Working Student (BISAYA AU FROM TIKTOK)

PROLOGUE

"Rhean, asa si Mama?" pangutana ni Kuya Champ pagkakita niya sa akoa nga nagkaon sa kusina.

"Naa'y gilakaw, Ya. Wala ko kabalo asa." Nitando si Kuya human nitalikod.

Nagpadayon ko'g kaon human nanghugas og plato.

Alas nuebe nako nakamata hinungdan nga naulahi ko sailaha'g kaon og pamahaw. Maayo gani kay Sabado karon, wala'y klase. Pero dili man pud ko late momata kung ting klase kay ginapukaw man ko ni Mama.

"Ayo, Roxanne!"

Ning gawas ko pagkadungog nako nga naa'y nagsampit sa pangalan ni Mama gikan sa gawas sa among balay. Usa pa nako matubag si Ante Helen, nakit-an na nako si Mama nga nagbaklay padulong sa amoa.

"Naa rako diri, Len," sulti ni Mama pagduol niya kay Ante Helen.

Naa rako sa among pultahan nagtindog samtang gitan-aw silang duha nga nag istorya. Layo ang distansya nila sa akoa maong dili kaayo nako madungog ilang gi-istoryahan. Taod taod kay nakit-an nako si Mama nga naa'y gitunol kwarta kay Ante Helen human nananghid nga molakaw.

"Nagkaon na ka, Rhean?" pangutana ni Mama sa akoa pagsulod niya sa balay. Nitando ko. "Tawaga 'sa palihog imong Kuya kay sugoon nako papaliton og tambal sa imong Papa," sugo niya.

Mitando ko human giadto si Kuya sa taas. Nakit-an nako siya nga nagtaod og butones sa iyang polo shirt pagsulod nako sa iyang kwarto. Naa 'guro ni siya'y laing lakaw karong adlawa.

"Papaliton sa daw ka'g tambal ni Papa, Ya."

Gilingi ko niya human siya mitando. "Mosunod rako."

Nag-una ko'g naog ug naabtan si Mama nga naglingkod sa among sala samtang nag ihap sa kwarta. Milingkod ko sa iyang tapad human gitan-aw iyahang gibuhat. Miginhawa siya'g lalom human mitan-aw sa akoa. Klaro kaayo sa iyang mga mata ang kakapoy nga iyahang gibati.

"Pait ka'yo ning wala ta'y income adlaw-adlaw, Rhean. Sige ra ta ani'g panghuwam bisan kinsa." Mipahiyom siya gamay human nibalik og ihap sa kwarta.

Mura ko'g na estatwa sa akong gilingkuran. Wala ko kabalo kung unsa akong angay itubag sa iya. Gusto nako siya tabangan pero wala ko'y mabuhat. Kabalo kong kwarta ang gikinahanglan niya, kwarta ang gikinahanglan namo karon pero asa man ko mangita ana?

Gikumot akong dughan samtang nagtan-aw ko ni Mama. Iya jud gipugos og sigo ang gamay'ng kwarta nga iyahang gigunitan. Nagbudget na gali siya sa maintenance ni Papa, unya naa pa jud mi duha ni Kuya Champ nga nag eskwela.

Third year college na si Kuya samtang Grade 9 ko. Aside sa pension ni Papa, wala na mi'y laing kapangwartahan. Wala mi'y laing maduolan. Dili kapaigo ang pension ni Papa para among saligan sa panginahanglan namo adlaw-adlaw. Kung dili tungod sa diskarte ni Mama, dugay nami wala'y gikaon ug dugay na pud siguro mi nakaundang ni Kuya sa pag eskwela. Pero kanang tanan wala nahitabo tungod sa paningkamot ni Mama. Parehas karon, wala ko kabalo kung asa na pud kaha nanghuwam si Mama og kwarta para ipalit og tambal ni Papa.

"Te, sunod adlaw nalang daw mobayad si Mama." Atubang nako kay Ante Gina pagpabalik niya'g panginil sa among balay.

"Dai, tulo ka adlaw na iyang batal. Palihog lang, Rhean, ingna tawun si Roxanne kay ako'y madaot ani ba."

Mitando ko. "Sige lang, te. Pasensya jud kaayo kay nahutdan mi'g kwarta karon. Nag exam man gud si Kuya."

"Mao lagi na akong ingon ni Roxanne nga paundangon nalang unta na niya imong Kuya kay mao na ang nakapalisod ninyo'g taman. Maayo pa'g manarbaho nalang na si Champ para makatabang na sa inyoha. Tutal, daghan ma'g kasudlan nga trabaho karon."