"Wow bag-og selpon si Penelope, tats screen" singgit sa akong classmate nga si Jun-Jun. Nangduol pud akong mga classmate nga amazed kaayo sa akong bag-ong cellphone.
"Mahal guro na Pen noh? Tagpila na?" pangutana sa akong classmate nga si Jonah.
"Wa ko kabalo oy, gihatag ra man ni sa akoa ni papa."
"Grabe datua gyud ninyo noh?"
Nismile lang ko sa ilaha. Di man gyud nako ideny nga naa gyud mi kaya. Pero wala gyud nako na ginapanghambog. Thankful ko sa mga blessings nga among nadawat ug kontento nako sa kung unsay naa namo.
"Ako naa koy keypad! kay mama man to sauna usa sya nag-abroad. Mamatay lag kalit pero mugana pa man." Ana si Thea.
"Kay naa naman kay cellphone, pwede na ta mahimong textmate Pen." Ana pa siya.
Karon ra jud ko nagkacellphone. Dili lang pud ko gusto ug wala pud koy interes. Pero kay pirme man ko top 1, gitagaan ko ni papa. Dili man pud ko kabalibad, maong gidawat nalang pud nako.
"Gusto pud tika mahimong textmate Penny." Ana si Ryler nga niduol sa amoa.
"Heh! Pag-undang ra gud Ryler baho kaayo kag baba!" sabat ni Thea.
Ambot oy nganong dako kaayo ni syag kalagot ni Ryler. Muginhawa lang gani si Ryler mahighblood na sya.
"Agoy baho lagi daw kaayo kag baba Ry. Pagtoothbrush lagi! HAHAHAHA" panungog ni Boboy nga isa sa mga alipores ni Ryler.
"Hoy Theyang burikat! Nagtoothbrush ko do. Ali diri, kissi ko para mabal-an nimo."
"Uyyyyy!" nanyagit silang Boboy.
"Ew yaks ayaw na Ry. Nagtoothbrush diay ka? Di man halata naa man gihapoy amoy."
"Ohhhhhh!" nangreact na pud silang Boboy.
Ilhan kaayong napikon na si Ryler kay nagmugtok na pabalik sa lingkoranan.
"Tama na Thea." pagbadlong nako kay Thea.
"Maglagot gyud ko anang Ryler ba. Kulang sa pansin kaayo. Mura ra ba'g gikagwapo niya!"
Gihirman ni Thea ang akong cellphone kay magselfie daw sila. Akong mga classmate nga babae kay nagtapok duol sa akoang bangko.
Hapit na mahuman ang recess maong naghinay-hinay na'g balik sa room akong mga classmate.
"Bag-o daw ka'g cellphone Penny? Pangutana ni Beatrice nga bag-o lang naabot kauban iyang mga barkada. Nitando ra ko.
Niduol si Beatrice ila Thea ug gikuha ang cellphone.
"Unsa mana si Beatrice uy! kung makabira mura ma'g iya." Wala nitingog si Beatrice ug nagpadayon ug kulikot sa akong cellphone.
"Dili mana gwapo nga model. Mas gwapo tung gihatag ni mommy sa akoa gikan pa'g Hongkong." Sabat ni Grace.
"Bitaw." ana si Beatrice nya giuli ang cellphone ila Thea.
"Dal-on nako ugma para makit-an ninyo." dungag pa ni Grace.
"Sige kay magpicture-picture ta." ana pud si Beatrice.
Naanad nako anang ilang mga batasan. Kusog kaayo na sila manghinaway nya mga pasosyal kaayo. Matapobre pud na sila, ilhan man. Dugay nako ginainvite nga muapil sa ilang grupo, pero dili gyud ko ganahan nila. Di pud ko gusto magpinlastic sa ilaha. Plastic na gani sila, musuon pa jud ko.
Niabot na among teacher para sa sunod nga subject. Gitawag niya ang mga boys nga nagtambay pa sa ilalom sa mangga.
Nitan-aw ko sa akong mga kaklase nga mga lalaki nga nag-iyahay ug sulod sa room. Nihunong akong mata sa usa ka partikular nga lalaki. Taas kaayo sya, gwapo kaayo'g mata, sige'g smile, pero bugoy².
"Ganina ra nahuman ang recess boys, nagtambay pa gihapon mo sa gawas."
"Sorry ma'am." ana sila.
"Kapila naman ni nahitabo."
"Di na jud mausab ma'am. Ayaw na gud ug kasuko sa amoa ma'am, gwapa bitaw ka karon." Ana siya.
Nangatawa akong mga classmate sa iyang jamming. Nakasmile ko'g ahat. Gwapoha jud ani niya uy.
"Ayaw nako jamminga Julio. Panglingkod na gud mo."
Palingkod na sila sa ilang lingkoranan sa dihang nagsugat among mata. Nismile sya nako nya iya kong gikidhatan. Gitago ra jud nako akong kilig. Wala man nuon nakapansin ato.
Nagpadayon nami sa among klase nya pagkahuman kay lunch na dayon.
"Asa ka maniudto Pen?" pangutana ni Thea.
"Diri ra sa room, nagbalon man ko."
"Sige diri nalang sad mi. Mamalit sa mig sud-an sa canteen. Wala kay ipapalit?"
"Wala. Salamat nalang." tubag nako.
Nilakaw na silang Thea kauban si Mae para mamalit ug sud-an. Nabilin ko diri sa room. Naa pud koy ubang classmate nga nagpabilin kay gusto sad nila diri mukaon. Silang Grace kay nagpabilin pud sila diri.
"Penny new phone daw ka? Pangutana ni Jacob. Nismile ra ko ug nitando.
"Unsay brand?" gisultihan nako siya sa brand. Nagtando-tando lang siya unya nag-istoryahanay na sila sa iyang mga barkada about sa mga brand sa cellphone.
"Pssst" gikuhit ko ni Joren. Isa sa mga barkada ni Julio.
"Mangayo daw'g number nimo."
"Kinsay nangayo?"
"Si kuan gud." ana sya unya ningisi dayon. Kabalo nako kinsay pasabot niya.
"Dali na, hatag na dayon aron masugdan na inyong love story!" nikatawa dayon siya.
Kabalo si Joren nga naibog ko ni Julio. Wa ko kasabot kung maawkwardan ba ko sa iyaha nga nitug-an man pud na siya nako nga nakacrush daw sya sa akoa. Bisag si Jacob kay nakacrush pd daw, pero wala man jud koy gusto sa iyaha mao tung didto siya nanguyab ni Thea. Tsk tsk grade 6 pa gani.
Nitug-an pud to si Ryler ug Jun-Jun nga nakacrush pud daw sila sa akoa. Unya naa pud toy nag-ingon nga naibog daw sa akoa tung ig-agaw ni Julio nga si Mark, sige ra man tug mugtok. Kuyawa pud nato ani oy. Di basta-basta. Di baya ta tantong gwapa.
Unya kay gusto man pud ko, naglaksi dayon ko sa notebook unya akong gisulatan sa akong number. Ako dayong gihatag kay Joren. Ningisi siya unya giadto na si Julio sa iyang lingkoranan.
"Thank you Pen." Nilingi kog kalit kay nikalit rag istorya si Julio.
"Uyyyyy" nanungog dayon iyang tropa.
Nag atik-atik dayon kog sulat sa notebook aron matago akong kilig. Ambot unsa ni akong gisulat wa na pud ko kasabot.
Nakit-an nako ang grupo nilang Grace nga isog kaayo nga nagtan-aw sa akoa. Nayabag naman guro ni sila.
"Julio! Sabay namo sa amoa ug kaon." pagtawag ni Grace.
"Ah dili lang Grace, sa gawas ra mi mangaon." Nismile ra sya ila Grace nga disappointed kaayog mga nawong.
"Tara gaw." ana sya sa iyang mga barkada unya nanglakaw na sila.
Isog na pud kaayo ug tinan-awan silang Grace nako. Nitikhim ra ko ug wala na sila gitan-aw.
Taod-taod kay naabot na silang Thea ug Mae nga nagdala sa ilang napalit nga sud-an.
"Oh, naunsa mana sila?" gisiplatan ni Thea ang grupo nilang Grace.
"Ayaw na na sila pansina oy. Mangaon na ta." ana ko.
