#حـصـريـاً
#الشاعرة_نورس_الحلفي
#قصيدة_لأم_البنين_ع
ــــــــــــــــــــــــــــــــــــــــــــــــــــــــ
وللعباس... چم اعتاب وديتي
وكت الموت لوليدج اعتازيتي
ــــــــــــــــــــــــــــــــــــــــــــــــــــــــ
وديتي العتب للشالته متونج
چنچ شايله ومحمله اضعونج
مو عدله الغرب عگبه يشيعونج
هضيمه يالحنينه ومنها ونيتي
وللعباس.... چم عتاب وديتي
ـــــــــــــــــــــــــــــــــــــــــــــــــــــــــ
مهضومه گضيتي العمر مهضومه
وهايه ساعته الكافل حله يومه
يا كونه يجيچ ويترك النومه
وبيده يشيل الجنازه تمنيتي
وللعباس... چم عتاب وديتي
ــــــــــــــــــــــــــــــــــــــــــــــــــــــــــ
تمنيتي الولد يحضر هالمسيه
تشوفينه يحره بالوداعيه
شبطه عباس وتعطل بهالجيه
وانتي لشوفته هاليوم حنيتي
وللعباس.... چم عتاب وديتي
ــــــــــــــــــــــــــــــــــــــــــــــــــــــــ
حشمتي الولد وديارج بعيده
اليوم مودعته وروحج تريده
عله افراش المنيه وونچ بهيده
يرد ليج الغيور شكثر تانيتي
وللعباس.... چم عتاب وديتي
ـــــــــــــــــــــــــــــــــــــــــــــــــــــــــ
عتبج يالحنينه يلچم اجروحه
تدرينه غيور ومايكض روحه
مو هينه عليه الجنازه مطروحه
هز اتراب گبره من توفيتي
وللعباس چم عتاب وديتي
ــــــــــــــــــــــــــــــــــــــــــــــــــــــــ
بقلم خادمة اهل البيت ـ ع ـ
#الشاعرة_نورس_الحلفي
اسألكم قراءة سورة الفاتحه الى روح والدتي ولأمواتكم
غير مبري الذمه اليحذف الاسم وينسب الكلام له
ｈｔｔｐｓ://ｔ.ｍｅ/ｊｏｉｎｃｈａｔ/ＡＡＡＡＡＥＬｄｖＧｓｓＺＭｕｒｗｆＬｓＪＡ
قصائد نسائيه لكل ايام محرم اشترك
