بريئة تحت خط ألانتقام

1

عام 1990
شهر 5 ...

اختي صبا تصب الغدة ...
امي وابوية كاعدين بالحوش يسولفون .
اني اسمع بالراديون .. اخبار ال12 ظهراً ..
غيرت الموجة على اذاعه ثانية ... طلعلي اغنية فؤاد سالم ... بس مااستمتعت صاحت اختي صبا بصوت عالي ويا ضربت الچفچير على الجدر ..

صبا ..... يله تعالو تغدو .

طفيت الراديون ورجعتة عالقريولة وحطيت مخدتي فوكا
طلعت غسلت ايدي ..
اجتي اختي صبا السباعية شايلة الصينيه .(( صبا اخر العنقود .. خواتي 4 متزوجات وبس صبا بقت عدنا .. ترفض كل قسمة تجيها .. عمرها 16 سنه يمكن تكولون صغيرة بس بالنسبة للقرية الكاعدين بيها يعتبروها مستحقة زواج او راح يفوتها القطار ...صبا سباعية شايلة البيت كله شغل طبخ .. امي مره جبيرة بالعمر وابويه كذالك يا دوب يكدر يتمشى شويه شويه حتى يتوضئ ويصلي عالكرسي ....

جاسم ... هله والله عاشت ايدج ريحة البانيا خشت بخشمي

صبا .... ههههههههه الف عافيه

أمي ..... يمه چان ما كثرتي دهن موزين علينه (( هاي حچایة امي يومية لصبا .. هي تعرف صبا حريصة على صحتهم بس امي لازم تگولها يومية ويا ما نحط الصينيه ))

صبا .... يمه يبعد عيوني ما مليتي شلون اكثر دهن دشوفي حتى التنگة تبقى عدنا 6 اشهر ههههههه

أبوية ..... عاشت ايدچ يابة ما گصرتي ويانة كون الله يفتحها بوچهج ويوفقج طول عمرج

صبا ..... مشگور يابة على عالدعوة يله تعالي سمي بأسم اللهشوف تمن العنبر والبانيا شلون سويتها ... شوف اللحم شلون متفصخ .

جاسم .... والله ريحتها تارسة البيت

صبا ..... لحم غنم بيها وعندك الحساب

(( اني وصبا هاي طبيعتنا ما نسكت عالصينية ... امي وابوية بس ياكلون وعينهم علينه مرات يشاركونا الحديث واغلب المرات لا ...))

جاسم ...... الخضرة وين (( صبا لازم تنسى مصفي الخضرة واذكرها بي وتروح تركض تجيبه وتجي .. ))

صبا ...... هاك

جاسم .... چدميها يمي مانوشها

صبا ..... شبيك قابل ايدك گصيرة !

جاسم ..... گصيرة ولا طويلة وننهب العالم

صبا ..... ههههههههه والله يجاسم محد يغلبك

جاسم .... نظفي الحچرة الاخيرة اليوم تعلولتنا اني وسرحان هنا بالبيت

أمي ...... هو شلون سرحان من تروح للفرن ما يگصر ويانه يا يمة يوميه يفگدنا صبح ومسية

جاسم ..... يمه سرحان مو تعرفي صاحب نخوة ووگفات ماتنعد

سرحان ....
صديق طفولتي ..ومراهقتي ...وشبابي ..
كآتم اسراري ... سندي بالشدات
سرحان اعتبرة اكثر من أخ وصديق ..
متشابهين بالافكار ..بالاراء ....حتى بأغنيتنا المفضلة ...
اني اشتغل عامل بمعمل مال صناعة داخل عامل بفرن بقضاء بعيد شويه عن قريتنا ... لهالسبب يكون مبيتي هناك بوقت دوامي مااكدر رايح وراجع لان ماعندي سيارة وطريق القضاء للقرية مالتنا تنقطع بي حركة السير بعد الساعة ال 6 مساءاَ .... جنت بس يومين بالاسبوع عندي اجازه اجي لاهلي وبعد اروح 5 ايام بالفرن ..
بوگت غيابي عن اهلي سرحان ما مگصر يحل مكاني رايح جاي عليهم يجيب علاجلتهم لتخلص .. وينگللهم مي من الشط لان المي بصعوبة يوصلنا مرات ايام لو اشهر ما يوصل ... امي اذا تعبانة ادزني اني لو سرحان نجيب مي من الشط حتى يغسلون مواعين لو ينظفون البيت بي.... ولو امي شويه زينه تاخذ صبا وتروح للشط يكملن غسل مواعين وغسل الملابس ويرجعن للبيت ومرات تصدف يمر من يمهن جيرانا ابو سعيد عنده بيكم تعبانه علكد الحال وامشية آمره
يشوفنا من يرجع من شغله(( يحوش الزرع)) ويصعدن ويا يوصلهن لراس دربونتنا....
من وصلنا موضوع سرحان ..
صبا ذبت الخاشوكه ونفظت دشداشتها