صحيت من النوم على أسوء مكالمة بيقولولي ان بابا مات
_كنت بحضر حاجاتي اللي هاخدها معايا السكن ولاقيته داخل عليا
خلاص هتسافري انهارده .. خليكي يومين كمان
_ما أنت عارف يا حماده ان الامتحانات الاسبوع الجاي أنت خلاص مش عايز بنتك تكون دكتوره زي ما بنتمنى من زمان ولا ايه
وهو انا اطول اكون ابو الدكتوره اسيل ... ما انتي اللي نصفتيني في اخواتك
_يلا عد الجمايل يا حماده.. لولا بس ان مجموعي مجبش الجامعات اللي هنا عمري ما كنت سبتك ثانيه واحده بس
اهم حاجه مستقبلك ينور عيني .. يلا عشان منتأخرش
_انت لسه مصمم توصلني .. ارتاح انت وانا اصلا خلاص عرفت الطريق وكمان متتعبش نفسك اكتر ما انت تعبان
لا مش هطمن عليكي غير لما اوصلك بنفسي لغايه باب السكن
_يعني هتوصلني وترجع كل دا .. دا الطريق لوحده ست ساعات
كله يهون عشان خاطر الدكتوره ... يلا يبت وبلاش غلبه لغايه هنتأخر وكمان لسه هنتمشى وناكل دُره
_ الله عليك ياحماده ياللي فاهمني دايما
-منغير ماتطلبي عارف انك قبل ما تمشي لازم نتمشى علي الكورنيش وناكل الدُره
_ربنا يخليك لقلبي العمر كله
*********
_لا لا انا قلبي مش مطمن
-يبنتي اهدي ان شاء الله خير .. عارفه انك عكيتي في الامتحان بس متتوتريش للدرجه يعني
_حاسه ان في حاجه هتحصل .. انا مش خايفه من الامتحان انا حليت وان شاء الله ربنا هيكرمني .. بس قلبي مقبوض معرفش في ايه
-ان شاء الله مفيش حاجه هتحصل .. ارتاحي انتي بس وخشي ناميلك شويه عشان قدامك سفر الصبح
_طيب هتصل علي بابا وهنام .....
_مبيردش ليه
-تلاقيه بيصلي او مشغول في حاجه بيعملها
_مشغول في ايه دلوقتي !
دا احنا داخلين علي الفجر
-يبقا اكيد بيصلي عمو بيحب يطول في قيام الليل ... ادخلي نامي وهو لما يشوف انك اتصلتي هيرن عليكي اكيد
_لا انا مبعرفش اانام غير لما بابا يكلمني
-يبنتي انتي كدا بتوتريني معاكي .. ادخلي نامي وهتلاقيه بيكلمك
_طيب تصبحي علي خير
*********
_الو .. كدا متتصلش بيا افتكرت حصلك حاجه
-البقاء لله ربنا يصبرك يا حبيبتي
_مين معايا ..
عمتو!!؟
فين بابا يعمتو .، انتي بتتكلمي من تليفونه ليه
-احمد مات ي اسيل .. ربنا يرحمه يا حبيبتي
سمعت الجمله دي وحسيت ان الزمن وقف بيا ..
_ازاي مات .
_انا لسه كنت بكلمه الصبح .
فتحت الباب وجريت بالهدوم اللي عليا .. معرفش ازاي وصلت الموقف اللي هركب منه
مكنش معايا فلوس ولا اي حاجه .. انا بعيط وبس
حسيتني طفله صغيره وتايهه مش عارفه تروح بيتها
مش عارفه اعمل ايه واروح فين
لاقيت سواق جااي بيسألني
-مالك يا بنتي في ايه .. طيب انتي عاوزه تروحي فين
_السويس .. عايزه اروح السويس دلوقتي
-طيب اركبي العربيه اللي هناك دي
_ركبت العربيه وانا تايهه ومش مستوعبه اللي بيحصل .. بعيط وبس والناس تهدي فياا
_معرفش الوقت عدا ازاي وبقيت في السويس ووصلت البيت كمان
لاقيت عزا وناس لابسه اسود كتير وبيعيطوا .. دول قرايبنا .. ليه لابسين اسود وبيعيطوا
طلعت وانا بدور علي بابا وبنادي عليه
بس مش لاقياه
اخواتي قاعدين في ركن وبيعيطوا وماما معاهم .
_ماما .. بابا فين هاا .
اتصلت بيه بس مكنش بيرد عليا
هو مش موجود هنا ليه .. هو مش بيتأخر في الشغل كل دا
.. عمتو اتصلت بيا بس قالت كلام غريب مفهمتوش
_ انتي مش بتردي عليا ليه .. فين بابا بقولك .. احمد فين هاا
بدور في الشقه في كل حته مش لاقياه ... لاقيت حد بياخدني في حضنه
حسيت في حضنه بالدفا .. زي حضن بابا
ببص عليه لاقيته اخويا واخدني في حضنه وبيعيط
_يوسف فين بابا .. راح فين
-اهدي يا حبيبتي .. انا هاخدك عنده تزوريه ..حرام كان لازم يدفن مكنش ينفع نستنى
اكتر من كدا
_انت بتقول ايه .بابا كلمني من كام ساعه كان بيطمن عليا ... وانا كنت مستنياه يكلمني قبل ماينام بس متصلش بيا
-ادعيله ي حبيبتي .. هو شايفك ومعاكي دلوقتي
مقدرتش اصمد اكتر من كدا واغم عليا
_بابا ؟؟!!
انت عايش اهو ليه قالولي انك مُت
-منا عايش فعلا ... انا عايش في قلبك وعقلك ومش هسيبك ابدا
_بس انا عايزه حضنك .. عايزه وجودك جمبي
-اخواتك معاكي وماما كمان ... بس ربنا عايزني جمبه وانا هكون مستنيكي هنا
فوقت بس مش عارفه اقعد قد ايه لاقيت ماما وخداني في حضنها و جمبي اخواتي .. وصوت القرآن عالي بصيت لاخويا
_انا عايزه اروح لبابا دلوقتي
-مش هينع دلوقتي .. بكرا الصبح هوديكي ليه
_ماشي سيبوني لوحدي
-اسيل ..
_انا كويسه .. سيبوني لوحدي بس
كلهم خرجوا معادا اخويا الكبير
-اوعي تفكري انك لوحدك .. انا معاكي وفي ضهرك .. وماما واخواتك برضوا .. احنا بنستقوى بيكي انتي .. بلاش تضعفي .. انتي لو وقعتي كلنا هنقع وراكي
-انا كويسه .. سبني لوحدي بس
خرج وسابني وانا فضلت باصه في اللاشئ بعد كدا قومت جبت الالبوم الصور بتاعنا
فضلت اتفرج علي الصور واعيط .. معرفش عدا اد ايه وانا في الوضع دا
بس لاقيت اخويا داخل
-قومي البسي يلا يا حبيبتي احنا مستنينك .
_لبست وطلعت كانت العيله كلها برا
روحنا هنااك المقابر وقرأنا القرآن وقعدنا شويه وخلاص ماشيين
-سيبوني لوحدي خمس دقايق .. ممكن .
_مينفعش يحبيبتي .. يلا بينا
-عشان خاطري خمس دقايق بس
مشيوا وانا فضلت قاعده علي التراب قدام المدفن
_انت ليه سبتني لوحدي .. مش كنت دايما تقولي انا عمر ما حد هياخدك مني ومش هجوزك حتى .. طيب انت ليه مشيت وسبتني لوحدي ... انت وحشتني اوي .. ملحقتش اشوفك حتى واشبع منك انا مودعتكش حتى
هفضل ادعي باليوم اللي هكون فيه جمبك .. استناني
ربنا يرحمك ويغفرلك ويسامحك ينور عيني
عدت السنه واتنين وخمسه وانا دلوقتي واقفه قدام قبره بالروب بتاع التخرج
_شوف ياأحمد بقيت الدكتوره اسيل زي ما كنا بنتمنى ونصفتك اهو
كانت الحفله مش حلوه .. كانت نقصاك انت تكون موجود فيها
انت وحشتني اووي .. وعلفكره انا زعلانه منك
_ااه زعلانه منك انت .. بقالك كتير مجتش تزورني .. هو انا موحشتكش ولا ايه
_عارفه اني كل يوم عندك وقرفاك باللي بيحصل في يومي
_بس انت وحشتني اووي ومحتاجه حضنك
قريت الفاتحه ليه ومسحت دموعي وخرجت
_الدكتوره اسيل تحب تروح فين انهارده ...
- الدكتوره عايزه تتمشى علي الكورنيش وتاكل دُره
_كنت متأكد .. يبنتي انتي مبتزهقيش من الكورنيش
-ولا عمري هزهق اصلا .. مش انت خطيبي يلا بينا .
_انت تؤمر يا قمر
تمت بحمد الله
رأيك في كومنت ♥️
ادعوا لوالدي بالرحمه❤️🩹
