*
وجن امتحاناتها حقت الشهادة قربت ف كانت خايفة شديد وعلى طول متنشنة وفي حالة بكاء ـ انا كنت بشجعها وانها م تخاف وكنت براجع ليها الإنجليزي والعربي أما كريم براجع ليها الفيزياء والكيمياء ـ إجتهدنا معاها شديد لحدي م جات فترة الامتحانات ـ عيبها انها بتساهر وقدر م حاولنا معاها عشان نمنعها من السهر م قدرنا بالزات يوم امتحان الكيمياء دة خلت البيت كلو يساهر معاها جرسة شديد البت دي هههههه. ـ والحمد لله امتحاناتها عدت على خير ♥
لما أجزت ابوها جانا وسلم علينا وطلب من بتو تجي تقضي معاهم الاجازة وتكون جمب اخوانها ـ في البداية رفضت إنها تمشي بس بعد تعب واقناع من ابوهاوافقت ـ أمي م كانت عايزاها تبعد عننا بس كمان دة ابوها ومن حقو يسوق بتو ويقضي معاها وقت ـ فقالت ليها لو في اي لحظة حسيتي روحك م مرتاحة اتصلي وكلميني وانا بيدي بجي بسوقك تمام ـ وجن قالت ليها حاضر ماما ...
جامعتي فتحت ونزلتة السمستر الاخير ,إتعصرتة فيه شديد والله مع جري البحث والتعديلات والقراية عيني دي طلعت ـ بس الحمد لله خلصت وعدت على خير ـ اتخرجت بمعدل امتياز ♥
رقية :يارسيل بعد بكرة انا وابوك حنسافر رفاعة حبوبتك عيانة شديد وماشة اشوفها واتطمن عليها
رسيل:سلامتها ي رب مالها عندها شنو
رقية :قالو ضغطها ارتفع و وقعت فجأة ودوها اامستشفى ومرقدة من امس..
رسيل :كفارة ليها ـ امي خليني امشي معاكم عليك الله
رقية :ماف طريقة ي بتي اخوانك براهم في البيت ولو مشيتي معاي منو الحيطبخ ليهم عشان كدة اقعدي ..
رسيل :طيب تمام ي امي بس طمنيني على حبوبة بعد تصلو ..
بعد ماما وبابا سافرو البيت بقى مسيخ واليوم كلو بكون براي من الصباح لحدي العصر ـ كريم برجع بدري من شغلو عشان انا براي في البيت ـ وكرم طبعا يومو كلو برة البيت وبرجع مرات لنص الليل ـ كريم على طول بشاكلو انو م يتاخر للزمن دة بس هو راسو يابس وم بسمع الكلام...
يومي كلو مقضياهو قراية روايات وتلفزيون ولمن افتر بنوم ـ كنت بفتش لي عن رواية إسمهاThe great gatsbyورواية تانية اسمها one hundred years of solitudeفَ دخلت في القروب تبع الانجليزي قلتة ي ريت المعاهو الكتب دي يحولها لي ـ بعد حوالي عشرة دقايق واحد دخل لي خاص وقال لي الروايتين ديل عندي ليهم كتب ورقية اشتريتهم العام الماضي فلو حابة ممكن تجي تستلميهم مني تقريهم وبعد تخلصي ترجعيهم ـ انبسطة شديد لاني بفضل قراية الكتب الورقية افضل لي من قراية التلفون ـ الصدفة الحلوة طلعنا ساكنين في نفس المدينة والحي الساكن فيه قريب من حينا ـ قال لي عايزاهم متين ـ قلتة ليه لو فاضي ممكن بكرة اجي استلمهم ـ قال لي طيب تمام بعدها اتفقنا على المكان الحنتلاقى والزمن عشان اجي استلم الكتب ..
بالمساء كريم لمن رجع من شغلو سخنتة ليه الغداء ومشيت اوديهو ليهو في الصالون ـ اثناء م كنت عايزة ادخل سامعاه بحكي بالتلفون وبضحك ـ كان بحكي مع وحدة وبقول ليها :إنتِ عارفة إني اشتقتة ليكِ والله ماقادر اقعد من دونك وبعدها خفض صوتو وبتكلم بصوت واطي شديد م قدرتة اسمع الباقي ـ دقيت الباب ودخلتة عادي ـ لما شافني قال ليها يلا تمام لبعدين برجع ليك وقفل ..
كريم :كيف قيلتي اليوم
رسيل :الحمد لله كويسة بس اشتقتة لامي قبيل اتصلتة ليها وقالت احتمال ترجع بعد يومين لانو حبوبة حالتها ماشة في تحسن ..
كريم :ايواا يصلو بالسلامة ان شاء الله
(بعدها سكتنا )
رسيل :كريم بكرة حأمشي استلم كتب من واحد
كريم :كتب شنو
رسيل :هما روايتين كنت بفتش عنهم وفي واحد قال عندو النسختين حيديني اقراهم وارجعهم ليه
كريم :اها وبتعرفيهو?
رسيل :لا م بعرفو معرفة شخصية معرفتي بيه عن طريق قروب حق انجلش في التلقرام
كريم :ايوا ـ حتتلاقو وين
رسيل :في كافيه المكتبة ـ المحل الفتحوه جديد
كريم :طيب ـ مجرد م تستلمي منو الكتب ترجعي تمام
رسيل :اكيد طبعا ...
خلصنا اكل ـ رفعتة العدة غسلتها وعملتة ليه الشاي ومشيت غرفتي ,قعدتة افكر ي ربي دي منو البت البتكلم معاها كريم وكمان بقول ليها اشتقتة ليك ـ جاني فضول شديد إني اعرف حبيبة كريم دي ههههههه ...
تاني يوم الصباح صحيت بدري نضفتة البيت كلو وبخرتو ـ بعد خلصتة عملتة ماسك في وشي وعروكة لجسمي ـ بعدها استحميت وعملتة لروحي الفطور ونمتة صحيت لقيت الضهر اذن ـ صليت وشفتة الساعة كانت واحدة ونص ـ الساعة2مفروض الاقيه لانو دة الزمن الاتفقنا عليه ـ لبستة عبايتي البنفسجية ومعاها اسبورت افوق وايت وشنطة صغيرة ـ عملتة كحل ولاينر بس وطلعتة ـ لبستة الكاب حقي طبعا اهم شي في الشمس الحارة دي ـ كان في زحمة في المواصلات بعد تعب حتى ركبتاـ في المواصلات اتصل لي وقال انو وصل منتظرني قلتة ليه انا قربتة في المواصلات حاليا ـ لما وصلتة الساعة كانت 2وتلت ـ اول م دخلتة الكافيه اتصلتة ليه وقلتة ليه انا وصلت وحاليا انا جوه الكافيه قال لي دي انتي اللابسة عباية باللون البنفسجي? قلتة ليه ايوة ـ قال لي يلا انا علي يدك الشمال اخر تربيزة ـ قبلتة عليه ولقيتو رافع لي يدو
يتبع....
