ميساء :
-الاعراض بلشت عندج من زمان بس للأسف أنتِ
هملتيها لذلك وصلتي مرحله متقدمه بمرض سرطان
الثدي
بلعت ريقي و سألتها
-و شنو هنَ الأعراض البدائيه؟
عددتلي
-اولاً تتكون كتله بمنطقة الثدي تحت الأبط
و ثانياً تصير عندج غدد ليفيه و تكيسات
تحتوي على سوائل
و ايضا عندج انتفاخ من منطقة الابط لحد عظم
الترقوه و هذا هم عارض مهم
ضغطت على صدري تألمت، اردفت
-و صار عندج الم و طراوه غريبه بالثدي
و اشرت على منطقه جانبيه من صدري و ضغطت عليها
بخفه
-شوفي اهنا منطقه قاسيه، اهنا الخلايا المسرطنه
دا تشوفين الشرايين الحمره و النيليه بصدرج هاي كله بسبب الأنتفاخ و الورم
و شوفي الحلمه شلون داخله ليجوه و صايره حمره؟
هاي من اهم العلامات
بلعت ريقي بخوف و الغصه بصدري
-و هسه شلون دكتوره؟
تنهدت
-السرطان واصل مرحله متقدمه و لازملج جلسات
علاج كيمياوي و ان شاء الله بأذنه تعالى نتخلص
منه
سألت بخوف
-زين دكتوره اذا تقدم اكثر شيصير؟
ردت بنبره هادئه مطمئنه
-ان شاء الله ماكو شي و نگدر نسيطر عالورم بالعلاج
الكيمياوي يعني بأفضل الحالات راح تتخلصين منه
و بأسوء الحالات احتمال نسويلج عملية أستئصال الثدي الأيمن حتى ما تنتشر الخلايا السرطانيه بجسمج
او تنتقل للثدي الأيسر
شهگت بخوف هي بسرعه اردفت تطمئني
-لا تخافين ميصير شي ان شاء الله بس لازم نسوي فحوصات اكثر لان الغده خبيثه مو حميده
و على حسب علمي لحد الأن الاسبوع اليجي
لازم تخضعين للعلاج الكيمياوي و تتراوح المده
بين كل جلسه من اسبوعين لتلاث اسابيع و حسب
العلاج و المرحله مالتج
أني ميساء ،ابلغ من العمر عقدين و اربع سنوات، طفولتي جانت هادئه، نشأت بين اب و أم محبين جدا و مسالمين
بابا و ماما نشأو بميتم و حبوا بعضهم و بعمر العشرين تزوجوا جنت اني بذرة حبهم و وره ١٧ سنه جابوا اخويه
براق ،عيشتنه جداً حلوه و بابا ما يوم قلل من شأن امي و لا زعلها بالعكس جنت دائما اتمنى فعلا احصل حب حقيقي مثل حب ابويه و أمي لان حبهم صادق
بيوم بلغ براق عمر السنتين بابا وماما طلعو سوه يشترون مستلزمات عيد الميلاد بس صارلهم حادث
و ماتوا ....
بيوم و ليله صرت اني المسؤوله الوحيده على براق
،بعمر الـ١٩ سنه جنت توني اريد ادخل كليه لان عايده سنه بالسادس تحسين معدل لكن بطلت
جنه گاعدين ايجار ببيت صغير و دافئ و ممتلئ بالحب
و بيوم كلشي راح و تبخر ،صار البيت بارد و موحش
بس ينسمع بي بجيي و بجي براق يريد امي لو ابويه يشيلونه بس ماكو ...
