العرس باقي ليهو اسبوع واحد وماما و وجن شغالين فيني شغل الجن دخان وعروكات وماسكات والله انا م باقي لي الا اكورك زهجتة عديل من الشغلانة دي ـ طبعا الدخان لو م ماما وقفت لي قوي والله م كان اتدخنت ـ بس م شاء الله النتيجة كانت حلوة وجسمي بقى نضييف وناير وحتى فتح درجتين ..
فادي لما يتصل لي مرات بلقاني زهجانة بقول لي العروس مفروض تكون رايقة وم تزهج لانو الحالة النفسية اهم شي ويقعد يتفلسف فيني ف بنفصم فيهو بقول ليهو م ازهج كيف واليوم كلو مشوية انا في الدخان دة والله المرة الاخترعت الشي دة م عافية ليها ـ وهو يشيل ويضحك فيني ضحك وبقول لي دة اعظم اخترااع يااخ ـ قلتة ليهو فادي قفل مني م ناقصاك والله ـ قال لي بالمناسبة مش مفروض نمشي سوا اوريك بيتك عشان لو في حاجة ناقصة نتممها لانو البيت جاهز بس لو عايزة تغيري حاجة او تضيفي حاجة نعملها من اسي ـ قلتة ليهو امممم فعلا صح انت حتكون فاضي متين ـ قال لي بعد يومين م عندي شي ف خليك جاهزة بعد الفطور بجي بسوقك ـ قلتة ليهو طيب تمام..
*في مكان تاني خاالص*
يمان :والله ياجاد حيرتني معاك عديل وم قادر افهمك ـ كل مرة طالع لي بقرار جديد ي تستمتر في الشغل دة ي تخليهو وحركات انك تغيب على كيفك دي حتخليك تنطرد والشغل دة انت لقيتو بعد سلة روح فماممكن معاك ـ ولو الوضع هنا م عاجبك ارجع السودان بلاي ـ يخ ليك سنتين وانت ماقادر تستقر في شغل معين وللان م استفدت شي من اغترابك دة ماعارف الحاصل ليك شنو لانو ماممكن معاك والله انا لو ما صحبك وبحبك ماف زول حيتحملك ف عليك الله بطل البتعمل فيهو دة وركز في شغلك دة قبل م تنطرد وتسف التراب ـ لانو المرة دي لو انطردت والله م حأتعب روحي وافتش ليك شغل زي كل مرة ...
جاد :خلاص يا يمان حأحاول انتظم في شغلي مع اني م طايق الشغل ولا طايق ناسوا والله كل يوم بعصر على قلبي ليمونة عشان امشي ..
يمان :انت مالك ومال ناسها ـ انت ركز في شغلك بس وم عندك شغلة بشي ...
جاد :كدي انسانا من موضوع الشغل دة ـ سمعتة خبر انو الاكس عرسها الاسبوع الجاي ...
يمان :أها وشعورك شنو مبسوط ولا زعلان ـ مع انو م عندك الاحقية تزعل خالص وبعدين سؤال انت ليه مهتم بأخبارها للدرجة ...
جاد :امممممم ما عارف بالجد عارف ...
يمان :ماعارف ولا حاسي بالذنب تجاه الشي العملتو فيها
جاد :يمان لو سمحت ممكن نقفل السيرة دي ...
يمان :على م اعتقد دة انت فتحتة السيرة دي ...
بعد يومين كلمتة امي اني حأمشي مع فادي اشوف بيتي وكدة و وجن حتمشي معاي ـ قالت لي طيب ...
وجن قالت لي اسي انا امشي معاكم لييه مفروض انت وراجلك براكم تمشو ـ قلتة ليها انت متخلفة تمشي معاي يعني تمشي معاي ـ قالت لي يازولة ظابط الحالة كنت عايزاك تمشي براك عشان تاخدو راحتكم وكدة بس ع كيفك طالما عايزاني امشي ف حأمشي ...قلتة ليها راحتنا في عينك هو احنا ماشين نعمل شنو اصلا م ياهو ماشين نشوف البيت ـ شافتني وضحكت قالت لي يازولة قداام ههههه ـ طبعا ضحكتها دي ليها الف معنى حافظاها بصم العواليق التافهة ....
