نوڤيلا كانت الصدفة حياة ♥️

البارت الثاني (التعارف)

قعدت في اوضتي وعلى وشي ابتسامة غريبة .. ابتسامة مش راضية تتشال .. كل شوية افتكر شكله اللي لمحته يادوب لجزء من الثانية وهو داخل الصالون .. حد يصدق ان فات اسبوع على اخر مرة كان فيها هنا .. اسبوع بابا كان بيسأل فيه عليه ويطمن انه يستحق جوهرة مكنونة زيي .. اه طبعاً اومال .. اسبوع وبلغه بإنه هيكون في انتظاره مع مامته وباباه وأخته علشان العيلتين يتعرفوا على بعض .. ياترى هيحبوني ؟ .. اه طبعاً دا انا مفيش حد يعرفني ومايحبنيش وبجد ربنا يحرسني .. ياترى مامته طباعها عاملة ازاي؟ هتطلع حما من اللي بسمع عنهم وبشوفهم في الافلام والمسلسلات ولا هتكون طيبة زي ماما نونة .. طيب واخته .. ياترى هتكون عمتو الحرباية ولا هتكون صاحبة ليا وأتفق انا وهي عليه لو زعلني ..طول عمري نفسي إن عيلة الشخص اللي هرتبط بيه تكون حباني ومتقبلاني .. يكونوا عارفين اني مش جاية اخطفه من وسطهم ولا عمري هقويه عليهم بالعكس هساعده إنه يكون بار بيهم وابقى فرد جديد في عيلتهم اللي هتحلو بوجودي .. نفس الابتسامة اترسمت مرة تانية على شفايفي وانا بحضن بوكيه الورد البلدي بلونه الاحمر اللي خلى قلبي يدق بسرعة أول ما غرام اختي دخلتلي بيه وخرجت تاني علشان تقعد معاهم على اساس انها شوية وتيجي تناديلي وانا اطلع وانا مكسوفة زي البنات العاديين يعني .. شميت الورد ومليت صدري بريحته اللي أقل ما يُقال عنها تجنن وحسيت بزغزغة بسيطة في معدتي لما قريت الكارت اللي في البوكيه .. لاقيته كاتب "أنا بقدم قلبي آه لو تقبله" .. شكلي هقبله .. فوقت من سرحاني على غرام اللي بتقولي يلا .. يلا ايه .. هو ايه اللي يلا .. بلاش هزار يا جماعة بقا .. بصوا رحوا اركبوا الدودة

غرام: يا بنتي اخلصي بقا

حنين: مش خارجة يعني مش خارجة

غرام: يعني ايه مش خارجة؟ هو لعب عيال؟!

حنين: مش قادرة والله .. رجلي قلبت چيلي بالفراولة مش شايلاني يا روما

غرام: اسندي عليا يا قلب روما

قالتها وهي بتفرد كفها قدامي كأنها بتهاود طفلة صغيرة .. اخدت نفس عميق حاولت اني اهدى بيه خالص وخرجت مع غرام .. ماما قابلتني في الطريق للصالون واديتني صينية فيها عصير وجاتوه .. ايه دا هو احنا مش هنتعشى الاول؟! معلش المعدة كانت مسيطرة على تفكيري في الوقت دا وبصراحة انا مقتنعة بمقولة "ما يعدل الموود إلا الفوود" .. مسكت الصينية من ماما وصوابعها الحنينة دخلت خصلة قليلة الأدب كانت خارجة من حجابي الاسود الستان اللايق جداً على الفستان التركواز اللي لابساه وخصوصاً انه الحزام الاسود اللي على وسطي كان ستان برضو ف كان بكل اختصار مخليني جامدة جمودية الجمدنة .. حطت ايدها على راسي وقرأت المعوذتين وبصتلي بعيون بتلمع بالدموع

ماما: زي القمر يا قلب أمك .. ربنا يحرسك يا رب

قالتها وهربت دمعة من عينيها .. عياط؟! .. انا نقطة ضعفي العياط .. والله لو عيطت ما هتعرفوا تسكتوني .. قربت غرام تلحق شلالات الدموع اللي كانت هتغلب شلالات نياجرا وقالت لماما بهزار