تكمله الجزء الاول 👇
ام فاطمـه: للا مو مني يما
فاطمه: بقيت مستغربه معقوله كلام هدئ صح والي ببالي صح؟ بعدت الافكار من راسي وانطيت الاكل لهدئ ومفكرت بالموضوع ورحت اكلت وصعدت للسياره
عبـاس: من اجيت دا اريد احط الجنط فوك لسياره شفت بنيه وبقيت صافن عليها لحد ما صعدت ومن صعدت اني بسياره كعدت اتذكر وين شايفها احاول استرجع ذكرياتي بعدين تذكرت شفتها بفاتحه عمي جانت جايه هيه وامها واختها. رحت راسلت هدئ هدئ تصير بنت عمتي واختي من لرضاعه وكتلها شنو هذا الجمال؟ جنت اقصد البنيه الي عرفت اسمها من هدئ وجان اسمها فاطمه
فاطمه: نمت الطريق كله ووصلنا كملنه زياره وجان الوقت كله يباوعلي بصراحه اني همات نعجبت بي وبشخصيته جان لطيف ومرح وبس يضحك وكلش مبين حباب
عباس: جنت احاول اتقرب منها بكل لطرق بس جانت متنطي وجه ابد وهذا الشي جذبني بيها ونعجبت اكثر
فاطمه: وصلنا كربلاء وبقينا يومين وخلال هاي اليومين تعلقت بي حيـل حسيته قريب مني واعرفه من زمان جان يبتسم بوجهي كل ميشوفني وجانت عيونه تلمع وهوا يباوعلي ✨
خلصنا زياره وطلعنا لصبح نرجع للبيت وجنت الطريق كله ضايجه ومختنكه 💔
هدئ: ولججج جاي اراسل عباس ويسئلني عندج رقم حساب هههه
فاطمه: يمعوده كوليله كلشي ماعدها ماريد ايشي مالي خلك
هدئ; ديراسلني ولفون شوي ويطفئ اني حنام خلي لفون يمج
فاطمه: عافت لفون عندي ونامت وجان عباس يراسل واني اقراهن من الاشعارات جان يدز كليلها شنو اغنيتها المفضله؟ اريد اسمعها
اني احب الاغاني فحبيت ارد علي رديت علي بـ هدئ نايمه
عباس: اها تمام
فاطمه: شفت وغلست ورا شوي دزلي
عباس:عندج اغنيه تحبيها؟
فاطمه:يي عندي
عباس: دزيها
فاطمه: دزيتله اغنيه (شمسين) جانت اغنيتي المفضله كلش احبها
عباس: دزت الاغنيه وسمعتها اكثر من مرا كلش حبيتها وقتها حسيت مشاعري تحركت بشكل فضيع تجاها درت وجها جانت كاعده بالكراسي الوراي بجهه الثانيه وباوعتلها شفتها خجلانه وتباوعلي نص ثانيه وادور وجها كبل اني ابتسمت الها ورجعت اسمع الاغنيه
فاطمه: دار وجها علي وجان حاط سماعات وعيونه تلمع واني حيل خجلت ومكدرت اباوعله
عباس: شفتها بدون سماعه نزعت سماعتي ونطيتها لواحد من الاطفال ينطيها الها
فاطمه: اجه طفل بـأيده سماعه كال بصوت ناصي هاي من عباس
ستغربت وخذتها وراسلته كتله هاي منك؟
عباس: يي مني عيوني خذيها سمعي بيها 💖
فاطمه: مجنت اريد اخذها بس مكدرت ارجعها سمعت بيها كم دقيقه وضميتها بجنطي كلت من نوصل انطيها لهدئ تنطيها اله
راسلني وكال عادي نصير اصدقاء؟
توترت معرفت ارد كتله لا مكدر واني معرفك زين شون اصير صديقي مجرد طلعه وخلاص حنوصل وينتهي كلشي وكل شخص يروح بطريق
جنت اكتب الكلام واني متأذيه جان ودي اكول يي بس تراجعت ورفضت
عباس: جنت ضايج لان حنرجع وبعد مشوفها فقررت اراسلها وكلها نصير اصدقاء راسلتها وكتلها وجان ردها انو رفضت ضجت حيل وقررت انام بالكرسي الي صاير كدامها بجهه الثانيه علمود اكدر اشوفها عدل
فاطمه: ستغربت من كام من مكانه واجه كعد كبالي. وحط راسه عشباك ونام جنت طول الطريق اتأمله وجان شكله يجنن من هوا ونايم وشعرا نازل ع عيونه وكعدت طول لطريق اتأمل تفاصيل وجها وملامحه
عباس: كعدت ع صوت امي وهيه تكعدني
ام عباس; يما كوم وصلنا شبيك خلصتها نوم يلا خننزل. للبيت
عباس: كعدت كبل باوعت لـ فاطمه جانت تباوعلي من شافتني باوعتلها دارت وجها كبل جانت مبين باجيه
فاطمه: جنت طول لطريق ابجي لان دنيا ليل وضلمه وهمه نايمين وطريق طويل جنت اباوعله وابجي لان احس مكدر بدونه تعلقت بي حسيته شخص قربب مني حيل رغم محجينا ولا كلمه طول لسفره بس من راسلني اجاني شعور غريب وهوا طول لطريق نايم ومن كعد لكاني اتأمله واني خجلت ودرت وجهي كبل
عباس; ودعت الي بسياره وجنت صافن بعيونها وهيه هم صفنت بعيوني اول مرا وابتسمت ع الخفيف واني ابتسمت ونزلت
فاطمه: نزل واني ابتسمتله حسيت شعور محلو من نزل كلش اكتئبت 💔
-----------------------------------------------------------
بعد مرور 3 اشـهر ....
يتبععععع
أنت تقرأ
اعـاتبَ طيفـه"!
Romanceبين محاوره القلب والعقل رأيت فيه شي كسرني وجعلني في جحيم هل انسى ذلك أم لا؟ السلام عليكم شونكم بالبدايه اني معندي اي خلفيه عن القصص والروايات بس حبيت اكتب قصه واقعيه ولطيفه وتفاصيل واقعيه يعني القصه حماس 💪🏼فه القصه حتكون عراقيـه حطلع افضل ما ا...
