" كيف ما احبك وانتي كل ما تشوفه عيوني "

46

معليش على القطعه الطويله بس اخوي فهد توفى الله يرحمه ويجعل مثواه الجنه ، نبدأ بجزء بسيط ونكمل قريب

صد مسلط بضيق لأول مره فهد يضربه : بصرك بس الي بيندم انت
مشى مسلط من قدام فهد ودخل غرفه نوره وقفل الباب وهو ينام على سريرها : اشتقت لك ،
غمض عيونه ونام

بعد اسبوع من الحادثه فيها خلعت امواج جاهر وانفصلت عن اهلها واهل زوجها جاهر

قامت رغد بخوف من سمعت صراخ نوره : قومي قومي ،
قامت رغد بضيق وناظرت فيها : نعمم
استغربت نوره ضيقه رغد وضمتها من جنب وهي تضحك : اشبها العروسه زعلانه؟
لفت رغد لها بصدمه تحاول تستوعب كلامها : عروسه ايش شكلك مضيعه يا الاخت
هزت نوره بالنفي ونطقت بصوت عالي : وييننككك ووين الدنيا فهد بيخطب امواج بعد ما خلعت زوجها وانتي تقدم لك اخو زوجي
فزت رغد ورفعت يدها تبعد شعرها عن وجهها وبكت : كيف!!
انصدمت نوره ومسكتها من كتوفها وميلت راسها بعدم فهم : وش كيف تقدم لك عزام وبس ليه البكاء؟
حكت رغد كل شي لنوره المصدومه : بس ما ابي اتزوووجج!!
نوره : الحين عرفت ليه مسلط كان مصر على ابوي تتزوجين عزام

قامت رغد من السرير وطلعت من الغرفه وشاده على يدها بقوه خايفه من مصيرها
دخلت الصاله ولقت اهلها كلهم مجتمعين ومن بينهم مسلط : تزوجوني وانا مدري؟؟
طالعوها كلهم بأستغراب ونطق مسلط : القرار مو قرارك وبعدين شفيك معصبه ترا بس تقدم ما وافقنا ولا شي
تقدمت رغد قدام مسلط وللحظه خانتها دموعها وانهارت على الارض : ليه ليه ما قلت لكم ماني متزوجه توي داخله جامعه وبعدين حنا قلنا يتقدم بعد ما اخلص جامعه ليه متقدم الحين!!
تجاهل مسلط بكائها ونطق بعدم اهتمام : وشوله التأخير تراها مغير جامعه
لاحظت ام فهد العداوه الي بين رغد ومسلط ونطقت : ترا هو موافق على انك تكملين جامعه
لفت رغد عليها بقهر : ما ابييي حتو ولو البنات كلهم تزوجو بعد الجامعه وش فرقت عنهم انا!!
رص مسلط على اسنانه بعصبيه : صيري زي عفاف عانوها متزوجه قبل ما تدخل وانتي اكبر منها عجزتي توافقين على خطوبه عشان جامعه ما تسوى
صارخت رغد بكل ما عندها على مسلط : انت سد حلقك مالك دخل
قاطع ابو فهد مسلط الي كان بيتكلم ونطق بعصبيه : خلاص انتم الاثنين مانكم اخوان؟ ورغد القرار لك تبين او لا ومحد له رأيي غيرك!
مسلط : بس ابو..

'

قاطعه ابو فهد بصراخ : انت مالك دخل علامك مستقوي عليها عشانها ما تبي تتزوج اقطع الشر وبس
حست رغد بأنتصار ورجعت غرفتها حاسه مالها حيل تسوي شي
ولوهله تذكرت ليان من يوم تزاعلو وهي ماهي طايقه لها خبر بس تحس بنغزه كل ما سمعت اسمها
فتحت جوالها تناظر الرسايل بس لفتها اسمها... " اسم ليان "
ترددت تشوف رسالتها لثواني ونزلت الجوال تناظر السقف بفراغ كبيررر ، وقع الاختيار على انها تشوف الرساله وانصدمت من محتواها

^ والحين يا رغودتي مافي شي يقدر يرجعنا زي قبل ، ادري اني قسيت عليك وقلت كلام ما كان لازم اقوله بس كلامك عن اخوي هادي كان اكبر من استيعابي وقلت كلامي في لحظه غضب قسم ما كان قصدي صحيح اني جالسه ابرر على كلامي الفاضي بس اتمنى تسامحيني بعد فراقك حاسه بفراغ مو طبيعي ، اسفه اسفه اسفه اقسم بالله اسفه ، وكنتي صادقه يوم نصحتيني ابعد عن ناصر طلع خاين والله خاين قهرني تكفين ارجعي لي ، اعرف خطأي كبير بس تكفين ارجعي ، مدري ليه قاعده اترجاك مع ان ردك معروف فحابه اقول ان نوره علمتني عن عزام وانك بتتزوجينه فمبروك والله يخليكم لبعض واوعدك انك ماراح تشوفين وجهي مره ثانيه ^

بلعت ريقها بخوف ودقت عليها
مره
مرتين
خمس
عشر
مافي رد؟

فزت من السرير وطلعت برا وركبت سيارتها لبيت ليان خايفه من الي في بالها
وصلت عند الباب وضربته بخفه وهي تاخذ نفس عميق وتزفره

توجهت ليان للباب باستغراب الوقت متأخر مين الي يدق؟
فتحت الباب وشهقت شهقه عمرها ما شهقتها من الشخص الي قدامها
تقدمت رغد بسرعه وضمتها دون اي كلام غير دموعهم الي تاخذ مجراها

عند مسلط

جلس بجانب ابوه وباس يده : اسف على كلامي اليوم
ابتسم ابو فهد بخفه ونطق : ها وش عندك
عقد مسلط اصابعه بتوتر : موضوع رغد
تنهد ابو فهد وانتظر مسلط يكمل كلامه
مسلط : يا ابوي والله عزام رجال وشهم وانا خايف على رغد من عيال الديره كلهم...تذكر اصابه رغد؟ بسبب واحد يحبها والله الحب ما يسوي غير المشاكل فزوجها عزام والله احسن اخذها بالحلال وعلى تقاليدنا ماقام يمين يسار وانت اعلم بمصلحتها وموضوع رفض رغد هي بنت وكل البنات يبون يتزوجون عن حب ورغد منهم بس ما لقت الي يحبها ويحميها مو ياذيها فطلبتك ما ترفضني وزوجها وصدقني انها بتعيش احسن حياه شوف نوره كيف عايشه؟ مستانسه ومبسوطه ولله الحمد واذا هي تبي تكمل جامعتها وكل شي زين انا بكلمه بنفسي واذا رفض خلها لا تزوجها

انها كلامه وهو يبلع ريقه ينظر رد ابوه

'

اتمنى هاذا يكفي لليوم ونكمل قريب بأذن الله❤️‍🩹