ألدكتور ..... دقيقة (( ضل يكلب الاوراق ...طلع ورقة تحاليل سمراء ...قرأها وضحك ))
هاك خوية مبروك البنت حامل !!!!!! ...
جاسم ..... شنو دكتور منو حامل ؟؟ انت غلطان بالاوراق خاف اكو سمراء ثانية بالردهة
الدكتور ..... هههههههه لا حبيبي ما غلطان واطمئن زوجتك حامل لان ماكو غيرها سمراء هنا ... الف مبروك ..(( دخل للردهة مال النساء ... الاوراق بأيدي ...هسه صدك كثرت همومك يجاسم ! كثرت مصايبك ؟ سمراء حامل شنو راح تكول ! شتحجي للعالم !
لااا لااا لااا ..كعدت بالكاع ..صافن ..الاوراق وكعدت من ايدي ... نسيت اني وين ... مسحت كصتي ... احس وجهي كله يصب عرك ... ايدي ترجف ...
سمراء حامل حامل حامل ! شلون راح تواجه العالم !
(( طلعت امي ...شايلة بأيدها چفية (( قطعة قماش صغيرة تستخدم بدل الكلينس ..))
أمي .....يمة خيرك كاعد ترجف هنا شصايرلك
جاسم .... هااا يمه ... لااا ماكو شي ... محتاجة اجيبلج شي
أمي .... لا يمة بس اغسل الچفية واجي ضل هنا خاف دكتر يحتاجك(( لفظ والدتي لكلمة دكتور ))
جاسم .... صار يمة ...(( لميت الاوراق من الكاع ...صفنت ماعندي غير حل لازم اتزوج سمراء .. بس شلون اتزوجها وهي بهذا الحال حتى العالم راح تلومني ! لاااا مو مال زواج ! ماعندي حل ثاني غير أسقط الطفل بأسرع وقت اخذها للجدة (( القابلة )) واذببها الطفل مستحيل ينولد مااريدة !
أساساً سمراء ماتحجي .. ماراح انفضح .. اخذها للقابلة واسقط الطفل وكافي يله اهدء جاسم ..هدي بالك ماكو شي ..
كل هذا الكلام اواسي بي نفسي واخفف حجم مصيبتي ...
محاولاً ارضي ضميري وذاتي ! بس ابد ما جنت اهدء بالعكس تكب النار اكثر بداخلي ومشكلتي تتشابك وتتضحم اكثر !
زين شلون ممكن من تسقطها الطفل تموت !
اعرف الاجهاض مو شي بالهين وهواية نسوان يموتن بي !
(( بذاك وقتنا الاجهاض مايفرق عن الموت ..نسمع هواية حالات بالقرية نساء تموت بسبب الاجهاض .. مرات اجهاض متعمد ومرات غير متعمد ... حالات قليلة على عد الاصابع يطلعون بسلامات من تحت ايد الجدة وامكانية علاجها البسيطة ... قريتنا ما واصلها نور العلم والمعرفة والتطور ...كلشي بيها بدائي ومتهالك حتى افكار ساكنيها ..ما منورين عقولنا بالعلم .. كل سكانها مايدرسون مانقرأ كتب مانعيش خارجها مانكتسب ثقافات وعادات مدن ثانية .. منطوين حيل على انفسنا وبيناتنا ...))
رجعت امي وبيدها الچفية تنفظ بيها ...
اني كمت من الكاع ...نفظت بنطروني ... اترخصت من امي ورحت للطبيب ...
جاسم ... دكتور بس ممكن احجي وياك
الدكتور ....تفضل
جاسم .... البنت سمراء ليمكم هسه كلت حامل بس انت مافهمت وضع البنت شنو
أنت تقرأ
بريئة تحت خط ألانتقام
غموض / إثارةتدور احداث هذه ألقصة عن ألانتقام وأخذ الثأر بالطريقة الخاطئة 💔 قصة حقيقية تم نقلها عن طريق بطل القصة وأبنته 😓
