صل على النبي ♡
{وبشر الصابرين الذين إذا اصابتهم مصيبه قالوا إنا لله وإنا إليه راجعون}..
قال لي هوازن جنات كيف؟ كويسه؟ قلت ليه لا مقلقه والله من قبيل غلبنا نسكتها قال لي ربنا يكون ف عونها طيب اسمعي كلامي د كويس خليكم قاعدين جمبها لمن نحن نجي قلت ليه خالتو كيف؟ وحتتأخرو؟ قال لي ديل اتحركو وهسي حيكونو قربو يصلو اما نحن حنتحرك يادوب قلت ليه وصوتك مالو؟ قال لي يلا وقفل...بلعت ريقي وانا بعاين فيهم وهم منتظرين اوريهم الحاصل شنو.. قعدت وضميت جنات وهي م كانت قادره تسألني لأنها كانت بترجف بس... بعد خمس دقائق بالضبط سمعنا صوت عربات وصواريخ.... ف لحظه لقينا اننا حصلنا الشارع بقيت اعاين للنسوان البكوركو بأعلى صوت وهم بقولو كرررر على ي جنات من الجاتك كر على ي جنات امك ماتت كرر عليك تاني منو البكون معاك... انا م كنت فاهمه شي من كلام المره وفجأة بقيت م فاهمه حاجه وبرجف عاينت يميني لقيت جنات واقعه ف الارض قدام سرير كانت ملامحها ساكنه... لمن مشيت بخطوات متثاقله نحو السرير رجعت لورا بسرعه وانا بخت يدي ف خشمي وبقول لا لالا لالا خالتو سلافه لا مستحيل.. انا انا انا الصباح كنت معاك انا انا الصباح كنت كنت معاك و و و حسيت بيد بتمسك ف يدي عاينت ليها وقلت ليها رناد خالتو سلافه الصباح كانت كويسه بكذبو هم صح؟.. تقريبا كنا داخلين ف حاله صدمه لحد م دخلوها جوا وبقو يغسلو فيها نحن برضو م مستوعبين ولا قادرين نفهم حاجه كل وحدة فينا بتبكي بحرقه... والبزيد ف بكاي النسوان البجو يعزو جنات... وفي منهم البنططو وبذكرو قد شنو وجعتهم... غمضت عيوني شديد وانا بقول بهمس لا مستحيل والله والله الصباح كانت كويسه ماتت؟ ماتت كيف يعني م فاهمه... بدون احس لقيت نفسي ف الغرفه البغسلو فيها الجنازه اول مره اتوجع كده وافقد حد عزيز على اول مره اقيف واشوف جنازه بغسلو فيها... م عارفه حصل لي شنو بس فجأه صحيت بصوت الكواريك الشديدة وكلماتهم "خلوو بتها تشوفها لأخر مره _ نزلو الجنازه ي تميم خلي جنات توعى انو خلاص امها راااحت"... قمت من السرير الكنت فيه بسرعه وجريت نحو العنقريب الختوهو وزحيت الكان قدامي وشفت جنات الحاضنة امها لآخر مره... كانت بتصرخ بأعلى حس وتقول ليها عارفاك سامعاني ي امي بس م حتقدري تردي لي.. وريني بس مشيتي خليتيني وراك ليه... عارفاك م حتردي والله عارفه انو دي اخر مره اشوفك واحضنك فيها انا بس عاوزه عاوزه اقول ليك اني ما صابره انا م صبوره للدرجه دي عشان ربنا يمتحني فيك... انا حموت وراك ي امي حأجيك قريب م بخليك براك.... خالتها مسكتها وقالت ليها استغفري الله ي جنات ده كلام شنو البتقولي فيه ده ادعي ليها ي جنات ده قدر وقضاء ربنا حتعترضي؟ قومي... قومي موعد الدفن جا... الرجال شالو الجنازه وهم بقولو لا إله إلا الله.. وكل الناس وراهم بكبرو ويوحدو الله ف اللحظات دي م حسيت بي رجلي وغصب عني قعدت ف الأرض كل مشهد وكل لحظه كانت معاها اتذكرتو... ختيت راسي في رجلي وبقيت ابكي ابكي بقووه... بعد ساعات عديده من البكاء سمعت صوت الرجال قمت بسرعه ولفيت وشي بالطرحه وقعدت شايفه جنات راقده ف رجل خالتها وبتبكي شوي وتسكت شويه وقدامهم راجل غضيت بصري وشويه جاتني مهاد قالت لي قومي معاي.. مسكت يدها وطلعنا بصعوبه من بيت البكاء... دخلنا بيتنا قالت لي ماما بتناديك قلت ليها طيب دخلت جوا لقيت ف نسوان كميه كميه دخلت المطبخ لقيت امي قلت ليها امي اترميت فيها وبقينا نبكي بعد مسافه قالت لي الحمد لله ولا نقول إلا ما يرضي الله... الرجال دقو الصيوان وجابو عده الجمعيه وعشان جنات م حتقدر تشتغل انتي ومهاد ورناد اقيفو ف بيت البكاء وانا هنا ومرات بجي عليكن اتحصنو وم تبكو ادعو ليها لأن اخر كلامها كانت بتوصينا ندعي ليها... هسي انتي صلى العصر واتحصني رناد بتكون خلصت تحصين وتسبقك... قلت ليها امي انا م قادره اصدق قالت لي معليش حبيبتي كلنا ليها م كان ف وقت للنقاش ف بست رأسها ومشيت اتوضيت ف حمام غرفتنا عشان بره الحوش مليان... بعد اتوضيت جيت فرشت جنب مهاد وصليت العصر بعدها اتحصنت م كنت عارفه الساعه كم لم شفتها لقيتها خمسه ونص د شنو المغرب اذن لاحول ولا قوة الا بالله كيف م انتبهت للوقت ده كلوو .. مهاد مسكت يدي وبقت تبكي م قدرت اقول شي غير احضنها وبس...بعد مسافه قمنا قلت ليها م قايله المغرب اذن ي مهاد قالت لي اذن؟ جاده قلت ليها اي والله قالت لي والله م ملاحظه للوقت ولا حتى أنها غربت قلت ليها طيب ارح نصلي.. فعلا صلينا انا وهي وبعدها صليت النافله ولم خلصنا قلت ليها لازم نقيف ف بكاها جنات زي م قالت ماما م حتقدر قالت لي ما عارفه الناس دي بتجيب الشهيه من وين للشاي والقهوه والحاجات الزي دي قلت ليها المات فقد روحو بس قالت لي اي والله.. عايني غيري العبايه لأنها مليانه تراب قلت ليها طيب... غيرت العبايه ولبست الحجاب والشرابات عشان الرجال...طلعنا انا ومهاد شايلين جزء من عدة الجمعيه معانا ونحن طالعين كان ف هايس وقف ونزلو ناس بصرخو بأعلي حس ويندهو على اسمها "ووب ي سلافه"... ع قدر م اتضايقت على قدر م خفت والمنظر وجع قلبي... موتتها حاااره شديد بس لا نقول الا ما يرضي الله وانا اليه راجعون... مهاد لكزتني وقالت لي "بصوت متعب" ه هوازن ا ارح بس م اعتقد كنت سامعاها كنت بعاين للنسوان كيف بنططو وبندهو عليها بحسره كنت بستغرب ليه هم ببكو بالطريقه دي؟ وف نفس الوقت م قادره اشوف المنظر ده وللمره التانيه مهاد تلكزني وهي بتقول ه هوازن قلت ليها هاا قالت لي يلا جوا مشيت معاها وانا سرحانه اصلا.... دخلنا بصعوبه والناس زادت وصوت البكاء زاد اكتر لم جو ناس الهايس....لقينا نسوان ف المطبخ بعملو ف الشاي لم شافونا قالو لينا يلا تعالو استلمو الشاي نحن حنمشي نخت الغدا هزينا راسنا بس وهم طلعوا... عملنا عشره سرامس وجهزنا الصواني حقت الشاي شويه سمعنا صوت بطقطق ودخل بعدها وهو بقول الغده يااا وسكت...قبلت عليه وتقريبا ده كان ولد خالتها عاينت ليه نظام يتم كلامو قال لي وين امي؟ قلت ليه مع النسوان الفي الحوش البعملو ف الغده قال لي طيب وحأجي اشيل الشاي هسي جهزو قلت ليه جاهز.. بعد مشى مهاد قالت لي م شايفه رناد قلت ليها بتكون مع النسوان قالت لي اي بكونو... بعد خلصنا من الشاي وجا كم ولد مع تميم شالو الصواني والشاي ونحن ودينا للنسوان قالو عاوزين يتغدو اول رجعناهم المطبخ... انا بقيت اغسل ف العده ومهاد بتلملم لي ف الجوطه الحاصله... م انتهيت منها جابو صواني الرجال حقت الغده تقريبا كان ودو ليهم قبيل.. مهاد قالت ليي بغسل ديل انا قلت ليها لا م كتيرين قالت لي نعم؟ قلت ليها ديل تلات صواني وهسي حيجيبو الباقي ع فكره ف م تتشالقي للشغله.. بعد غسلتهم جابو اربعه صواني مهاد بتلملم ف الصحانه وتختهم ف حوض الغسيل... جو كم بنت كده شكلهم صحبات جنات بقو يساعدونا وبرضو م انتهينا كل م نغسل يجيبو تاني ف عشان كده قسمنا الغسل ف الحوش وف المطبخ اتنين شالو ليهم طش ومشو الحوش شلت الصينيه وختيت ليها العده الوسخانه عشان اوديها ليهم برا جات وحده منهم بقت تساعدني بعدها شلناها وطلعناها الحوش قالت لي انا حغسل ف الحوش عشان المطبخ جوطه قلت ليها طيب بنادي ليك وحدة تغسل معاك العده دي كتيره قالت لي طيب الله المستعان.. هي قعدت وانا مشيت ناديت ليها وحده وبقينا نشتغل.. للعشاء كده صلينا وتاني رجعنا للشغل... لم خلصنا العده ولملمنا المطبخ كنت بمسح فيه عشان عباره عن طين.. جا تميم وهو بقح نظام ينبهني وانا اصلا عامله حسابي ف عاينت ليه قال لي ااا عاوزين قهوه... م قدرت اخبي الضيق الفي وشي وم عارفه كيف سكتت وم قلت حاجه... لفيت وشي ودموعي نزلت وانا بتذكر ف خالتو سلافه ياريت ي خالتو تجي تشوفيهم نفسهم مفتوحه كيف... قال لي خلاص م تعمليها لو تعبانه بخلي وح... م تم كلامو قلت ليه لا حأعملها انا بس سرحت شويه... قال لي لو تع... م تم قلت ليه لا خلاص ولو سمحت عاوزه اتتم المسح نص ساعه وتعال شيل الصواني حقت القهوه.. م قال شي ومشى لم انتهيت من المسح ختيتها ف النار وبقيت اجهز الصواني واغسل العده شويه جا راجل شايل صواني دخلها وقال لي القهوة جاهزه؟ قلت ليه شويه وتجهز قال لي طيب.. لم طلع جو البنات ومعاهم مهاد بعد خلصنا القهوه وجا راجل شالها جو النسوان قالو لينا اعملو العشاء... رناد جات مع كلمتها دي وقالت لي هوازن انتي هنا؟ قلت ليها اي قالت لي طيب تعالي معاي وانتي ي مهاد برضو... المره قالت ليها ماشات وين من سمعتن سيره الشغله جريتن؟ رناد قالت ليها امي عاوزانا نمشي ونجي ونحن الحنعمل العشاء م تخافي ي خالتو.. وطلعنا من المطبخ انا م قدرت اسيطر ع نفسي واتفقعت ليهم بكاء.. رناد قالت لي ليه م قعدتي ارتحتي شويه قلت ليها ارتاح بوين ي رناد كل م اقول اقعد دقيقه جيبو لي العده او يقولو لي اعملي وغيري وكنسي وهكذا قالت لي الله المستعان... دخلنا بيتنا وودوني على غرفة امي وابوي دخلنا ورناد قفلت الباب عاينت لي الصينه حقت الاكل ولي امي وخالتي القاعدين قلت ليهم فشنو ناديتونا امي قالت لي تعالو اكلو عشان تقدرو تقيفو قلت ليها م عاوزه وم نفسي وياريت ماف زول يجبرني وعلي كده طلعت طوالي عشان اتجنب التحانيس.. وانا ف الشارع ماشه ع بيت البكاء فجأه ف يد مسكتني التفت بخوف لقيتها منن اخدت نفس وانا بقول ليها خلعتيني ي منن.. ركزت ف وشها لقيتها بتبكي حضنتها وقلت ليها كنتي وين انتي قالت لي من قبيل بفتش فيك اخخخخ ي هوازن من موتتها اخخخ بقينا نبكي بعد مسافه دخلنا بيت البكاء تمينا البكي حقنا والله م حسيت نفسي عاوزه اسكت... قالت لي ماتت كيف قلت ليها والله انا زاتي لحد اللحظه دي م فاهمه شي بس ي منن الصباح كانت كويسه والله وكمان تضحك وتوصيني اجيهم حتى اني وعدتها...ميتتها ميته فجأه وفاجعه والله 💔.. قالت لي اخخ انا والله م قادره اصدق م قادره... قطع كلامنا صوت المره القبيل وهي بتقول وين اختك؟ قالت حتعمل العشاء قلت ليها نحن قاعدين قالت لي طيب اعملن عشرين صينيه عشره للرجال وعشره للنسوان وامكن نحتاج زياده قلت ليها بإذن الله.. مشينا الحوش عشان حولو مكان الطبيخ ف الحوش... والشاي والقهوه ف المطبخ.. ف رصينا الصواني ف السراير جو رناد ومهاد طلعو انهم لاقو منن قبيل...ف بقو يساعدونا بعد عملنا عشره صواني جات خاله جنات قالت لي نادي تميم من برا يمشي يجيب عيش عشان نقص قلت ليها طيب حاضر... ف الحقيقه اني مشيتها لاني مستحيل امشى مكان الرجال وكمان انده ع راجل م بعرفو وكلمت وحده بتبقي ليهُ واديتها القروش الادتني ليهم خالتهم سونه دي... لم مشت البنات بقو يعلقو لي انو كيف تقول امشي نادي وفي بنات خالتو وخالو قلت ليهم ي بنات بتكون م ركزت ياخ هسي نحن قادرين نركز ف حاجه.... جا راجل وشكلو ود خالهم لانو البنت قالت ليه ولد الخال نادي معاك الرجال الباقين عشان تشيلو الصواني دي قال ليها تميم مشى يجيب العيش لم يجي بشيلهم قالت ليه طيب... اما نحن كل وحده بتعبي صحن وتختو ف الصينيه لم قربنا نخلص الصواني حقت النسوان جا تميم ومعاهو كم نفر سألونا من الصواني وبنت خالتهم ورتهم شالو جزء منها ومشو وتاني جو شالو جزء وبقو هكذا لم خلصت الصواني جا واحد قال عاوزين حفاظات بسرعه مشو زي خمس بنات اما نحن وزعنا الصواني للنسوان وبقو يتعشو ف المسافه دي لملمنا العده و وزعنا نصها ف الحوش ونصها ف المطبخ والمره دي قعدت غسلت معاهم برا ف الحوش م خلصنا جا واحد قال عاوزين شاي ساده... وأربعة صواني لانو جو رجال تاني قمت انا عملت الشاي وهم عملو الأربع صواني... حرفيا كده للساعه 1 حتى انتهينا من العده والنظافة ولملمنا كوويس.. كان الناس اتوزعو على البيوت وجزء منهم رجعو وحيجو بكره... اخيرا كده روقنا... مهاد قالت لي نسوق جنات معانا البيت قلت ليها اي احسن لكن الوقت متأخر عشان كده دقي لعامر يجينا قالت لي انا تلفوني م معاي قلت ليها المشكله ولا انا قلت ليها ندق بأي تلفون أنتي حافظه رقمو؟ قالت لي لااا... ف كلامنا ده جات جنات عاينت لينا وقالت انا عندي قلت ليها جنات قالت لي عاوزه امشي ايوه قلت ليها طيب ارح ندق ليه قالت لي المشكله م عارفه تلفوني وين قعدنا انا وهي ومهاد محتارين نعمل شنو لمن قالت لينا انا حمشي اقول لي تميم نادي لينا عامر يوصلنا قلت ليها فكره طيب فعلا هي قامت مشت وبقينا منتظرين جات قالت لينا ارح اطلعو قلت ليها امشي البسي طرحتك طيب قالت لي والله م مركزه.. مشت وجات بسرعه حتى طلعنا الحوش لقينا تميم متكي على السرير لم شافنا قام وجا علينا قال لينا ارح يلا جاهزبن؟ قلت ليه وين عامر؟ قال لينا انا حوصلكم لو ماف مانع... عاينت لي مهاد وبعدها لي جنات قالت لي قال حيوصلنا قلت ليها لالالا نادي عامر بس لو سمحت قال لي البيت خطوه قلت ليه حتى لو خطوه زي الساعه دي نحن نمشي مع حد غريب كيف؟ وبعدين عامر م برضى... قال لي طيب فعلا شينه حمشي انادي تعالو انتظرو ف السرير ده... هو مشي وانا عاينت لجنات بعتاب قالت لي م عندي حيل للنقاش قال لي بوصلكم ف م قدرت اعترض بس قلت ليها عذرك معاك... شوية جا تميم وهو بقول تعالو... فعلا طلعنا لقيت عامر مسكت في يدو قال لي تميم شكرا ياا ابو الشباب سلمو ع بعض ورجعنا البيت من دخلنا وانا حضنتو وبقينا نبكي وهو بحاول يواسينا بس م كان قادر وبس بطبطب على كتفنا حتى رناد جات من جوا ومسكت يدو وبقينا نبكي فيهو.. بعد مسافه زحانا ومسح لكل وحده فينا دموعها وهو بقول ادعو ليها هي محتاجه ليكم اكتر من اي وقت كان... م تنسوها ولو بتعزوها بجد أدعو ليها... قلت ليه أن شاء الله.. بعد مواساه منو دخلنا جوا كان امي وابوي ف الغرفه م حبيت ادخل عليهم ف مشيت غرفتنا كنت داخله استحم لقيت مهاد دخلت ف مشيت حمام الحوش بعد شلت غياري... بعد استحميت وطلعت مشيت الغرفه لقيت البنات قاعدين حولين جنات وببكو كلهم مع بعض قلت ليهم أدعو ي بنات ادعو... جيت قعدت جمب جنات وقلت ليها ماما سلافه بعد اتوفت م عاوزه حاجه منننا غير الدعوات هي محتاجه دعواتك ي جنات... زادت بكاء وقالت لي ي هوازن عليك الله م تقولي كده والله م قادره م قادره اصدق انها مشت حرام عليها حرقت قلبي اخخخخخ اخخخخ اخخخ من فراقك يمممه اخخخ.. وكأنها يادوب استوعبت فجأه بقت تصرخ بأعلى حس وضاغطه على قلبها وهي بتقول اخخ ي يمه اخخخ... اربعه بنات حولينها بس م قادرين نواسي م قادرين نتكلم م قادرين نوصف... اصلا نواسي نقول شنو؟ وحده اجنحتها اتقطعت بموت امها نقول ليها اصبري؟ تصبر كيف ودي امها حبيبه قلبها؟ هل موت الام ساهل لدرجه الإنسان يستوعب بسرعه؟ لا والف لا... م كنا قادرين نواسي بس بنبكي معاها وماسكين يدها وبس... أمي جات بصوتها وقعدت جمبها وبقت تبكي.. جنات قالت ليها خالتو كنوز البتجيها كل صباح مشت البتشاركيها همومك مشت البتجيكم كل يوم صباح ومساء مشت الكانت بتحبكم مششت اخخخ ي خالتو كنووز اخخخ اخخ لو امي ترجع تسوقني معاها والله والله ما صابره والله م قادره والله وبالله كتير على والله كل شي هين الا امي يارب يطلع حلم يارب كلووو ولا امي كلووو ولا روحي كلووو ولا الربتني كلو ولا جنه دنيتي...
"ولا حتى الانهيار يصف يا امي💔)).
الليل شلناهو بكاء وتذكار... لم كنا صغيرين وخالتو تجيب لينا كلنا لعبات زي م بتجيب لي جنات.. كنا نحن أخواتها الما من بطن وحده... لسه بتذكر لمن اتغيرت عليهم لم كبرت جملتها الوحيده لي "ي هوازن نحن م باقين فيها عشان كده عيشي واوعى وافهمي الحياه دي صح لا تكوني غافله ولا تكوني قافله.. افهميها عشان تتيسر"...
كانت ولازالت أعظم جاره مرت علينا... طيبه وخفيفه على القلوب وكانت دايما تخاف تموت وهي على معصيه... يا الله ي خالتو...
الساعه جات تلاته ولا وحده فينا غِفت كل وحده قاعده ف سرير وسرحانه ومرات البتبكي ومرات البتتنهد بصوت عالي... اما انا كنت ما عارفه هل انا سرحانه ولا بفكر ولا ببكي... قمت طلعت وماشه على غرفه عامر....دقيت الباب مرتين م فتح.. كنت حاسه قلبي فيه جمر ولسه ف حاله عدم استوعاب للحصل رغم اني اكتر وحده كنت بجيب سيره الموت وانو بجي فجأه دون انذار ما اني قبل نجي كنت بقول ليهم الموت م معروف طيب لي هسي انا م قادره؟ انا هسي لي م مستوعبه؟ كأنه حلم... وانا واقفه وعاوزه ادق الدقه التالته الباب فتح.. عاينت ليه وعيوني مقلعه وملامحي مخطوفه نفسي م كان منتظم مره اقدر اشيل نفس ومره اكتم... مسك يدي ومن سكات قعدني ف السرير المقاصد سريرو وقعد جمبي... عامر على قد م هو نباح وم بسكت ولا دقيقه هو ضعيف جدا قدام دموعنا وضعفنا... م بقدر يواسي بكلام حتى لو قال يواسي بقول كلمة ويسكت... بس م حصل حسيت اني جيت لعندو ضعيفه ومرقت ضعيفه كتت دايما بجيه ضعيفه ومنكسره ومنتكسه برجع قويه ومتفائله ومتأمله....
ماسك يدي وبطبطب عليها لمن زدت في البكى حضني وهو بمشي ع شعري حرفيا بكيت بكيت بحرقه وانا بلعثم وبقول كلام مشتت وم مفهوم "كانت.... صباح... حضنتني.... بتودع... خ خالتو... م م م مشت"... كنت بردد كلمات وانا عقلي بجيب لي الذكريات والتفاصيل حقتنا... ببكي وكأني يادوب سمعت الخبر... م كنت عارفه مره كم من الزمن وانا ببكي لمن قومني وهو بقول صلى ركعتين يلا قومي اتوضي في حمامي حأجيب ليك الاسدال من غرفتكم... مشى وانا دخلت الحمام اتوضيت وطلعت لقيتو فرش المصلايه واداني الاسدال لبستو وبقيت اصلي مره اسرح ومره اخشع ولمن سجدت.. رغم الصداع والتقل الكان في قلبي بس بكيت بكيت شديد وانا بقول يارب صبرنا يارب صبرنا في مصيبتنا وانا إليك لراجعون.. دعيت كتييير كتيررر ليها ولينا ولي جنات بذات.. لمن انتهيت من الصلاه كان الصبح اذن صليت الرقيبه والصبح بعدها م لحقت اتحصن ونمت ف المصلايه من التعب بعد مسافه حسيت بزول بشيلني فتحت وغمضت على حد بحصني وكانت امي... فتحت تاني وهي بتغطيني تاني نمت....
الساعه كانت سته لمن صحيت بكركبه في الغرفه عاينت لقيتو عامر بلبس قلت ليه عامر قال لي م قاصد اصحيك قلت ليه لا انا قايمه بعد ده قال لي قايمه وين؟ م نمتي كويس قلت ليه عامر عندنا بكاء نحن وبعدين الشغله كتيره قال لي انتي ي هوازن اكلتي؟ قلت ليها اي أكلت قال لي طيب انا مارق مع تميم ده حيكون منتظرني هسي يلا... مرق وانا قمت مشيت غرفتنا م لقيت غير جنات دخلت الحمام سرعه عشان احصلهم... لبست عبايه وحجابي والشرابات وانا ماشه لقيت امي بتناديني قلت ليها م عاوزه شاي قالت لي والله اكلم ليك عامر قلت ليها قلت ليهو أكلت قالت لي وبتكذبي كمان؟ كويس ي هوازن قلت ليها ماما بجد م نفسي اكل لم. احس نفسي جعانه حأكل قالت لي كلنا م نفسنا بس مجبورين اها لو صمنا من الاكل سلافه حترجع؟ قلت ليها ربنا يرحمها انا ماشه..
حوقلوا..
نتلاقي ♡..
