قطرات المَطر الخفيفة ونسمات الهواء المُنعشة التي تقوم بتحريك أوراق الشجر مع الرائحة العطِره والطيبة، الطلاب والطالبات بكل مكان اصوات ضحك تعلوا الإرجاء والقهقهات وأيضا المُحادثات والمُشاحنات وغيرهم يقومون بالدراسة...
2022/2/1 يوم الثلاثاء
تبارك: اليوم الجو كُلش حلوو بس شتمي ريحة الرطوبه
أيه: يمعوده وين اكو متت برد ماحب الشتا ماحبهه
تبارك: ايعع محبين الصيف والدبگ هههههه
ايه: ايع محبين الفلاونزه والطين ههههه
تبارك: عابتلج، ديلا امشي حننطرد من المحاضرة اذا تاخرنه
ايه: خوش، دنمشي وذكرناها، ثوانييي حلا وين؟!!
تبارك: ماعرف اتصلت عليها لحد ما تشنج اصبعي وماكو رد
ايه: هي دومها هيج ضايعه ومضيعتنه
تبارك: امشي عادد هذا شيسكته اذا فتح حلكه
.
.
.
جانت كاعده بنفس المكان الي غيرها، كل يوم الصبح لازم تزوره، المكان الي نكسرت بي وماتت احلامها وحبها ومشاعرها الي تجردت منها كل شغله كانت تحبها، اجاها اتصال صحاها من صفنتها
: الوو وينج يمعوده ترا راحت عليج المحاضرة وسجلو غياب
: جايه، سدت الخط وطلعت دفتر ملاحظاتها وبلشت تكتب وتسمع اغنيتها الي دائما تستمعلها
" اذا تحبني صدك جاوب عليه"
"شكد محتاجلك لو تدري بيه"
بلش القلم ياخذ طريقه على اوراق دفترها
"هنا ودعتُ نفسي وقلبي واول كلمة أحبك واخرها
هنا كبرتُ لسنوات في ساعاتٍ قليله وانا أنظر لخطوات قدميه المتباعدة، كانت كل خطوه يخطوها بعيداً عني يكبر معها عمري، هنا رميت حُبك ومشاعري وكل كلامك"
" اريد ارتاح تعبني غيابك"
.
.
تبارك: بلشت محاضرة دكتور كرم وحلا للان ماكو وبالي يمها طبعاً دكتور كرم ميفشل اي طالب بس اذا عصب ياويله الي يوكف كباله، جنه كاعدين وديشاقه ويانه ويسولف وهنا ندكت باب القاعة ودخلت ست الحسن حلا، طبعاً حلا اسم على مسمى كلش حلوة جسمها رشيق لان تحب الرياضة وجانت تريد تحقق حلم والدها وتدخل كليه عسكرية بس فجأة غيرت رأيها ومصارت وجتي طب، شعرها الاسود نازل لحد خصرها ووجها الناعم ورموشها تموتت نصيحلها اني وايه مكناسات هههههه
حلا: أسفه على التأخير
كرم: الناس دكول صباح الخير، كالعادة عافتني وكعدت بمكانه يم الشباك وتباوع على البرة مرات احسها محبوسه حالها حال السجين من يباوع على العالم الحُرة تريد تتحرر بس من شنو ما اعرف حلا الطالبه الوحيده الي متقبل مساعده من احد ولا تحب احد يتقربلها غير بس تبارك وايه
ايه: لج وين جنتي دكتور يوسف متحلفلج هاي خامس محاضرة متحضريها اله
حلا: اكلج اليوم بابا ميكدر يجي ياخذني فحرجع وياج
ايه: شوف الكائنات اني وين احجي وهي وين
اكللها احمر دكلي بنفسجي
كرم: اذا خلصتن سوالفجن عادي اعلن الدرجات لو سمحتن ههههه
ايه: لا دكتور تريد تشهرنه ترى ستر المسلم واجب من الإسلام
تبارك: ايه هي سكرة الشله مالتنه لو جنه بعز القهر والضيم تضحكنه بايعه الدنيا ومشتريه راحتها وهمها الاول والاخير الاكل والطلعات، يعني متعرفين شويه تسكتين اله تجفصين؟؟
كرم: ماطول كلتي هيج فهاج درجتج اول وحده ماخذه ١٢من١٥ زينه بس يرادلج قرايه اكثر من الاكل والستوريات ههههه
خلصت توزيع الدرجات ووصلت لورقة حلا
حلا علي هي اعلى وحده بالقاعة عفيه تفضلي ست حلا
حلا: شكراً، اذا خلصت المحاضرة اكدر اطلع؟
كرم: تفضلي تكدرين
حلا: اكثر شي احب اسوي بوقت فراغي اروح لقاعة التدريبات احب اغني بس ما احب احد يسمع صوتي واغني كلشي، جانت القاعة كل اضلاعها عبارة عن مرايه وبيها ادوات عزف وديجي شغلته ونصيت الصوت كعدت اباوع على نفسي ملامحي تعبانه بسبب السهر بلشت اغني بدون وعي..
"لا تمشي لحظه انتظر خليني اودعنك
شيقنع عيوني بعد ماراح اشوفنك
خليلي منك ولو ذكرى احتفظ بيها
يلفاركتني مثل دمعة وبجتها العين
لو نفترض..بهذا السطر وكفت لان ماريد مثله ولا اريده بس مدا اكدر اتخطى شلون كسرني وكسر كلشي بيه
ايه: وأخيراً لكيتج ولج حتموتيني امشي بابا ينتظرنه
حلا: تمام جايه
.
.
.
يوسف: يلا دكتور نطيني الورقه عاد
محمد: بس كلي ليش
يوسف: اريد افصل هاي الطالبه صار خامس محاضرة متدخل
كرم: لا لتفصلها نطيها فرصه واني باجر احجي وياها يجوز عدها ضرف طارء
محمد: دكتور كرم ليش متعاطف ويه هاي الطالبه؟
كرم: اني متعاطف ويه جميع الطلاب، همه أمانه عندي
يوسف: يمكن لان قريب على اعمارهم ههههه
كرم: ههههه يلا اودعكم حروح للبيت خلصت محاضراتي
محمد: الله وياك
يوسف: في امان الله بويه
كرم: صعدت السياره واجاني إتصال من المستشفى نسيت اليوم عندي خفر ولازم اروح الطريق كله افكر بحلا احس اريد اساعدها بس هي متقبل احد يدخل بيها دائماً نظراتي عليها ما اشوفها تضحك ابد بس لما يتصل والدها او تشوفه هي كلش متعلقه بي الظاهر، طلعت اغنيتي الاحبها وعليتها وبلشت ادندن وياها " حبك ضيعلي عنواني عشت وياك بعالم ثاني.."
.
.
حلا: دخلت للبيت شفته واكف بالحديقه رحت حضنته وبسته بابا كلش غالي عليه ومتعلقه بي مثل الطفله وهو هم ابد ميعوفني صار اليه عائله كامله وصديق مو بس علاقة أب وبنته من جنت صغيره يعلمني على الصح والغلط ويقوي ثقتي بنفسي وميقبل ابجي كدام احد نهائياً، اي عيني علاوي ليش مجيتني اليوم مو تعرف اني احب ارجع وياك
علي: حبيبت گلب ابوها، اليوم شويه تعبان
حلا: شنو بابا شبيك لدكلي اكلت شي حلو
علي: لا حبيبتي ما اكلت شي وهسه اني صرت زين من شفت حلاوتي، يلا تعالي ندخل جوه
حلا: هاي شنو شوف منو يمنه اليوم عيني عيني
رانيا: تعالي عيني سويتلج البرياني التموتين عليه
حلا: لكم يا هيج الخوات يابلاها ابدل واجيج طلقهه لان ميته جوع
رانيا: ديري بالج دكعدين ليلو عوفيها نايمه تعبتني
حلا: شنو ما اكعدها بكيفج قابل غير مشتاقتلها وثانياً كتلج لدلعيها هيج ايعع، دخلت للغرفه شفتها نايمه على جربايتي يُمه اموت عليها، اني عندي عائلتي خط احمر وكلش احبهم وبعد وفاة والدتي الي هي جانت كسرتي الأولى صرت ما ابين شي لبابا لان اخاف عليه وبس اني وياه بالبيت مرات تجي رانيا وبنتها إلينا ومعتصم اخويه اصلا معتصم نشوفه بالسنه حسنه بسبب شغله وهو هم ملتهي ويه مرته وجهاله ، يُمه حبيبت خالتها الحلوة شنو تردين تنامين وتعوفيني كومي ناكل يلا يلا كومي، حدغدغج ترا ههههههه
إلينا: لا لا هلا كمت كمت هههه عوفيني عوفيني هههه
حلا: لج حتى اسمي احبه منج يروح هلا هههه
.
.
حلا: صار الليل واجه احمد اخد رانيا وإلينا واني كعدت ويه بابا شويه لحد ما نام ورحت لغرفتي جنت لابسه بيجاما عريضه وفانيلا ضيگه احب هيج لبس مُريح واشيل شعري كعكه واكعد يم الشباك احب نسمات الهوا من تتلمس وجهي كلهم يعرفوني اني ما انام واعاني من الارق من وفاة ماما فأضل طول الليل اما اقرا ومرات اروح يم بابا متعودة اللعب بكف يده لو اخليها على خدي، كملت قرايه ورحت يم المرايه وذكرت اغنيه إليسا يامرايتي، بابا ورانيا يقنعوني اروح دكتور نفسي بس اني ما اقبل احس انو محد يكدر يصلحني، خسرت هواي اشياء بحياتي حلمي الي جنت احبه وحضن ماما والشخص الي حبيته من كل گلبي، سمعت صوت التليفون يدك ستغربت طلعت رانيا وهي قبل كم ساعة جانت يمنه وبهل وقت المتاخر
: الو هلاو حبيبتي، اسمعها تصيح وتبجي اريد بس افتهم كلمه وحده...شبيج رانيا فهميني شكو احجي
رانيا: حلا الحكيلي بنتي راح تروح مني هسه تجيني هسه جيبي سيارة بابا وتعالي احمد راح طلع واجب قبل ٣ ساعات ومحد يمي
حلا: هنا احس كلشي وكف عندي تخبلت كلشي ولا يصير شي لإلينا، سديت الاتصال واخذت مفاتيح السيارة وطلعت حتى نسيت اغير ملابسي واكعد بابا...
.
.
.
.
.
خلص البارت الاول وهذا اول بارت اتمنى انو يعجبكم
صراحه هل روايه احسها كلشش حلو لان حيصير احداث حلوة راسمتها بالي
اعرف بيها هواي من مقططفات الاغاني بس هي حلا تحب الاغاني ..
اتمنى محد ياخذ تعبني او يسرق فكرتها وسردها
يلا بيباي القاكم في البارت الثاني 💗💗
كانت معكم بَتول آل علي
أنت تقرأ
خفــايا القدر
Romanceجميعُنا نحاول الهروب من الماضي من شيء استنزف كل طاقاتُنا الى الحد الذي جعلنا اشخاص اخرين أشخاصاً غير معروفين وغير قادرين على معرفة انفسهم فكيف للآخرين من معرفتهم ليله واحده كفيلة بتغيير الشخص من مرح ومُحب للحياة الى شخص يعيش لا يعرف نفسه وطريقه.. ش...
