نوري ف الصاله واسماء فالمطبخ
نوري بغضب واحراج : اطلعي يا ابله يا عاقله يا فاهمه
طلعت تجفف يدها
نوري بغضب : مش قلتي ماشيه لحني
اسماء ببرود مصطنع وكأنها لا ترى جعفر : قلت نتكي نسلم عليها حرام ساد ولدها مات ف عز شبابه
وقف جعفر بغضب وقميصه نصه مفتوح(بدا كملاكم ) : معش تجيبي سيرته فاهمه او لا
نوري تنهد في يأس جعفر غيور مش مستوعب انه ميت
نوري يفنص فيها وهي عيونها على جعفر: جاوبي
اسماء ببراءة كاذبه : شوفه يهزب فيا معش نبيه
نوري انفجع وجعفر عارف جوها كل كلمتين معش نبيه بس تحلم ان ماربيتك يا اسماء
نوري : لانك تستاهلي شن يمشي فيك بيت معش يربطك بيهم شي وعيب في حقي تكذبي عليا وخشي جوا ندير شاهي بروحي..تريح جعفر
دخلت تبكي واعصابها انهارن..
الراحل يزورها ف المنام معاتبا او هو عقلها اللا واعي يشتغل مات يتوسل منها لمسه وهي خافت وهو مرض ورحل ..حاسه بالذنب الكبير خصوصا حضور جعفر يرهقها ويوترها وهذا لم يحدث مع خطيبها الراحل ..ولهذا اتكره فيه في عمره بس هو حصله حصله ..
نوري يصب شاهي : مش عارف شن نقولك البنت انجنت والله متغيرة
جعفر لم يود احراج نوري اكثر : ولا يهمك
رفع الكيس اللي اشحتر برا ..هذه لها عزقتها عصبتني
نوري : صحيت خطرت عليا نشري لحني
جعفر يغلق ازرار قميصه : انا مسافر توصي شي
نوري يرتب هديه جعفر : وين .؟
جعفر : نشوف شيماء
نوري : سلامتك ..سلم عليها وقول لها تجي ما عاد تذكرنا حد بفنجان قهوة وكيكه
جعفر يرفع نقاله ودخانه : والابله كنها
نوري " تديرها وتمشي تاكلها هي والدبات وتخلي طرف
بس شيماء الصفرة والقعدة وهذك البخاره في الصاله ..ومرت عمي الله يرحمه السهاري الراكحه جو ريلاكس بيتهم
جعفر : يسمعك شعيب هههههههههه
نوري : ترا فكني من سيرته التافه هذا
خرج جعفر وعيونه على الغرفه اللي حبست روحها فيها : حاضر فكيتك ..
في الليل
جعفر : كل سنه وانت طيبه حني قال ذلك وهو يقبل يدها وتعيد تقبيل يده لكنها يسحبها
غزالة : وانت طيب يارب ..وين اسماء
نوري يجلس ويغير القناة : بيت سيدي عبدالباسط
صب لنفسه كباية كركدي ..ودخل شعيب
نوري: الله على كركدي شيماء يا حني
غزالة ببرود : شن فيه زويده عليك بروع
نوري شرب ثاني كوب : لا في تحط في عصير لوز ..وهي لوز
شعيب ينفخ : تي احترم نفسك
نوري لم يرد عليه : امتى تعدي تجيبيها حني
غزالة تصب لشعيب عصير : ما قال لها حد تسافر
نوري : عندك حق ..مهم جعفر ماشيلها درت الواجب دزيت تمر وفطيرة وبخور وكيس شوكلاته تحبها غاليه عليها
شعيب : جعفر شن ؟؟
نوري : ماشي يطمن عليها ..حتى نا واسماء بنمشو بعد تبي تمشي تاخذ كسوتها نمرو عليها
غزالة بخوف مهما كان رايفت عليها : يعني مش جايه حتى بعد حددنا الفرح
نوري يمد نقاله : انت كلميها بالنقال ع الاقل
غزالة ب كبر : انا اللي جدتها ..
شعيب يخبط نوري : عليش مشغلتك محامي دفاع نقولك قالت لي نحبه هكي في وجهي
نوري ينظف كتفه : مش خير ما تقولها في قفاك واهي رفضاته انت عليش راقيلك را تقول قلة ادب
شعيب فقد السيطرة ونسى جدته : وقلة تربيه بنت ترفع عينها فيا وتحكي هكي مش متربية
غزالة تذكرت عبدالله وشهقت تبكي
وقف نوري يجيب لها ميه
غزالة : معش تقول هكي يا شعيب الله يربحك
قبل راسها وتندم على زلة : لسانه سامحيني سامحيني ..مش قصدي والله
فكر في عقله كله منها كله منها حتي وهي في حد الدنيا مؤذية البنت هذه وجعفر التعبان شن ماشي يدكك غادي
يامن يطولني رقبتها بس ..
