Destiny in LONDON | SHENTAERAE (Hiatus)

3

ခမ်းနားသော တော်ဝင်ဆန်ဆန် အပြင်အဆင်တွေ၊
အသံမဲ့ ခံစား​နေရမိ​သော အညို​ရောင်အ​ငွေ့အသက်၊
အံ့သြရ​အောင် ထည်ဝါ​သော အရှိန်အဝါ​တွေ။

​နေ​ရောင်ခြည်​နွေး​နွေးရဲ့​အောက်မှာ ရပ်တည်​နေတဲ့ ရဲတိုက်အိုဟာ ထည်ဝါခံ့ညားစွာ။ အနားပတ်ဝန်းကျင်ကို ချဥ်းကပ်မိရုံဖြင့်ပင် မိမိ၏ ဂုဏ်အရှိန်​တွေ ​သေးငယ်သွားရလုမတတ် ခံ့ထည်​နေတဲ့အထိ အရှိန်အဝါ ကြီးမားလှသည်။ တစ်ချိန်တစ်ခါမှာ ​တော်ဝင်အ​ဆောက်အအုံဖြစ်ခဲ့ဖူးတဲ့ ​နေရာဟာ ယ​နေ့တိုင် ​တော်ဝင်ဆန်ဆန်နဲ့ ​နေရာအများထက် ပိုပြီး မြင့်မြတ်ခံ့ညား​နေဆဲ။

အညိုလည်းမဟုတ်၊ အဖြူလည်းမဟုတ်၊ အဝါလည်းမဟုတ်တဲ့ အ​ရောင်​ဖျော့​ဖျော့က အမြင်အာရုံကို တစ်မျိုး ဆွဲ​ဆောင်​နေနိုင်တာမျိုး။ မိုး​မျှော်တိုက်​တွေရဲ့ကြား၊ သိမ်းမြစ်ရဲ့တစ်ဖက်ခြမ်းမှာ ရှိ​နေတဲ့ ရဲတိုက်အိုတစ်ခုဟာ တော်ဝင်ဆန်စွာ၊ ထိုနည်းတူ ကဗျာဆန်စွာ။

လန်ဒန်တာဝါဟာ ဤကဲ့သို့ နှစ်သက်ဖွယ်အတိအကျ။

ယ​နေ့ဟာ ထယ်ရယ့်လန်ဒန်ခရီးစဥ် စတင်တဲ့​နေ့။ ပထမဆုံးအ​နေနဲ့ ရစ်ခီ ​ခေါ်​ဆောင်လာတဲ့​နေရာဟာ လန်ဒန်ရဲ့ အထင်က​ရ​နေရာတစ်ခုဖြစ်တဲ့ လန်ဒန်တာဝါဆီသို့ ဖြစ်သည်။ ​ရှေး​ဟောင်းအ​ငွေ့အသက်​တွေဟာ ​မနက်ခင်းနေခြည်နဲ့အတူ ထယ်ရယ့်နှလုံးသားထဲ စိမ့်ဝင်လာသလား လို့ ထင်ရ​လောက်​အောင် အလွမ်းဓာတ်​တွေက ရင်နဲ့အပြည့်။

" ဒီ​နေ့က နည်းနည်း လူရှင်း​နေတာပဲ. လူမရှုပ်​နေတာမို့ ကင်မ် တကယ် ကံ​ကောင်းတယ် "

မနက်အ​စောပိုင်းမို့လို့တင် မဟုတ်ဘဲ ဒီ​နေ့​တော့ အမှန်တကယ်ပင် လူရှင်း​နေတာဖြစ်မယ် ဆိုတာကို ထယ်ရယ်လည်း ခံစားရမိသည်။ ကမ္ဘာလှည့်ခရီးသည်​တွေ ​ခြေချရာဖြစ်တဲ့ ဒီ​နေရာက ယခု​တော့ ထူးထူးခြားခြား ရှင်းလင်းလို့။ ​စောင့်ကြပ်​နေတဲ့စစ်သည်တချို့ နဲ့ ဧည့်သည်အနည်းအကျဥ်းကလွဲရင် ထယ်ရယ့်အနားမှာ မြင်​နေရတာဟာ ပန်းပင်တချို့​တွေချည်း။

​လောကကြီးကို စူးစမ်း​နေတဲ့ က​လေးငယ်​လေးတစ်​ယောက်လိုမျိုး ထယ်ရယ့်မျက်ဝန်း​တွေက ဟိုဟိုနီနီ စူးစမ်း​နေမိသည်။ ​ဝေ့ဝဲ​နေတဲ့အကြည့်​တွေက ကင်မရာတစ်လုံးသာ ဖြစ်ခဲ့မယ်ဆိုရင် ဦး​နှောက်က​တော့ ဖလင်ပြားတစ်ချပ် ဖြစ်ခဲ့မည်လား။ အမှတ်တရပုံရိပ်​တွေဟာ ထို​ပေါ်မှာ ထင်ဟပ်သွားလျက်သား။