#اغلى_مجاديف_الغرام
-
فز قلبه وسكت يناظر بصدمه كيف تجي تحضر خطوبته من انسانه غيرها وتشوفه عريس وهو كل هالسنين يتمنى انه هو يصير العريس لها ويتزوج منها هي كيف انقلب كل شيء ؟
اخذ نفس يدفن كفوفه بداخل جيوب ثوبه ويناظر بصمت ،
ام ضيدان : ما تركت احد ما عزمت ،
الجد عبدالرحمن : يلا الله يكتب لهم كل خير بحياتهم ،
-
كانت واقفه تختار لها فستان وهمست : اي فستان بلبس؟
ريوف : اللي تبين عادي بالنهاية عزيمة مو عرس ،
ابتسمت الهنوف وسحبت فستان لونها ابيض وهمست : حلو؟
ريوف هزت راسها بالايجاب : الصراحه اي ،
حطت الفستان على جنب : بطلع لي كعب اخلص كل شيء من الحين عشان بكره ما ابتلش ،
دخلت ام الهنوف وهمست : ابوكم راح ،
الهنوف باستغراب : فين راح؟
ام الهنوف : راح لجدة عنده دوام ،
ريوف : اما عاد اجل بكره نروح مع مين؟
ام الهنوف : والله ماني عارفه راح اتصل و اعتذر من ام ضيدان،
ريوف : اخاف يزعلون ،
ام الهنوف جلست وبيدها الجوال تدور الرقم : اكلمها اشوف،
وضغطت على رقم ام ضيدان تتصل عليها ،
-
ام ضيدان كانت جالسه مع سلمى يجهزون الحلا و التوزيعات
و ضيدان و بهاج وحسين كانوا يساعدونهم ب تغليف التوزيعات ، التفتت ام ضيدان من رن جوالها واخذت جوالها وهمست باستغراب : وش بيكون صاير ، و ردت : الو ،
ام الهنوف : اهلين السلام عليكم ،
ام ضيدان : وعليكم السلام ،
ام الهنوف : والله اتصلت اعتذر ما يمدينا نجيكم بكرة عبداللطيف راح لجدة ومافي احد يجيبنا لكم او يرجعنا ،
ام ضيدان : وين المشكله طيب احد من عيالي يجيبكم و يرجعكم بهاج موجود و ضيدان موجود حتى حسين موجود ،
ام الهنوف : ما ودي اشغلهم يمكن ما يمديهم و ينشغلون ،
ام ضيدان : لا ماعليكِ انا راح اكلمهم يجيبونك من بدري ،
ابتسمت ام الهنوف : تمام ان شاء الله على خير ،
وقفلت منها ام ضيدان وهمست : تقول زوجها سافر وما يمديها تجي وقلت واحد منكم يروح يجيبهم ،
سلمى : مو ضروري يجون اذا ما يمديهم ،
ام ضيدان : ما ودي ابتلش ويجون الناس يسالون عنهم وليه ما حضروا الخطوبه ف احسن شي يجون ،
حسين : خلاص مو مشكله ضيدان اكيد فاضي الصباح يروح يجيبهم وانا و بهاج نمشي مع ابوي وجدي عشان الذبايح ،
رفع نظره ضيدان وسكت يناظر بصمت ،
ام ضيدان : خلاص ان شاء الله اجل نشوف بكرة ،
-
كان جالس بغرفته سرحان رفع نظره من دخل اخوه مجيد وهمس : وش سالفتكم انت و امي متهاوشين ؟
ارون اخذ نفس ونطق : مدري امي وش ناويه حتى ابوي معها رايحين هناك يقولون نعتذر ما بنسوي الزواج عندنا احد ميت ونسافر عشان عمليه ومدري ايش! عجزت افهم حركاتهم ،
مجيد : ..
-
#اغلى_مجاديف_الغرام
-
مجيد : واضحة امي ماتبي تتكلف او انت تكلف عشان زواجك من ذيك البنت هي حاطه في بالها انك تطلقها ،
ارون : لو اني بين الحياة والموت ماراح اطلقها ،
-
( يوم الجمعة ٢ الظهر )
سلمى كانت في المطبخ تنظف ثلاجة القهوة دخل حسين وحط الاكياس : جبت كل الاغراض بنمشي مع جدي الحين ،
سلمى : تعرف شيء عن ضيدان و وينه؟
حسين : اي شفته عند النياق غريب ما راح يجيب خالتي ؟
سلمى : يمكن يكون ناسي روح كلمه يجيبهم ،
حسين هز راسه بالايجاب ومشى طلع من البيت رفع نظره يشوف ضيدان واقف يمسح على النياق وشماغه على كتفه وتوجه له وهمس : انت للحين ما رحت تجيب خالتي؟
ضيدان رفع كفه يشوف ساعته وعقد حواجبه : رايح الحين توقعت بدري مر الوقت بدون ما احس على نفسي ،
حسين : زين انك حسيت الحين روح جيبهم وحنا بنمشي ،
ضيدان هز راسه ووقف ينفض يدينه و ثوبه وتوجه يمشي لسيارته ركب وقفل الباب يحرك سيارته ،
-
كانت جالسه تستشور شعرها وفاتحه سبيكر تكلم ارون ،
الهنوف : طيب والحين وش تسوي انت ؟
انوار : ماني عارف انتي ابوكِ قال شيء ؟
الهنوف هزت راسها بالنفي : لا من بعد ذيك الوقت ما شفته لان جاه اتصال و راح لجدة عنده شغل ،
انوار : ومتى بيرجع ؟
الهنوف : يمكن اليوم الصباح بيجي ،
انوار : احاول اقنع امي بس هي رافضه اننا نسوي العرس ،
الهنوف : ما يهمني نسوي ولا لا يهمني وجودك معي فقط ،
انوار : تستهبلين ؟ كيف ماتبين وش بيقولون الناس؟
الهنوف : ان سوينا العرس ب يتكلمون و ان ما سوينا برضوا يتكلمون يعني ما فرقت ف اقولك انا ما ودي بالعرس ولا ابغاك توقف بوجه امك و ابوك بسببي عشان العرس ،
سكت اخذ نفس : و تهقين اهلك يوافقون اخذك كذا ؟
هزت راسها : اي يوافقون احاول اقنعهم مو مشكله ،
انوار اخذ نفس براحه : قسم بالله انك شلتي هم كان ثقيل على كتفي الحين اقدر اجيك ونسوي الملكة في بيتكم واخذك ،
ابتسمت بخفه : تمام بس نسولف عن هالموضوع في الليل الحين مشغوله اتجهز لخطوبة ولد عمي ،
ابتسم ونطق : طيب وانا بقفل و اروح اخذ لك دبلة من الان ،
ضحكت بخفه وقفلت الخط واخذت نفس تطالع بنفسها في المراية وتعدل شعرها و دخلت ريوف : ما خلصتي ؟
الهنوف : الا باقي بس البس الفستان ،
ريوف : ضيدان وصل اتصل على امي يقول انه تحت ،
الهنوف وقفت : طيب بلبس فستاني ومشت اخذت فستانها و دخلت دورة المياه تلبس فستانها الابيض ،
مشت ريوف وهي تحط اغراضها في شنطتها وعدلت شعرها ومشت تلبس عبايتها ، طلعت الهنوف وهي لابسه فستانها الابيض ومشت اخذت العقد تلبسها ولبست الاسوارة ،
-
