بعد مرور سنة كان جريح وحازم جهزو الشقق اللي هيتجوزو فيها وحددو ميعاد الفرح بعد شهر، وقررو يعملو الفرح مشترك في قاعة ف اسكندرية، بدأت الحجوزات وجه اليوم اللي هيشترو فيه الفساتين و.
نرمين وهي بتشاور على فستان: هاخد ده
جريح وهو يهز رأسه بإيجاب: إن شاء الله
نرمين على فستان آخر: عايزة ده
جريح بلامبالاة: بكرة
نرمين على فستان تالت: ده عجبني
جريح: عند الست الوالدة
نرمين على فستان رابع: جميل صح؟!
جريح بموافقة: ااه
نرمين بفرحة: طب يلا ندخل عشان أقيسه
جريح وهو يهز رأسه برفض: هو جميل بس مش ليكي للأسف
نرمين بغيظ: ليه إن شاء الله؟!
جريح: مفتوح
نرمين بضيق: يووه أختار إيه طيب؟!
جريح مسك فستان وقال: شوفي ده كده؟!
نرمين وهي بتقلده: لا مش حساه
جريح بغيظ: معلشي حسيه
نرمين برفض: مش قادرة لا
جريح بإصرار: طب ده عجبني
نرمين بتصميم هي الأخرى: مش عايزة الفستان ده الله
جريح بعصبية: وطي صوتك أختي عشان عاقلة خلصت اختيار فستانها من سنة وإنتي عشان غبية محتاجة سنة تانية
نرمين وهي بتربع إيدها بغيظ: والله مش عاجب حضرتك اهرب من دلوقتي
جريح بضيق: بعد إيه بقا؟! اتحسبت جوازة للأسف
نرمين: إنت اللي غلطان، كنت اختار صح من الأول
جريح وهو يهز رأسه بإيجاب: معاكي حق
نرمين بصدمة: ي نهارك أبيض معايا حق!! دا بدال م تقولي إنتي أعظم اختياراتي وإن مفيش صح من بعدي!!
جريح بملل: سلميلي على النكد
سكتت نرمين بغيظ وكملو لف لحد م اختارو فستان نرمين حسته زي م قالت ل جريح
في يوم نزل جريح يحجز الأكل والمشروبات اللي هتتقدم في الفرح، كلم نرمين واتس ياخد رأيها لكن لقاها بعتاله رسايل بتقول فيها: أنا مش مرتاحة وحاسة إني اتسرعت، ف معلش خليني أخد وقتي، أنا مش عايزة أكمل، والفرح ممكن يتلغي عادي، ربنا يوفقك، مع السلامة
جريح كتب بلامبالاة: طيب ماشي ردي بس دلوقتي عشان واقف مع الراجل، أخلي الأكل رز مع كفتة ولا فراخ؟!
مردتش ف كتبلها ا.
جريح بنفاذ صبر: ي حبيبتي انجزي ردي وهلغي الفرح حاضر
نرمين بلامبالاة مصطنعة: كفتة، أنا مش قادرة أثق فيك بصراحة، تعرف كام بنت غيري ي جريح؟! حلوين كلهم ولا فيهم حد مش حلو؟! سنهم بيبدأ من كام طيب؟!
شاف الماسيدج وعملها بلوك من غير م يرد
يوم الفرح
راحت نرمين البيوتي سنتر ومعاها وردة وسندس، بعد كام ساعة وصل عندهم جريح وحازم وأول م دخلو.
نرمين بزعيق: أنا نفسي أعرف مواعيدك مش مظبوطة ليه؟!
جريح بأسف: أنا غلطان حقك عليا، ممكن تمسكي نفسك النهاردة.. النهاردة بس والله وبلاش تنكدي عليا؟!
نرمين بغيظ: م تقول إنك مخنوق مني وخلاص ي أستاذ
شد حازم وردة سلم عليها وخروجو على طول بعيد عنهم
جريح بإستغراب: وهتخنق منك ليه بس ي حبيبتي؟!
نرمين بضيق: اسأل نفسك
جريح بنفاذ صبر: أنا آسف
نرمين بصوت عالي: بتاخدني على قد عقلي كمان!! والله عال ي أستاذ، أنا قولت نلغي الفرح م سمعتش الكلام
اتدخلت سندس وقالت بغيظ: م تكني بقا ي بت الله، إيه اللي حصل لكل ده؟! هما ربع ساعة تأخير، عاملة دوشة ليه؟!
نرمين بغيظ: حتى إنتي ي سندس؟!
قعد جريح على كرسي وقال بلامبالاة: خلينا قاعدين احنا ورانا إيه؟! أصلا زمان حازم وصل القاعة
نرمين بصدمة: والله؟! طب يلا بسرعة قاعد ليه؟! بس استنى شكلي حلو؟!
جريح بحب: زي القمر ي روحي
نرمين بفرحة: روح ربنا يجبر بخاطرك
وصلو الفرح وطبعا نرمين وحازم مبطلوش رقص
بعد الفرح ودعت نرمين أهلها بدموع مع دموع مامتها (مهما كان بنتها برضو ي جماعة)
ولاء بدموع: خلي بالك منها ي جريح
جريح وهو يهز رأسه بإيجاب: ف عيني ي طنط والله
أحمد ل جريح: مش هوصيك على نرمين ي جريح
جريح بإبتسامة: طبعا ي عمي من غير م تقول
حازم ل جريح: مبروك ي برنس
جريح بإبتسامة: الله يبارك فيك ي صاحبي، مبروك ي عم
حازم بتوصية: نرمين ي جريح
جريح بغيظ: بالله ي حازم أنا اللي محتاج توصوا نرمين عليا مش العكس
حازم بتشجيع: ربنا معاك ي عم ويصبرك عليها
تاني يوم عند جريح ف القاهرة اتصل على ولاء و.
جريح من غير مقدمات: أنا عايز أطلق بنتك ي حماتي وأخد حاجتي
ولاء بصدمة: ليه ي ابني دا تاني يوم جواز؟!
جريح بغيظ: ورقة وقلم ي حجة وسجلي عندك، أول م دخلنا القاعة قالتلي هنعمل إيه هنا، واحنا بنقطع التورتة بتقولي هما هيودهاني وأنا مروحة، والجاتوه بيتوزع على المعازيم كانت عايزانا نقعد جنبهم عشان ناخد، واحنا مروحين لقيتها جايبة دبدوب ف العربية وملبساه بدلة وبتقوله ي حبيبي، وبعد م روحنا لقيتها بتعيط فجأة سألتها عن السبب قالتلي أهلي مشيو ونسيوني.. بعدها بخمس دقايق لقيتها بتضحك وبتقولي أهلك نسيوك إنت كمان، و.
ولاء بمقاطعة: باااااس بس ي ابني، الله يكون ف عونك
جريح برجاء: خدي بنتك ي حماتي وهاتي فلوسي
ولاء برفض: البضاعة لا ترد ولا تستبدل، ربنا يعوض عليك، احنا م صدقنا خلصنا منها، محدش كان طايقها ف البيت أساسا وقفلت
جريح بيأس: عليه العوض
نرمين كانت واقفة ورا باب الأوضة بتسمعه، بعد م خلص قفلت الباب بالراحة وجابت ورقة وقلم وقعدت على السرير وبدأت تكتب (بسم الله الرحمن الرحيم،، أُعاهدكم أنا نرمين أحمد زوجة المهندس جريح،، أنني سوف أبذل قصارى جهدي ل خروج زوجي المصون عن شعوره وجنونه يوميا بتصرفاتي المجنونة والخارجة عن السيطرة،، لكن مع شوية عقل صغيرين لإنه جوزي اللي بحبه ف الآخر برضو ي جماعة وأبو عيالي بإذن الله،، هو بيصعب عليا الصراحة،، ااه وإن شاء الله أحاول أقلل النكد بس موعدكوش،، والله الموفق).
تمت♡♡♡
