آه يالدنيا ... عيال عم ولا يتعارفون

الجزء الأول

حمد وحيد ما عندة إخوان وهو ماسك شركات أبوه.. وأبوة مسكه الشغل وهو صغير عشان يتعود على الشغل ويتحمل المسؤولية.
حمد عمرة 24 عاش طيلة حياتة في لندن ودرس فيها الإبتدائى والإعدادي والثانوي وحتى الجامعة درس فيها (جامعة قيونالدهال) تخصص إدارة أعمال..
حمد من نوع الرجل إللى يحب الشغل وعندة الشغل شغل وهو مجد في عملة وهو من النوع المرح وينحب من أول مرة تشوفه والتعامل معاه سهل وحلو..
كالعادة فتح باب المكتب ومشى لين مكتبة ويلس على الكرسي وبعد شوي دخلت السكرتيرة.
السكرتيرة: صباح الخير..
حمد :صباح النور..
السكرتيرة: أستاذ حمد الوالد طلبك على التيلفون ويريدك إسويلة تيلفون ضروري..
حمد: أوكية...حد غير الوالد طلبني؟
السكرتيرة: دق المحامي تيلفون وقال يريد يكلمك بموضوع ضروري.. ووصل فاكس من لندن بخصوص شركة المقاولات ..
حمد: أوكية.. دقي حق الوالد.. وقولى حق المحامي إيي الشركة .. وهاتي البريد..
السكرتيرة: حاضر.. تريد شىء ثاني ؟
حمد : لا مشكورة ..
بعد دقايق خذ حمد تنهيدة طويلة ويلس يقرى ملفات ..
السكرتيرة: أستاذ حمد الوالد على الخط..
حمد: أوكية شكرا.
حمد: السلام عليكم..شحالك الوالد؟.. عساك بخير؟
الوالد: هلا ولدي.. شحالك؟.. أنا بخير وسهالة.. شو أصبحت اليوم.. عساك بخير
حمد: بخير وسهالة ...يعلنى أفداك ...شو أصبحت أنت اليوم ؟؟
الوالد: بخير وسهالة...أمممممممم..إلا حمد بغيت منك خدمة..
حمد : من عيونى..آآآآمر بس أنت وتدلل وفالك طيب..
الوالد: فالك ما يخيب..حمد بغيت أسألت تقدر إسير بدالى لندن؟
حمد: ليش أبوية خير شو هناك؟..
الوالد: ما شىء بس بغيتك أسير بدالى ..وتفتح فرعنا وعندي كم إجتماع هناك.. وما فينى هبة أسير .
حمد: فالك طيب أبوية ما طلبت.. إنزن متى تباني أسير؟
الوالد: فالك ما يخيب.. يوم اليمعة فليل.
حمد :خلاص فالك طيب.. تآمر بشىء غير؟؟
الوالد: سلامتك..والحين ما أريد أخرك فداعة الرحمن..
حمد: مع السلامة والله يحفظك..
بعد شوي السكرتيرة تدق الباب: أستاذ حمد المحامى وصل..
حمد :أوكية دخلية.. وقطعي كل التيلفونات..
حمد :هلا والله شحالك أستاذ خالد؟
خالد:بخير شحالك أنت؟ عساك بخير..
حمد: بخير يعلك الخير.. خير أستاذ خالد من الصبح طالبنى؟؟
خالد: أنا والله أريد أكلمك بموضوع مشروع الفندق ..
حمد: أي مشروع ؟
خالد: مشروع الفندق إللى طلبنا من شركة عبد الكريم للمقاولات تبنية لنا..
حمد :أهاا ..شو فية خلاص نحن إتفقنا علية وعطيناهم صلاحية لبنايته.. وعلى ما ظن الحين يبنونه..
خالد:أستاذ حمد بقولك شىء.. عرفت أن هي الشركة إتفقت على بناية مشروع لخالد مطر
حمد :إنزين شو يعني؟
خالد: هاي الشركة إستخدمت نوعية رديئة في بناية مشروعه وبعد كم من سنة إضطر خالد مطر يعيد بناية مشروعة مرة ثانية.. ويوم خلصت من بناية هذا المشروع إختفت هاي الشركة كم من سنة والحين ظهرت ..
حمد: بس يا إستاذ خالد..أنت قلت لى أنها شركة معروفة ومظمونة كيف الحين تقول هذا الكلام؟
خالد:أنا هذا إلى سمعتة.. أنها شركة ممتازة وزينة ومعروفة بس بعد الإتفاق وياهم سمعت العكس
حمد:إنزين الحين يمكن إللى قالك يجذب عليك ما يريدنا نستخدم هذي الشركة؟
خالد: لا أنا تكلمت ويا محامي خالد مطر وأكدلى هذا الكلام..
دام الهدوء لمدة خمس دقايق ...يلس حمد يفكر شو يسوى..
حمد: أوكية الحين ما نقدر إنكنسل الإتفاقية؟
خالد:نقدر بس الحين هم يبنون من تقريبا أسبوعين ..
حمد:إنزين........؟؟
خالد: نقدر نوقف الإتفاقية بس منخسر شو ..ويتوقف المشروع الفندق ولازم ندور شركة ثانية تبني لنا هذا المشروع ويبالنا وقت ..
حمد: نخسر شوي أحسن ما نخسر المشروع كلة.. خلاص دق حقهم وكنسل المشروع وخبرني على إللى بصير..
خالد:أوكية ..عاد الحين أنا بترخص منك.. شىء في خاطرك
حمد: سلامتك..