الايام عدت سريع وعرس اخوه لفادي باقي ليهو اقل من اسبوع وبقو مشغولين مع التجهيزات و التنظيم للعرس
بس علوية الوضع م عاجبها خالص بس مستحملة عشان فرحة ولدها وكانت دايما بتقول ليهم والله البت دي م ارتحتة ليها لكن عاد اعمل شنو فريد راسو اتلحس حليلو ـ وهو طبعا م شغال بكلامها خالص ومبسوط ..
قبل يومين من العرس فادي اتصل لي وقال لي لازم لازم تحضري العرس ـ قلتة ليهو ان شاء الله لو قدرت بجي ـ قال لي ماف حاجة اسمها لو قدرت ي رسيل انت اول المعزومين ولازم تلبي الدعوةـ قلتة ليهو حااضر ي فادي حاجي ـ قال لي طيب تمام حأكون في انتظارك ـ بعدها وراني الصالة الحيتم فيها العرس والزمن ....
طبعا فهمتة ناس البيت انو دة عرس اخو وحدة صحبتي وكدة عشان م يشغلوها لي ـ عدا وجن وريتها الحقيقة لانها حتمشي معاي برضو ...
يوم العرس ـ انا و وجن من الصباح شغالين ماسكات وعروكات واقنعة وشنو م بعرف هههههههه بس الحمد لله وشوشنا بقت ظاابطة ـ ماف ارهب من الماسكات والاقنعة الطبيعية ي بنات ...وتعبنا تعب عشان نختار الملابس الحنمشي بيها نشيل ونجرب ونغير ـ لحدي م في الاخر وبعد سلة روح اي وحدة فينا اقتنعت باللبسة الحتمشي بيها ـ انا اخترت فستان فنايلي بالزيتي مع الجسم حسيت بيهو بقى ضيق فيني نوعا ما بس لبستو ـ وشبط عالي بالفضي والشنطة والاكسسريس برضو بالفضي ـ الحجل الفضي حقي م لقيتو ف لبستة حجلي حق الدهب رفييع وحلوو...
اما وجن ف كانت لابسة طونكة طويلة باللون الجوافي وبنطلون جينز بالاسود واسبورت باللون الجوافي ...
العرس كان نهاري في مزرعة كبيرة منظمة بطريقة رهييبة ـ طبعا هما برجوازيين والرفاهية دي حقتهم 😂❤️ حتى اهلهم التقول م عايشين في سودانا دة الراحة ظااهرة فيهم ـ بإختصار رهاابة رهااابة شديدة ...
انا و وجن بس بقينا بنتفرج في المكان وفي خلق الله السمحة دي نسوانهم لرجالهم لاولادهم وبناتهم كلهم سمحين تبارك الله ♥
أول م وصلتة لقينا الحفلة بدت ـ اتصلتة لفادي م رد ـ ف قلتة اكيد حيكون منشغل ومع الصوت العالي دة م حيكون سمع اتصالي بقينا نرقص مع الناس وهجيج زي الهجيج ـ وجن دي الا ماساكاها من يدها عشان عارفاها جنها وجن الزنق تقوم تفضحني مع الناس هههههه ـ قلتة ليها ترقصي باحتراام فاهمة ....
شوية كدة لمحتة فادي وكان ببشر مع الناس ـ بصراحة اول م شفتو حسيت انو قلبي عمل شححح كان انيق شديد وشعرو بقى كتير و مبروم ـ والله البشوفو يقول م سوداني بشبه الخواجات البجيبوهم في ناشونال جوغرافي ـ قلتة لوجن دااك فادي ـ قالت لي وينو ـ قلتها الود الابيض داك ـ قالت لي الناس ديل كلهم بيض وينو فيهم بالضبط ـ قلتة ليها الود الابيض شدييد وشعرو ابيض دااك ـ قالت لي هوي كضابة اول حاجة دة م سوداني ـ قلتة ليها والله العظيم دة هو ـ قالت لي ومالو عامل كدة وشعرو ابيض ـ قلتة ليها هو البينو مش سمعتي بالحور يلا هو حوري ....قالت لي بلااي لكن الصراحة سمح سماحة جد والله لو م قلتي لي انو صحبك وبتعرفيهو ومتاكدة انو سوداني كان قلتة انو اوروبي عدييل ...كدي تعالي عرفيني عليه ـ قلتة ليها ي بت سيبي الخفة اسي م شايفاه مبسوط مع اهلو لبعدين بعرفك عليهو ...
