طنط كريمة
روحنا البيت لقينا مفاجأة مستنيانا هناك فى البيت. فاكرين طنط كريمة حسنين السيد متولى مرات أبن عم أبويا فكرينها؟
أم هشام فاكرينوا ؟
الولية قصدى طنط إللى باركت لى وهى مقموصة علشان هشام أبنها جاب مجموع وحش. أينعم هيدخله كلية خاصة علشان هو الحيلة على بنتين ومستقبل الأسرة وعلشان ميكنش أقل من حد فاكرنهم ؟
لأ مش فاكرين يبقي مش قرأتوا الجزء الأول كدة الخبز والملح مش طمر فى حضرتكم. يلا يا بيه منك له لف لفة صغيرة كدة على الجزء الأول وأرجعوا تانى.
أنا وماما وعزة ومعانا بواب العمارة إللى ماما لازم تأخدوا معانا وإحنا طالعين بالأسانسير علشان ماما بتطمن لأنها شايفة أن بواب العمارة رجل خبرة فى ركوب الأسانسير علشان لو لا قدر الله الأسانسير عطل وإحنا جوا يقدر يتصرف أو علشان نتخنق بسرعة ونخلص بدرى بدرى :
ماما بصوت واطى: شبشب مين ده! ده مش شبشبى يوكنش حسين بيخونى!
بواب العمارة: لأ يا مدام متقوليش كدة على الأستاذ حسين وبعدين دى واحدة قريبتكم ببنتها
أنا: ماما ده شبشب طنط كريمة
ماما بصوت أوطى: طب ودى أيه إللى جبها هنا دى؟! وبعدين أنت عرفت منين؟!
أنا بصوت أوطى من صوتها: معرفش أيه إللى جابها دى نقصنها تقعد تفصص الحاجات إللى جيبنها ولا كأننا بنهرب شحنة مخدرات وبعدين عرفت إزاى شبشبها ده مش غيرتوا من صباحية يوسف هو هو زى ما هو بوردته فلوس الشبشب حلال
ماما: الشبشب بس والعباية كمان دى العباية من أيام الدبلوم
البواب: يا مدام عايزة حاجة تانية
ماما: آه نزل شنطة السوق دى بالحاجات إللى فيها عند أم سارة حمات أبنى خليها عندها وأنا هبقى أعدى أخدهم منها.
البواب: حاضر
دخلنا البيت وطنط كريمة رحبت بينا وأستضفتنا فى بيتنا. عادى عادى إحنا متعودين على كدة ده إحنا سيبنا المنوفية باللى فيها علشان نتحرم شوية من طلتها الحلوة قامت جاية كابسة على نفسنا هنا والله ده إحنا لو نقلنا من المجرة كلها هنلقيها برضوا أصل دى منها نسخ كتير بتتكاثر بالأنشطار الثنائى.
أنا عارف إنى نزلت فى نظركم كتير أوى بس أنتم مش حاسين بيا والله دى مش تتعاشر أنا مش عارف جوزها ساكت عليها إزاى تقول له يمين يمين شمال شمال. سبحان الله خالى كان هيبقى مكانوا لولا أنوا لحق نفسه فى آخر لحظة. تخيلوا تبقى مرات خالى مش بعيد تأخد أوضتى وتخلنى أنام على الكنبة لحد ما أبنى عش الزوجية مش بعيد تقسمنى فى العشة بتاعتى!
طنط كريمة: طبعًا أنا عارفة أنتوا بتسألوا أنا جيت ليه.
ماما: لأ يأختى طلما جبتى سما بنتك معاكى يبقى تقعدى وتبرطعى براحتك
طنط كريمة: أصل سما داخلة تالتة ثانوي السنة دى وعايزة يعنى كشاكيلك وملخصاتك نصايحك وكدة يعنى
أنا وماما: يا سلام دى تأمر من عينينا التنين إحنا عندنا كام سما يعنى
أنا سليمان حسين وماما ليلى يوسف وأخويا يوسف حسين. بس فى أوروبا والدول المتقدمة الشخص بيتنسب لأمو ولأن جوز طنط كريمة إللى معرفش أسموا أيه ( والله ما عرف أسمو بجد قرايبنا بيقول له أبو هشام ف رحلت البحث عن أسم جوز طنط كريمة الملقب ب أبو هشام ك معرفة هل الزمالك معمول له عمل ولا لأ ) اوبن مايندد اوى ومتحضر سايب عياله يتنسبه لمراته
هشام كريمة
أسماء كريمة
سما كريمة
ف سما بنت طنط كريمة دى ونعم الناس. أنا وأمى شاكين أنها تكون بنتها أصلاً وأخت هشام بنت مصروف عليها بجد
محترمة مؤدبة بنت ناس جدًا شاطرة جدًا جدًا كل سنة بتطلع من الأوائل ما شاء الله عليها غير كمان أنها جميلة جدًا جدًا ومش أخبى عليكم الصراحة أنى معجب بيها علشان كدة ولو ختوا بلكوا أنى قولت ليكم أنها هتقسمنى فى العشة علشان إن شاء الله هتجوز بنتها.
رحت الأوضة بتاعتى أنا وعزوز ( عزة أختى وده كان اللقب بتاعها فى الجزء الأول) وسما
وفتحت الصندوق الأسود لتاريخ المهبب ثانوية عامة مع أغنية بنتى وحبيبتى لمدحت صالح فى الخلفية.
فهمتها كل حاجة وأنها مش تخاف هى شاطرة ومجتهدة ولو الأمتحان صعب ف هيبقى صعب على الكل ومع ذلك التنسيق هينزل ف مش تقلق
كل كلية وليها عدد محدد لازم تأخدوا يعنى أوائل الجمهورية جايبين ٥٠٪ هيأخدوهم وهكذا سألتها أكتر حاجة مدايقها أيه قالت لى: الحجز بتاع الدروس والسناتر يعنى مثلاً:
تعلن أ/ سما
عن بدأ حجز ٨/١ عن المراحل الأبتدائيه والأعداديه والثانويه والكليه والحربيه
شرح جميع المواد الي خلقها ربنا
هتتعلم ازاي تروح المريخ بالصواريخ
ازاي تدخل طب من ادبي
اتيكيت اكل العنب والبطيخ
فنون الرد ودشملة الاخرين
كورسات مكثفه لتعليم الطب في3 ايام
شعارنا اهبد ب ايدك محدش هيفيدك
الحجز بعد العصر في الطراااوه
ربنا يوفق جميع الطلاب
بيأڤوروا يا سليمان فاهم والدنيا زحمة أنا أيه إللى يخلينى أتشحطت فى حلوان ولا فى السيدة ولا فى أي منطقة وفى مدرسين جمب البيت وبأسعار حنينة وقمة وقامة وخبرة يعنى مثلا المدرس الفرنساوى بتاعى ٥٥ سنة ومدرس فى مدرستى وراجل جبار فى الشغل والشرح ومع ذلك إحنا ٣ بس ومع ذلك إحنا مش زى بعض ف المدرس مجرد وسيلة مساعدة المدرس مش فى أيده مصباح علاء الدين ده الطلاب
والطلاب زى البطيخة يا تطلع حمرة يا تطلع قرعة وأنا برضوا مقتنعة أن فى مدرسين ضعاف فى أسألتهم فى مذكراتهم بيسبوا حاجات مش بيشرحوا
بس دول قلة يا سليمان مفيش حد بيأذى نفسه فى أكل عيشه.
عندها حق الصراحة ما عدا حتة الدرس فى حلوان دى
أنت تقرأ
الحياة في نظر طالب جامعي
Humorأنا سليمان وطبعًا قصة كفاحى التى تشبه قصة كفاح الحاج عبد الغفور البرعى فى رحلة الثانوية العامة شرحتها فى الكتاب إللى قبل الكتاب ده. إللى فات حمادة وإللى جاى حمادة تانى خالص. وآه لازم تقرأ الكتاب إللى قبله ليه؟ ١- علشان معظم الشخصيات كانت موجودة برضو...
