ماصبرتي ؟
صِمتي رمضان العشگ وبزاد شماتي فطرتي..
والف آية شوگ رتلهّا الگلب..
لعيونچ بيها كفرتي !
ونذبح بيدچ عشگ سنتين عمره..
ومانغرتي؟
ماصبرتي !
ها وصلتي اسبعطعش..
وبعين المرآية كبرتي
وانتِ غيمه تبخرت بدموع عيني
وبزرع شامت مُطرتي..
وسرچ بگلبي اندفن..
"قبل لنبلش القصة ، اكو هواي شخصيات بما انُ القصة قديمة بدايتها طبعاً*
فـ اكو شخصيات هواي متوفية ، فـ اكيد نتحفظ بكلشي نعلق بي ونخلي حلو ، اول بارتات رح تحيرون بس شوية شوية تتوضح يمكم الصورة
اتمنى تستمتعون يشوية قارئين🖤
صوت عبد الحليم ياخذني لعالم وردي
ويرجعني لهنا ..
"ضيعت عليه العمر يبويا ..
الي يشوف صفنتي وابتسامتي راح يگول شگد حياتها وردية ومنتظرة فارس احلامها الي يشبه كلمات عبد الحليم
لزمت الجريدة وانا احاول اجمع الحروف حتى اكمل ناحية الشعر بالجريدة الباهتة
قبل ليدخلون واحصل رزالة كل يوم...
الحروف الي علمني عليهم اخوي احمد
بطلاع الروح
صوت امي
-تفضلي تفضلي
خلاني افز اطفي المسجل واحاول ارتب الجريدة و ارجعها لمكانها
بيتنا چبير دائماً اشبه بيتنا بروحي واحلامي ، جاه اهلي ومكانة ابوي
كلشي يوضح شگد حلو ومثالي
'من بعيد'
ليش يشبهني؟
روحي بهية وحلوة
شعر طويل ، عيون حلوة وجسم متناسق
بس ولا شي فاشل بگد ربط جمال الشكل بكلشي !
دائماً بأفلام عبد الحليم البطلة تكون حلوة
حتى بكتب اخوية
بس انا برأيي البطلة الي تفوز وتصنع نهايتها. .
ما علينا هالبيت بعدين رح تعرفون ليش يشبهني
شفت امي تدگ بيبان غرف اخواني وتطلعهم للمريه تقرالهم طالعهم
اخواني كلهم يدرسون
عداي..
عدا اختي همين
بيني وبين اختي عشر سنوات فرق
بس الفرق الاكبر اختي عافت الحروف واخذت قيادة البيت
وانا عفت قيادة البيت واخذت قيادة احلامي
مع اني لهسه اگول رب العالمين هو الي يقرر وينطينا مو احنا ناخذ ونعوف شنقود
خمس اخوان
هذا ينجح
هذا زواجه قريب
هذا مستقبله مفتوح
هذا مجهول. .
خزرتني امي
بمعنى صبي شي للمريه
گمت بسرعة لان اعرف بعد طلعتها راح اترزل على تأخيري
اخلط بالشربت وعيني ع الشباك دخل اخوي احمد جوا ايده كتبه و دخل وراه صديقه محمد. .
ضربه على چتفه وهوَ يضحك ويدفع للباب حتى يفوت قبله
رفع راسه بدخلته واجت عينه بعيني
نزلت راسي وانا اصب الشربت وابتسم
وافكاري تروح وترجع
افكار وحدة عمرها 15 سنة بس
بس مشاعرها چبيرة وتحير وين تاخذها وترجعها
تذكرت امي الي تنتظرني و رحت ..
مديتلها الصينية ولسه اثر ابتسامتي على وجهي ،
اخذت گلاص الشربت ولزمت ايدي بسرعة
فزيت وانا اباوع لايديها الي مغطيتهم بچفوف سودة نصهم والنص الثاني طالع محترگ جزء من ايديناتها
أنت تقرأ
«الكرخانة»
Romance-اعتذارت امي ما ردت المكينة تكسر ظهرچ ، تاليها كسره اختياري عمت عينچ يـا زينب -گدامي سنابل لو اگدر احسن زرعهم ومداراتهن لو يحترگ بستان روحي وهن اول مايحترگ بي ! -بس انا ردته يشيل حملي وياي ماردته يزيدني ويعجزني حتى عن نفسي يمه هذول وليداتي و زرعاتي...
