Ramdam ko ang mga titig
Pinapanood ang bawat pagpihit ko ng pahina na tila may pinapahiwatig
Maihahalintulad sa halamang makahiya na tumitiklop sa oras na nagtatama ang ating mga mata
Na para bang musika sa kalagitnaan ng pinakamataas na nota ay biglang bumabagsak sa kawalan ng tunog
Nanonood ka
Napapangiti ka
Minsan, iniisip ko isa ba akong palabas?
Nagbibigay aliw sa manonood at palaging nasa kasukdulan ng teleserye sa paraan ng paglaan mo ng atensyon
O marahil ay musika na humehele sa iyong tainga
O isang obra na nagbibigay sayo ng palaisipan kaya tinatanaw--- sinusubukang bigyan ng interpretasyon ang bawat lapat ng kulay sa kanbas.
Aking manononod,
Kung ang nais mo ay panoorin ako tulad ng isang pelikula, pakinggan tulad ng musika, o tanawin ako tulad ng obra,
Maaari bang huminto ka?
Sapagkat hindi ko nais na panoorin mo lamang ako.
Nais kong maging artista ka na dinadamayan ako sa loob ng pelikula, sa kasukdulan at kakalasan
O mang-aawit na sinasabayan ang aking mga himig upang ihele tayong dalawa; Upang ihele ang nagwawalang mga halimaw sa loob natin na pilit kumakawala
O maging isang pintor na nilalapat sa akin ang bawat kulay para bigyan ako ng kahulugan.
Ngunit hindi...
Pinili mong manood at humakbang papalayo
Naiwan ako sa kalagitnaan ng pelikula--- walang wakas at naligaw sa daloy ng istorya
Nawalan ng boses sa kalagitnaan ng pagtaas ng mga nota sa huling kumpas ng maestra
At obrang nanatiling nakapaskil sa dingding, hindi man lang nabigyang kahulugan ang pagkahalo ng mga kulay na mabusising nilapat sa kanbas para sa iyong pagtanaw
Doon ko natanto na hindi ikaw ang manonood
Hindi ako ang pelikula; o ang musika; o ang obra
Hindi ikaw ang manonood
Kundi ako...
Ako ang naghintay na gumawa ka ng hakbang
Na lapitan ako sa gitna ng iyong pagtanaw
Pinanood ko
ang unti-unting pagpundi ng kinang sa minsa'y makislap mong tingin
Pinanood ko
ang kasukdulan at ang pagtatapos ng iyong damdamin
Pinanood ko
ang pagpikit at pagtalikod mo
Pinood ko
ang paglakad mo papalayo sa sementadong daan, malayo sa berdeng mga damo kung saan dati'y tinatanaw mo ako sa aking pag-upo
Ako ang manonood.
