بريئة تحت خط ألانتقام

2

باوعت على بيتنا ... الفانوس بالحجرة انفتح ... انتبهت زين معناها احد من اهلي كاعد .... كمت من فراشي وباوعت زين ... شفت سرحان عبر للسطح مالتنا .... خير ياربي ؟؟ شديصير ؟؟ بس يجوز سرحان يرتاح ينام بسطحنا لو يمهم خطار اليوم وسطحهم مايكفي ونام يمنه .... المشكلة الاكبر شفت صبا فتحت الباب علكيف ... وصعدت للسطح لابسة دشداشتها گصتها جديد يم ام موسى ومشطة شعرها ... هنا حسيت راسي يوش ... كمت مااشوف زين .... مااسمع شي.... صبا وسرحان  !! ..واضح هي تعرف بي مو صدفه واساساً هيج وقت شعدها تصعد للسطح المفروض تكون بسابع نومة !!!

كمت افرك بعيني اريد اشوف اني بحام لو حقيقه ! الاشوفه صدك لو وهم لو حلم ... كمت اتلمس بوجهي من الصدمه اكول لا يجاسم انت نايم وهذا حلم ...

بس اختي صعدت يم سرحان بالسطح ...
ماكو حركة ...رجعت للفراش وكل جسمي يرجف وافرك بأيدي .... لاااا هذا وهم ... ماشفت شي ... ماكو لا صبا ولا سرحان اني توهمت ... اصلاً سرحان هسه نايم . . وصبا حدها لل 10 وتنام يوميه كدامي ...

سامعين من يكولون (( یچذب الچذبه ويصدگها )) اني هيج جان موقفي ...  هدأت جسمي .... رخيت اعصابي ... ماكو شي ... هذا وهم .... يله جاسم نام كلشي ماكو .... نام يومك هذا طويل وصعب وبديت تخربط بأفكارك ... يله نام والصباح رباح ...راح ترجع للبيت واخيتك صبا تسويلك ذاك الريوك لمعدل  .. وراح تطلع ويا صديقك العزيز على كلبك سرحان  ...

حطيت راسي عالمخدة .. باوعت عالنجوم ...عيني ادمع وادموعي توكع عالمخده ... نار بصدري گبت ..... ليش تغشم روحك ...هذا مو حلم ... اختك بحضن صديقك ....ولك يجاسم امك وابوك مايدرون شكو ..... لك اذا تگتل اختك راح تخسر امك وابوك وتصير علچ بحلگ اهل القرية حتى خواتك المتزوجات هم يطلگوهن  لو يدرون زلمهن بهل مصيبة ... ولك من قبل ٢٠ سنه بيت ابو نهله هم گتلوا بتهم ولهسه الناس تعيرهم من تصير مشكله .. لهسه بيت ابو نهله مايكعدون بگهوة ويا الزلم ومنزلين راسهم للكاع ...رغم ما غلطانين طفوا عارهم ... ورا ما گتلوها فروا كل الولاية ويهوسون (( اصبع عاب وكصينااا ... اصبع عاب وكصينا)) دلاله على ان هم ناس شرفاء وما ساكتوا عن عارهم .....

حطيت ايدي على وجهي وضليت اندب وابجي ...
ياربي شحطيتني بهيج اختبار صعب ...ابويه رجال رجله بحافة الگبر .. وخوان ماعندي ...شسوي ربي ساعدني

فكرت انتقم بهدوء ...
راح انتقم بطريقة ذكية وبنفس الوقت اخذ ثأري ..
مال اسكت لسرحان لا والله ... وصبا هم ماينكست على عملتها هاي ....
بقيت كاعد وعيني على سطح بيتنا ... قبل لا يبين الشوف ...  چنت صافن على بيتنا ... وصدفه صبا نزلت ... نزلت ودخلت للحجره ركض ... سرحان طفر على بيتهم .... اباوعلهم واني متحطم ... منهار ... رغم قوتي غيرتي بس اباوعلهم من بعيد بصفنة شخص مكسور ومخذول .... مثل الشخص الخسران بحرب وخسر بلدة ...
خسارة الشرف ما تختلف عن خسارة البلد .. او هي شي مشابه لشي ...بالحالتين راح يدخل شخص غريب بصفة مستعمر  او محتل يغتصب اراضيك وياخذ خيراتك وتبقى كدام البلدان كلها انت بلد محتل وموقفك ضعيف ....
خسارة الشرف .. مو هينه .. صديقي اغتصب او احتل أرضي وعرضي الي اختي وبداخل بيتنا ....
اخخخخ يا يابة ... ضليت بأيدي اضرب على كصتي حيل وروحي شايغة..
اجر تنهيدة يمكن كلبي يريد يطلع وياها ...
وين جانت مضموتلك يجاسم ...
اخخخخخ ربي  (( رفعت راسي عالسمه ... اشهك ... ودموعي الحارة تنزل ... ))
ربي مارايد شي بس ساعدني ... ارشدني للطريق الصحيح   ....
خلصت عمري حاير بخواتي  واهلي وبرزقي وبصلاتي  والله ما سويت  غلط ... والله ما فوتت الحرام لبيتي ..