" كيف ما احبك وانتي كل ما تشوفه عيوني "

13

ناظرت رغد ليان و شافتها تغمز لها وتضحك
رغد : وجع؟
ليان بأبتسامه عريضه : تزوجو والمهر علي
رغد بتحسف : ياحسره عمري عليك يا ليان بس
ليان وهي تعدل جلستها : بالعكس انا جالسه ادعمك عاطفياً
رغد : قصدك تدعميني بالسياره
ليان بأستغراب : كل ذا ما عرفتي انه يحبتس
رغد بعصبيه : حبك الابرص ان شاء الله مالقيتي الا هو؟
وكملت : وبعدين انا ما خلصت من معيض ونايف تبيني احبه هو؟؟
ليان : طيب شفيك عصبتي؟
رغد بهدوء : الولد ذا متحجر وعصبي بس يهاوش وحتى نايف بنفسه احسن منه واكثر
ليان : طيب ومعيض يحبك نفس نايف؟
رغد : في فرق بين ( الهوس ) و ( الحب )!
معيض دايم يلاحقني في كل مكان واذا شربت عصير و قطيت العلبه في الزباله يروح ياخذها و يحنطها عنده ويصورني بدون ما ادري و غرفته كلها صوري وتبيني ما اكرهه؟
سكتت ليان لأن معيض منجد مهووس
رغد بهدوء اقل : تبين اوضح لك اسباب كرهي للحب و للعيال هاذول؟
ليان : اي

رغد :
اول شي راح نستبعد سعد لأنه ما عطاني خبر وحتى انه كل ماشافني تهاوش معي واصلا هو ما سوى كذا الا توصيه من خالتي انه ما يحارشني و يتهاوش معي لأني سمعت مكالمه خالتي له يم كنت عند الحريم

ونايف معروف من كل خالاتي انه يحبني وهو اصلا ما اعترف وحبه يعتبر شوي صادق لكن مستحيل احبه او اتزوجه لأنه بأختصار يضرب امه والرايح والجاي فما بالك لو صرت زوجته وش بيسوي فيني و بعيالي؟ بأختصار بيذبحنا و خاصه ان متشدد في عادات و تقاليد الديره فما راح اقدر اعيش بحريه ابدا

ومعيض شي ثاني مهووس بالمعنى الحرفي يحب يناظرني لدرجه ان حط كاميرا في غرفتي بالسر وما اكتشفتها الا بعد شهر و احمد ربي اني كنت ابدل ملابسي بغرفه الملابس ولا كان صار شي ما يحتاج اقوله وياليته يكتفي بذا بس بعد اذا طلعنا مع عماتي دايم يكون موجود و اذا شربت ببسي بالعلبه حقت المطاعم يجي يشرب منها بنفس المكان الي شربت منه ويخبيها معه وما انكر انه طيب مع الكل لكن هوسه خربه 180°

ليان بأقتراح لرئيها : اول شي سعد صح استبعدناه وصارحه لاحظت انه يكرهك من زمان ونايف ماقد شفته يضرب امه وحتى ما جا في بالي انه يضرب امه بسبب حبه لديمه فقلت انه يحب امه نفس حبه لديمه اما معيض اعرف ايش سوا وايش بيسوي فما يحتاج نتكلم عنه
وكملت بتنهيده : اكره اني اشوفك تعانين كذا وانا ما اسوي شي ولا حتى اعرف بالي يصير لك
ابتسمت رغد وضمت ليان : كنت اخفي عليك ذا كله عشان ما تشيلين همي بس انتي مو راضيه تسكتين
ضحكت ليان وضحكت رغد معها

'

ليان بطقه : وش يقول الشاعر؟
رغد :

واحدن عاده من الاولين الطيبين
عشرته ما حافها لا فلان ولا فلان

عاده من اللي يقدر سلوم الطيبين
لا يخون الي يحبه ولا يرضى الهوان

ليان بتصفير وتصفيق : صح لاسانكك
رغد : لا داعي للتصفيق يا اختاه
ليان بتحسف : الثقه الزايده ياناس
رغد : بس في محلها
ليان : اي اي مشاء الله
رغد : مالت
ليان : اييي صح ابي اعرف وش قرابة اعمامك و خوالك؟
رغد : مافهمت؟
ليان : صح مشاعل قالت انها ما تقرب لأعمامك بس كيف ما تقرب لهم وانتي تقولين ان بينهم قرابه وليش سموكم آل فيصل
رغد : اول شي جدي فالح الله يرحمه و جدي فهيد اخوان و ابوهم الي هو فيصل كان تاجر كبير والكل يعرفه وبعد مامات ابوهم فيصل جدي فالح و جدي فهيد اخذو مكانه وبدو يتاجرون هم بعد من بعد ابوهم و بعدها بدو خوالي واعمامي وعيالهم يطورون الشغل الين صارت شركتين للتجاره فعشان كذا سمونا آل فيصل
ليان : الله
رغد : يلا نامي تصبحين على خير
ليان : وانتي من اهله
نامو البنات و صحو على صوت جده مشاعر تقومهم للصلاه
الجده مشاعر : يله قومو قومو نعنبوكم ذا نوم ولا سبات؟
ساره وهي تسحب البطانيه من وجهها : الله حبيت الذبه
طقت الجده مشاعر راس ساره بالعصا : تجمعو عليتس الذبان يا بنيتي
مشاعل بنعاس : الحين هاذي سبه ولا مدحه؟
نوال وهي تقوم : لهدرجه غبيه اكيد سبه
ميرال وهي تقوم هي الثانيه : لا لا مدحه قالت يا بنيتي
سجدت ( ضربت ) جده مشاعر العصا على ضهورهم : نعنبوكن انتن بس تهاوشن
نوال بتوجع : عشانتس جدتي بسكت
ميرال بتوجع اكثر لأن الجده كانت اقرب لميرال اكثر من نوال : ليش ضربتيني ما سويت شي حرام عليتس
الجده مشاعر : لابدن انتن الثنتين طقيتكن نفس الطقه
نوال : لا والله طقيتيني اكثر منها
قرصت ميرال نوال عشان تسكت ولا بيلقمون احلا تكفيخ من الجده
ميرال : ابشري حنا الغلطانات
الجده لنوال : عانيها يا حليلها اعترفت بغلطها الا انتي تكابرين
نوال : خلاص اسفه
ساره : وين الهنوف و عفاف و حصيص
جده مشاعر : قامن من زمان وانتن توكن
مشاعل : الله يرزقنا نشاطهم
جده مشاعر : معليه روحو قومو ليانتي و رغدتي
البنات : ابشري
قامو نوال و ميرال و ساره مع جده مشاعر اما مشاعل راحت تقوم رغد و ليان للفطور
مشاعل بعد ما شغلت النور : يالله يالله قومو صباح جميل ورائع لأجمل ثنتين في العالم رغودتنا وليانتنا
رغد بتمغط : حسبتك جده مشاعر
مشاعل : قبل شوي كفخت نوال وميرال عشانهم قعدو يتهاوشون على ذبه جده مشاعر
ليان بفركه لعيونها : وش هي الذبه؟
مشاعل : نعنبوكم ذا نوم ولا سبات؟
رغد : كل ذا عشان ذي الجمله