بريئة تحت خط ألانتقام

4

اثناء ما صافن وادخن بالجكارة ..
اجوي جهال يركضون للكهوة
عمو عمو .. عمو عمو ...
عمو جاسم الحگ صبا اختك واچة النار بيها وطالعة للشارع ....

من سمعتهم گالوا هيج
ذبيت الجگارة من ايدي واحس روحي شاغت
صبا يبعد اخوج .... ولج صبا واچة النار بيج ..

طلعت اركض من الگهوة وماادري بنفسي شسوي ..
الى الان ماعرفت رجلية شلون وصلتني لبيتنا
جنت مو بوعي زين وكدرت اندل دربونتنا ...

وصلت للبيت وشفت نسوان الطرف ملتمات ..
من شافني سولي طريق ..
انه الدمعة بعيني ...فاتح عيني واباوعلهن ..
متوقع بهاي لحظة يكلولي ماتت ... البقية بحياتك

توقعت اختي ماتت كل النسوان وجوهن تبچي .. او مو بس النسوان الكل مقهورة ..سمعتهم يكولون بلكي تعيش خطية بعدها حديثة .. ..

.اني وكعت للكاع ..الزلم ركضت لزمتني ويغسلون بوجهي ..
ويطبطبون على ظهري ...
بس اسمع كلامهم
صح فاتح عيني بس مااشوف شي كدامي
كأنما اني بحلم ... او بعالم وحدي ...
كل الضوضاء ليمي ماادري ولا احس بيها ..
بس اصواتهم صافية تجي لأذني اسمع كلامهم على صبا

( قوي كلبك جاسم خوية .. ماعليها شي ان شاءالله ترجع اخيتك وتكوم على حيلها ...نصرت يكلي هيج ..باوعت عليه مصدوم ..وعيوني تكت دموع ماتوكف ...))

اخذوني عليها للمستشفى ..
كل هذا الوقت واني ناسي هاي صبا الخانتني ويا سرحان وشفتها بعيني ...
ابالي بس اختي الحنينة ...
سبحان الله فعلاً حب الاخ للأخ يظهر بوقت الشدة وبوقت الي نحس راح نخسرهم ...
وصلت للمستشفى... شفت امي اباب المستشفى مددة وتبجي ...اول منظر صار كدامي امي كاعدة بالكاع ومددة رجلها وتضرب عليها حيل ...امي طالعه حافية من البيت ...شفت جواريبها السود كلها متربة .درت عيني شفت ابوية يدهك بالبجي وزلم يمة مكعدينا عالكرسي ويغسلون وجهه بمي ...

للمرة الثانية توقعت امي راح تعيط بوجهي وتكلي ماتت اختك صبا ..
تقربتلها بخطوات كلها خوف ....
خطوات تسبق سماع خبر راح يبقى يرن بأذني طول العمر ....

جاسم .... يمة لا تكوليها ... يمه وين صبا

أمي ... ولك يمة اختك وچت النار بيها .. ولك اختك راح تموت يمه جسام بعد منو النه

جاسم ...... يمة لا تحجين هيج .. صبا ماتموت ... لا تجيبين طاري الموت يمه ...(( حضنتها وحطيت راسها على صدري واثنينة نبجي ... هسه لازم اصير قوي ...لازم اهون واخفف عن امي وابوي ...مو وكت اصير ضعيف ... ))
يمة لا تخافين صبا قوية راح تصير زينه ...
راح اروح احجي ويا الدكتور ليش مطلعينكم هنا .

أمي ..... ولك يمة اختك كدامي تركض والنار تطاير وراها ...روح خش للدكتور كول للدكتور لا تموت صبا ...هاي شمعة دارنا لا تموت احجي ويا الدكتور (( لزمت ايدي تريد تبوسها ...اضن امي جانت تتصور اني والدكتور بأيدنا راح ننقذ صبا لو جاها الموت ))