميرة محطة مصر وخرجت منه وذهبت إلى إحدى الفنادق مؤقتا حتى تجد لها مكان إقامة مستقر خاص بها

في الإسكندرية
في عيادة النساء والتوليد
الطبيب: مبروك يا مدام رانيا فعلا حامل في شهر ونص ، نخلي بالنا من نفسنا وصحتنا تمام
حازم : تمام ياكتور
الطبيب : كتبت لك على مقويات وحقن هتمشي عليها في نقطة مهمة لازم تاخدي بالك منها حملك بعد السنين دي هيكون فيه شوية تعب مضاعف عن تعب الحمل الطبيعي
رانيا : مش مهم أتحمل المهم الحمل يكتمل
الطبيب: بإذن الله بس في حاجة لازم تعرفوها
حازم : ايه هي ؟
الطبيب............

في منزل الصاوي
يامن : خلاص يا مي بقى لسه زعلانة مني
مي : مكنتش متخيلة أن بعد السنين دي دماغك تروح لبعيد وتوصل للشك
يامن : خلاص بقى قولت لك غصب عني
مي : يامن هو أنت بتثق فيا ؟
يامن : أكيد ولو مش بثق فيكي ، مكنتش تممت جوازي  ولا خلفت منك بس صدقيني يا مي مش قصدي، اعتبرها وقفة شيطان وعدت
مي : طيب لو الموضوع العكس كان شعورك هيكون ايه ؟ لسه في مشاعر ناحيتك لرانيا
يامن بغضب : أنتي اتجننتي ولا ايه ؟ أنتي عارفة كويس أوي أن علاقتي برانيا منتهية من زمان قبل ما أعرفك
مي : أنا مش بتهمك ، أنا بقولك مثال يا يامن
يامن : لا مثال ولا نيلة ممكن نقفل على الموضوع ده ، أنا بعترف إني غلطت وأعتذرت ليه بتفتحي الموضوع تاااني ، ولا عايزانا نتخانق على حاجة فاتت وبابها أتقفل
مي : أوعى في يوم من الأيام تتوقف عن حبي  يا يااامن
يامن : أنتي دماغك راحت لفين ؟ لا طبعا مفيش الكلام ده طلعي من دماغك الأفكار دي عشان تكوني عارفة يا مي مفيش ولا ست في العالم ده كله تقدر تاخد قلب يامن الدمنهوري غيرك مهما شوفت ستات وبنات ولا كأنهم موجودين أنتي بيهم كلهم وأحلى واحدة في نظري

في القاهرة

في إحدى القاعات داخل إحدى الفنادق المطلة على النيل
إياد : المكان تحفة جدا
محمد : أهلا نورت يا علي ، مبسوط أنك جيت
علي : لازم أجى يا صاحبي أي كان الخلاف والمشاكل بينا دي حاجة ودي حاجة
محمد: طول عمرك ابن أصول يا علي اتفضلوا
روفيدة : فين العروسة عايزة أتصور معاها
محمد: تعالي يا حبيبتي أخدك عندها جوة اتصوري معاها براحتك
روفيدة : أروح مع جدو يا مامي ؟
فأومئت رغد رأسها بمعني : نعم
إياد: فين يونس ؟
محمد : مش عارف راح فين ؟
إياد :طيب يا جماعة أدخلوا أنتم  وأنا هخرج أجيب تلفوني عشان نسيته في العربية
محمد: تمام عموما القاعة على شمالك على طول
إياد : تمام عن إذنكم
وتركهم ورحل للخارج