Destiny in LONDON | SHENTAERAE (Hiatus)

1

​နေရာလပ်မရှိ ဖြာကျ​နေတဲ့ ​နေခြည်​ဖျော့​ဖျော့။
ညင်သာစွာ တိုက်ခတ်​နေတဲ့​ လေပြည်ညင်း​တွေ။
​ကောင်းကင်ပြင်ကြီးဟာ အပြာ​ရောင်အတိလွှမ်းသည်။ တိမ်စိုင်ဖြူ​တွေကသာ အပြာ​ရောင်ကို ​နောက်ခံထားပြီး ဟိုတစ်စ၊ ဒီတစ်စ။

အင်္ဂလန်ရဲ့ အ​ရှေ့​တောင်ပိုင်း​လေထုက နယူး​ယောက်နဲ့ ကွာခြားတယ်ထင်ပါသည်။ ထယ်ရယ်က​တော့ ဒီပတ်ဝန်းကျင်ကို ပို၍ပင် သ​ဘောကျမိသ​ယောင်။ အလည်အပတ်လာရလို့လား မသိ​ပေမယ့် သူက​တော့ ဒီ​နေရာက နှစ်သက်စရာ ပို​ကောင်း​နေသကဲ့သို့။

ကြား​နေကျမဟုတ်တဲ့ ရှတတ British accent ကိုလည်း သူ သ​ဘောကျသည်။ american ​တွေနဲ့ အတန်ငယ် ကွာခြားတဲ့ english စကားလုံး​တွေကိုလည်း သ​ဘောကျသည်။ အထူးသဖြင့်​တော့ လန်ဒန်ကလူ​တွေကို သ​ဘောအကျဆုံး။

ဒီကလူ​တွေက ထယ်ရယ် ငယ်ငယ်က ​နေခဲ့ဖူးတဲ့ ကိုရီးယားလူမျိုး​တွေနဲ့လည်း တခြားစီ။ သူ၏ လက်ရှိနိုင်ငံက အ​မေရိကန်လူမျိုး​တွေနဲ့လည်း မတူညီပြန်။ ဘယ်လို ကွာခြား​နေမှန်းမသိ​ပေမယ့် တစ်ခုခုက ကွဲပြား​နေပြီး အဲ့ဒီကွဲပြားမှုက သ​ဘောကျဖို့​ကောင်း​နေတာ​ကတော့ ငြင်းမရတဲ့ အမှန်တရား။

တကယ်ပါ။ ထယ်ရယ် ညာတာမဟုတ်ဘူး။
သူကသာ လန်ဒန်ကို အလည်လာတာ မဟုတ်ရင်ဖြင့်၊
သူကသာ အ​မေရိကားကို ပြန်စရာ မလိုရင်ဖြင့်၊
သူကသာ ဧည့်သည်တစ်ဦး မဟုတ်​နေရင်ဖြင့်၊
ဒီလန်ဒန်မှာပဲ အ​ခြေချဖို့ ​တွေးမိ​လောက်မှာ အတည်။

အခုတော့ဖြင့် ထယ်ရယ်ဟာ အချိန်တန်ရင် အိမ်ပြန်ရမယ့် ဧည့်သည်​ပေမို့ ထိုသို့ လုပ်နိုင်စွမ်းမရှိခဲ့​ပေ။

အလွန်ဆုံးမှ ​ခြောက်လပဲ ​နေခွင့်ရှိမယ့် ​နေရာ​ပေမို့ နှ​မြောဖို့​တော့ ​ကောင်းသား။ ဖြစ်နိုင်ရင် သူက​တော့ ဒီနိုင်ငံမှာ ဒီထက်ပိုပြီး ကြာကြာ​နေချင်တာ အမှန်။ လန်ဒန်က နယူး​ယော့ခ်နဲ့ယှဥ်ရင် သူ့အတွက် ပိုပြီး အထူးအဆန်း ဖြစ်​နေတာ​ကြောင့် ဒီလို ​တွေးမိတာလား​ ဆိုတာကတော့ ထယ်ရယ်​တောင်မှ မသိနိုင်ခဲ့။

ထယ်ရယ်က တစ်​နေ့ကမှ လန်ဒန်ကို ​ရောက်တာမို့ ဘယ်ကိုမှ စုံစုံလင်လင် မလည်ပတ်ရ​သေး။ ခရီးစဥ်နဲ့လာတဲ့သူ မဟုတ်တဲ့အခါ ဂိုက်လည်း မရှိ​တော့ နည်းနည်း ကသီကလင် ဖြစ်ရတာမျိုး ရှိ​ပေမယ့် ဒါက သိပ်ပြီး ကြီးမားတဲ့ ပြဿနာ​တော့ မဟုတ်ရပါဘူး။  လေယူလေသိမ်းနဲ့ စကားလုံးအသုံးအနှုန်း နည်းနည်း ကွဲပြားတာကလွဲရင် ဘာသာစကားက လွယ်လွယ်ဆက်သွယ်နိုင်တာပဲ မဟုတ်လား။