بعد مكالمة فادي معاي استغربتة ليه عايز يقابلني وشنو الموضوع المهم العايز يقولو لي حسيت بقلق ي ربي الحاصل معاهو شنو وحتى إنو طلب نتلاقى في الحديقة البلدية م في كافيه زي كل مرة ف دي الحاجة الخلتني اتحير شوية ـ ي رب يكون خير ....
تاني يوم بعد العصر جهزتة عشان امشي لبستة عباية سوداء وطرحة سوداء وشبط اسود يعني اسود في أسود وم كنت عاملة ميك اب غير لاينر وقلوس في شفايفي ولبستة زمامي ....
أول م وصلتة اتصلتة عليهو وقلتة ليهو انت وين انا حاليا وصلت ـ قال لي طيب انتظريني في البوابة جاي عليك انا ـ قلتة ليهو طيب ـ شوية كدة وجاني سلم علي ـ وشو كان م طبيعي كان واضح وش زول مرهق وشايل هم كبير ف قلقي زاد لما شفتو بالحالة دي ـ دخلنا جوة وقعدنا في حتة هادية م فيها ناس ــ فادي انت كويس ـ سكت م رد علي وخت يدينو في وشو زي الزول الحاصلة ليهو مصيبة كبيرة وما عارف يبدا من وين ـ قلتة ليهو عليك الله رد علي ولو بكلمة بديت اخاف والله وخلاص دموعي بقت في طرف عيوني ...
فادي :رسيل لا ماتخافي انا كويس والله ..
رسيل :بس شكلك م بيوحي إنك كويس وياهو الهم ظاهر فيهو ـ طيب احكي لي الموضوع المهم القلت عايز توريني ليهو شنو...
فادي :(بقى متوتر زيادة وبفرك في يدينو مع بعض) والله يارسيل ماعارف ابدا ليك كيف واقول ليك شنو بس برضو م قادر اسكت واحكي الجواي ....
رسيل :طَبْ احكي انا سامعاك واكيد اي مشكلة وليها حل بس انت خليك واثق فيني واحكي كل الفي قلبك اعتبرني مرايتك وعايز تفضفض ليها ..(إبتسمت معاهو وختت إيدها في إيدو)
فادي :بس أوعديني إنو بعد الكلام الحأقولو ليك دة حتقيفي جمبي وم حتتخلي عني مهما كانت ردة فعلك ..
رسيل :بوعدك يافادي ـ بس انت احكي انا خلاص م قادرة اصبر م تخوفني اكتر من كدة ارجوك ...
فادي :طيب حأبدا احكي وم تردي على كلامي الا بعد اقول ليك انا خلصت ..
رسيل :طيب تمام
فادي (جر نفس طويل بالاول فادي بدا يفكر كيف يبدا ليها الكلام عشان يمهد ليها الموضوع بس خالص م يقدر يصيغ ليها كلام معدل وكأنو لسانو اتربط كل العملو بقى بعاين ليها في عيونها لمن عيونو دمعت وبعد م خلاص غلبو يقول شنو قرر يعترف ليها من دون مقدمات وقال ليها رسيل انا بحبك ـ بحبك والله العظيم بحبك ـ بحبك بصورة م بتتخيليها ـ حبيتك من اول يوم شفتك فيهو ـ حبيتك لدرجة اني م قادر اشيلك من بالي وفي كل لحظة انت في ذاكرتي ـ حبيتك لدرجة اني كل يوم بدعى في صلاتي انك تكوني من نصيبي ـ حبيتك لدرجة انو اتغيرت فيني حاجات كتيرة بسببك وحياتي بقت احلى بوجودك وحسيت انو فعلا الدنيا بقى ليها طعم ـ رسيل أنا مجرد م اشوفك او أسمع صوتك مشاعري وأحاسيسي كلها بتكون جايطة ـ انا عارف انو الجرح الجواك لسة واجعك وم قادرة تنسيهو لدرجة انك قلتي لي قبل كدة انك م اظن تقدري تثقي في زول وتديهو قلبك مرة تانية بس كل البتمناهو منك انك بس تدي قلبك فرصة اخيرة ـ تفتحي لي قلبك وتديني فرصك اعيش معاك الحب ـ تديني فرصة اسعدك واكون ليك الحبيب والصديق والزوج واي حاجة بتتمنيها و صدقيني مستحيل مستحيل اخذلك وان شاء الله اموت او أتأذى لو فكرت في يوم اجرحك او اكسر قلبك ـ أنا واثق اني حأنسيك كل اللحظات البشعة العشتيها ـ واثق اني حأقدر ارمم الوجع الجواك وإلا م كان اعترفتة ليك بحبي ـ رسيل انا كل مرة بقول اعترف ليك فيها بمشاعري برجع بتراجع وبقول انتظر شوية لاني خايف انك تصديني وتبعدي عندي ـ بس انا م حأخليك والله م حأسمح ليك انك تبعدي عني انت حتكوني لي يارسيل ولو اضطريت اخطفك ـ دة م تهديد بس انا حأموت لو رفضتيني وبعدتي عني ـ أنا الجواي كتير لدرجة اني والله ماقادر اعبر وكأنو لساني اتربط ـ رسيل أنا أنا (فادي حس بروحو مخنوق وم قادر يواصل ودموعو نزلت )
