••مــساعدة الســـــيــد العصــبي••
[الـــجزء الثاني] :🍂أذبــنــي بــرفـــق🍂
الـــبارت :1
على كرسي من الخشب جالسة وسط الساحة ... يدها على خدها وبعقلها لبعيد سارحة ...بعينيها متأملة حشد الطالبات الجامعية وقهقهاااتهم المتعااالية ...وحدة مع صاحبها وحدة مع صاحبتها وهي ديما غير مع راسها ....حنات راسها كي حسسات بالجوع تايقطع مصارنها وكرشها لسقات عليها ...فتحات يدها ضربات ليها صفورية العشرة دراهم فعينيها ...ماكافياها لالططوبيس تمشي بيها ... لاللماكلة تشبع اللي بيها ..رجعات هايمة بتفكيرها حتى وقفات فريفرة عليها مقفزاها بصوتها المجعوق .
"مالك مهمومة ...ماتليك الراجل؟!"
"خلعتيني انهيلة"
جلسات حداها بلا ماتشاورها لايحة بنضرها للعشرة دراهم لي فيدها ...زفرات بغيض وخيزات فيها بعينيها ناطقة بصوت عتابي.
نهيلة:ريحان ...تالين غاتبقاي هكا؟!...تحبسي الجوع فيك باش الفلوس تكفيك...ماتخرجي كي البنات ماتعيشي الحياة غير الهم والغم وقاتلا الوقت بالسكات...واش ناوية تقتلي راسك اريحان؟!
وهي حانية راسها كاتسمع ليها رفدات سبابتها قادات الفولار من حنكهااا وتبسمات بالفقصة.
ريحان:منين غادوز لياااا اختي نهيلة؟!...راه ماكرهتش و مافيدي حيلة ....ماما فالسبيطار تلتسنين هادي ....تكاليف المشفى ومصاريف العلاج والأدوية ...فلوس الكرااا والما والضو والقراية والماكلة واش فنضرك كارهة لراسي شي حاجة؟!
حنات راسها بندم ونطقات بصوت متأسف.
نهيلة: سمحيليا انفاعلت شوية ...كي بقات خالتي الياقوت؟!
ريحان[بألم]: مابقاش ليها بزاف. رشاتلها كليتها....خاصني نوفر فلوس العملية فأقرب وقت ممكن ...!!
تعباو عينيها دموع وقلبها رجف بين ضلوعها كي قالت هاد الجملة .
نهيلة[بشفقة]:الله يشافيها ...والله يعاونك[شافت فيها] ماتبقايش جالسة ...هاد القراية راه مانافاعاك ماعاطياك غير بالمصاريف زايداك ...نوضي قاددي السيفي ديالك تبارك الله راك مميزة من كل الجوانب ...[غمزاتها] وأي شركة غاتقبلك بدون دوارب...يكفي انه عندك عام فقسم التصميم الغرافيكي ...[وقفات]..تبغي تمشي تغداي معانا؟!
ريحان[علات فيها عينيها]:نتي ومن؟!
نهيلة[قلبات عينيها وررقات صوتها]:أنا وياسين.
ريحان[حركات راسها بلا]: غير سيرو بصحتكم وشكراا ...انااا ...خاصني نمشي نشوف ماما .
هزات ليها كتافها مع كلمتين" لي بغيتي" وتحركات.
تأملاتها من الخلف غادا وكاتتعوج وبيدها كاتشير على المسمى ياااسين لي كاتجوانطي عليه الأخت نهيلة من عام ويالله تصاحبو شهر .
YOU ARE READING
أدبني برفق.
Romance••مــساعدة الســـــيــد العصــبي•• [الـــجزء الثاني :🍂أذبــنــي بــرفـــق🍂 🍁•بقلم ملاك هانسل• لم أمسك بالقلم لأقف في صف المبدعين ..بل لأعبر عما يجول في خاطري ...و كلما أمسكت بالقلم ،أرى كلماتي تتراقص شوقا بين أناملي.. لذا سكبتها على أسطري...أكتب...
