رواية نصيبي اتى بك 🤍
للكاتبه : ويسي المسماري
الحلقه العاشره 10
السلام عليكم اسفه طولت عليكم معش عندي شغف نكتب مش عارفه ليش حتي بديت ننسي الاحداث بس جيت عشان خاطركن 🤍
حوراء تحكي لخواتها /نا مش قاهرني شي غير انه اطلعت من اول اسبوع الباقي ساهل وعادي
حور /انتِ مش اول وحده بعدين اطلقتي بس فاتحه هكي احسن من انك في حوشه
نور /صح وكفاية خوف من المجتمع كانو عائله ثقيله وبيئه
حور /حرفيا كنت متحشمه انقولها
حوراء /وخواته ثقيلات دم ومسقعات
نور وحور😂
نور / هذي اختي الكبيره
شافتلها حوراء وبتسمت
حوراء تحكي مع روحها بيني وبين نفسي كنت فرحانه انه سيبنا كنت صح خايفه من كلام المجتمع واني اطلقت بدري بس كل مانذكر انه قعد عندي فرصه مع منذر حتي وهوا مش قاعد بس مش فاقده الامل انحس في يوم توا يجي ونقعد معاه وعندي شغف اني ندعي
(أن لم يكن لدينا نصيب فيمن نحب فلماذا جمعتنا الصُدفه ؟!!!
.
.
.
مرو الايام وكانت حالة حوراء اتزيد اتحسنن وطلعت من الجو الي هيا فيه وزادت تعلقت بربي وتدعي وتصلي انه ربي يجبر خاطرها ويجيبلها منذر بالحلال وتكمل معاه حياتها
.
نور خشت للدار رن تليفونها /ألو ي عمري
/اهلين فيش اديري رايفتلك
نور ابتسمت /وانا
/كل عام وانتي بالف خير عيد ميلادك اليوم صح
نور /تعرف نسيت من المشاكل الي صارت بكل
/نا مننسكش
نور ابتسمت
/قتلك جايكم وجايب معاي امي تبي امك
نور / امي قالتها قالت انها تبي تجي تسهري عندنا هي وندي
/اها قتلك نبيك تطلعيلي نبي نعطيك حاجه
نور /توا نشوف تمام
.
طلعت برا للصاله وهي متوتره وقعمزت جنب امها وحور كانت مصبيه تبخر فالحوش وتلم
نور /من جاي غير خالتي تهاني وبنتها
كريمه /جايه معاها نورا
نور /اها باهي كساد يغيرنلك جوك
اشوي ورن الجرس مشت نور فتحت لقت خالتها عند الباب سلمت عليها وخششتها وخشت للمربوعه وفتحت تليفونها لقت رساله من ولد خالتها أكرم /اطلعي
مشت طلعت لقاته فالحاجر قاعد جايبلها باقه ورد وكيكه
نور ابتسمت /شكراتعبت روحك اتهبللل
أكرم /اهم شي عجباتك المفاجأة
نور / اتهبل بكل
أكرم ابتسملها بعدين طلعلها سلسله
نور عيونها يلمعو :اتجنننن
أكرم ضحك /تبيديها بالهنا ان شاء الله
وينفتح الباب من وراهم يخش خوها ناصر ووراه خالته نورا كان ماشي يجيب فيها
ناصر /فيش اديري انتي هنا وانتَ ايش خششك
أكرم / اصبر اشوي نتفاهمو
ناصر / شن انتفاهمو تخطب مثلا بالسر اشرحي
نور /اااا
عطها ناصر كف /خشييي جوااااا
نور خشت تجري وهي تبكي بعد ما طيحت الكيكه من يدها
نورا /هدو ي عويل مش هكي اكيد مافيش حاجه اكيد دازه عليهن تهاني هذني
أكرم / لا مش دازه عليهن امي نا جبتهن لنور ونا نبيها وشاريها
.
.
جوا خشت نور تجري تبكي لقت امها وخواتها وخالتها صبن من الصوت كريمه /كنك ي بنت
نور تبكي بأحراج
ويسمعو صوت اعياط نورا تقول /تعالي ي كريمه اجريي العويل يضاربو
طلعن حزو عليهن وطلع اكرم روح وناصر خش يجري الحوش لقا نور قافله ع روحها باب الدار /افتحي ي نور راه نكسره ع راسك من ايمتا دايرينلي اقرون
كريمه جت / حول ي ناصر الله يهديك سيب البنت في حالها
ناصر / يمي خليني نفهم ويدلف ع الباب ويهزب فيها افتحي وعطيني التليفون توا ي نور
تهاني /حقك علينا ي ناصر وحق حكالي اليوم أكرم ونبو نخطبو غير وسع بالك واطلع
ناصر ولا كأنك يسمع يفش في غله فالباب لعند انكسر وفتح لما فتح لقا نور طايحه ع الارض انفجعو
كريمه / يانعلي ي بنتي ووك
ناصر طلع وركب فالسياره وعدي بعد خذا تليفون نور ومسكه وكسره بعد شاف اخر مكالمات
.
.
.
طلعن بنور فالصاله كريمه /عدي جيبي جهاز الضغط
عدت حوراء وهي منخلعه/ اهو
صبت نور بعد غسلولها وجها
كريمه تذكرت الي داراته بنتها / الله يكشف بيك هكي اديري في خوك ي الهبله
نور ساكته
نورا / ساهله ب كريمه ياما يديرن البنات عادي ولد خالتها وتوا ياخذها
تهاني / وسعي بالك ي كريمه متهزبيهاش
حورجايه وجايبه معاها عصير /هاكن اشربن بعد الدراما هذي كلها
ندي / عطني وحق الله الساني نشف
نورا / عدي جيبيلنا كيكه نور الي طايحه بصندوقها برا
ضحكن كلهن معادا نور ساكته بأحراج
كريمه / خطرها عليش جايبها لك
حوراء/ عيد ميلادها اليوم
نورا / هابا منه جيل توا
خشت حور بالكيكه تضحك وبالباقه/متتت ذوق ولد خالتي وعزقت الباقه ع نور
وخذت الكيكه وكلنها وهن يضاحكن بعد ما تخطت كريمه الموقف
نورا / تعرفن ربما ذرتن نافعه كان ما انكبست نور راه ما حقينا الكيكه لا كلينا
حوراء / وحق الله
كريمه / ايواه راهي كلتها بروحها وركبها السكرعقبي منها طرف لناصر عشان يحق الكيكه ويعطيها طريحه اخرا
ندي /نعلي وسعي بالك ي خالتي
كملن عشيتهن علي نور يتهزن عليها وهي مصدومه بعد الي صار
.
.
.
.
حوراء
روحن خالاتي من عندنا بعد فضايح نور وامي مسكت اختي نور تهزب فيها وتسئل من ايمتا الخبر هذا وتعشينا وناصر خوي مازال ما روح سيبت حور تغسل فالعوايز وخشيت تمددت في سريري فتحت الفيس وقلبي يدق عارفين شعور لما يقعد لك فتره مافتحتي الشات وتحسي انك توا تلقي رساله من شخص عزيز ع قلبك بس فجأه يخيب ألامل هذا .
فتحت الفيس لقيت اربع رسائل من منذر من الصدمه كذبت اعيوني شن يبي جاي لي لحظه كنت ح نضعف بس تذكرت انه هوا الي قالي عدي وتزوج وكيف كسر خاطري سكرت التليفون بسرعه كأني كنت نسرق وحطيته تحت المخده وطلعت برا للصاله عارفين شعور لمًا تقعدي متلخبطه وتحسي روحك اطيري من التوتر ومش عارفه شن اديري وتحسي تبي تمسكي حد وتحكيله شعورك بس متاكده انه مافيش حد يفهمك هذا بزبط شعور حوراء .
بعد تقلبات المشاعر هذني كلهن خشت عليا نور للدار رقدت ونسمع فيها مره مره تشهق وحشت حور بعد كملت حوستها وقعمزت ع السرير جنبي وشافتلي وقالت /كنك ي حوراء
حوراء /نحكيلك
حور ضحكت /كنك بسم الله شن صاير
حوراء /منذر
حور /القديم هذك
حوراء /بزبط خش عليا ومش قادره نفتح الرسائل هاكي ردي عليه انتِ
حور / عطيني فتحت التليفون لقت منه اربع رسائل فتحتهم
حوراء خذت التليفون منها /وقرتهن معاها
كاتبلها
؛حوراء
؛توا تقولي شن جابك
:بس نبيك في موضوع مهم
؛عطيني فرصه اخيره
حوراء خذت نفس وكتبتله
حوراء /شن تبي ي منذر بعد الوقت هذا كله كم مره تبيني نعطيك فرصه الفرصه ضيعتها المره الي فاتت بعد تخليت عليا
منذر كأنه كان ع دردشه رد دغري
منذر / نبي انكمل معاك ي حوراء نبي نكمل الي وعدتك بيه
حوراء / شن تبي تكمل اشرحلي ع اساس بينا اسنين الي قعدته معاي اقل من الي رجيتك فيه مليت خلاص راه
منذر / تبي تقنعيني انك متبينيش حوراء نا طول الوقت نفكر الي حسيته معاك محسيتش مع اي بنت
حوراء معش ردت
منذر / اسمعي نقولك عارف الي صار معاك كله حوراء
حوراء/شن عارف
منذر / قصة طلاقك كنت نحسابك خلاص تبي تزرجي وتعدي بس بعد لقيت فرصه مستحيل نضيعها عرفت انتِ شنو بالنسبه ليا بعد عديتي حوراء عطيني فرصه
حوراء/ شن تبي ادير فالفرصه هذي بعدين من قالك هلي يرضو
منذر / يرضو انا متاكد
حوراء / مكنش هكي كلامك قبل
منذر /غيرته روحت لبنغازي سيبت اجدابيا رديت فتحت المحل والباقي كله ساهل صدقيني اهم شي نكونو مع بعضنا
حوراء / نبي فعل مش كلام زي الي قبله وقبله وفجأه نلقاك مش قاعد
منذر / المره هذي قد كلامي وعارف حتي حوشكم ونجي رسمي الاسبوع الجاي
حوراء/كيف
منذر / توا نقولك ع يوم بس انظم الامور مع امي قاعده فجدابيا
حوراء /قصدك حكيت لامك
منذر / اها كل شي اخرا
حوراء قريب تنجلط من الصدمه وحور معاها بس فرحانه لاختها الي حست بيها فرحانه من كلام منذر
حور / اسمعي قوليله معش تحكي معاي لعند ما يقعد في شي رسمي وتمسي ع خير
حوراء / لالا فكيني توا يقول ما صدقت
حور / كذا سكري فمك واكتبي زي مانقولك
حوراء /باهي كتبت الي قالتلها عليه حور وسكرت النت
حور / خليك هك لعند نشوفو كلامه كلام وهمي ولا يحكي جد
حوراء ضحكت بفرح
.
.
.
.
.
يتبع
شن اتوقعو يصير مع حوراء وهل منذر صادق بكلامه
وهل أكرم يخطب نور جديات وشن يدير ناصر !
ان شاء الله تكون عجبتكن الحلقه ❤️
@enas_almsmire حسابي ع الانستا ❤️
