روز

10

صل على النبي ♡

تميم :

حتى ف اختيار شريكه حياتي فضلت أن امي هي التختار لي و واثق تماماً انها حتختار صح... بعد كلمنا ابوها وقال حيسأل مني اول بعدها يديني موافقتو مبدئيا بعدها يشاور البنت...

كان شفتها كم مره بس م انتبهت ليها حتى اني م عارف ياتو واحده فيهم هي منن القالت عليها امي... صح اني مرات بجيني فضول اعرف هي ياتا بس تاني بتناسى وبقول لم الموضوع يتم على خير اول تاني الشوفه هينه...

___

هوازن :

ريناد قالت لي م تشتغلي بيها قابلونا كتير زيها قلت ليها عاوزه اعرف اول مالا بعدها م حشتغل بيها زي م بتقولي قالت لي حيكون فشنو عليك الله ي هوازن... عاينت ليها بشرود بعدها قلت ليها ارح حيكونو منتظرين ونحن طالعين شفنا قطوف واقفه مع بنات... ريناد قالت لي م عاوزه اقطع انا بس قلت ليها تعالى.. قالت لي اصبري وين اجي .. مشيت قدامها و وقفت بس اتفاجئت لم شفت شُلتي القديمه من ايام الجامعه.. عقدت حواجبي وعاينت ليهم كلهم بعدها قلت السلام عليكم... وحدة منهم قالت لي اطلعي من الدور ياااا هوازن م جااي عليك. التانية قالت لي والله قربت ما اعرفك يختي ده نفاق ولا جنسو شنو من قدامهم هلا هلا ومن وراهم يستر الله... ريناد قالت ليها اسكتو و احترمو نفسكم احسن ولا عشان نحن ساكتين يبقى تتمادو زياده.. قطوف قالت لينا م كان العشم والله كنت متخيله اني خلاص لقيت العوض بس طلعت غلطانه... عاينت لي وقالت لي وانتي كفايه كذب واقلعي القناع حق الامتياز ده كفايه انا شفت اسكرينات لكلامك مع الاولاد وشفت لبسك وشفت كللللل حاجة.. وكمان جايه تقطعي فيني؟ انا شافعه وهميه وم بتفهم حاجه؟؟ سقطتي من نظري وانا الختيتك قدوه لي بس المظاهر بجد خداعه ي منافقه حرام عليك تكذبي على الناس كدا حتستفيدي شنو هسي من المسخره العاملاها دي و ... قاطعتها ريناد بأنفعال وقالت ليها حسكك عينك اسمعك تتكلمي كدا وقدامي وعن اختي والا اقسم بالله يا قطوف تشوفي وش تاني عمرك م شفتيه ويااااا سلام عليك انتي الصدقتيهم... وهي ي هوازن امسحي دموعك دي عشان ما يستاهلو ديل وارح قدامي يلا... سمعت صوت مهاد بتقول بنات؟؟ هوازن؟؟ مالكم؟ وديل منو ديل ريناد قالت ليها تعاالي اسمعي البنات ما لقو حاجه يتكلمو فيها بقو يقولو عن اختنا منافقه حتى البت الأسمها قطوف دي... البنت قالت ليها نحن عندنا أسماء... مهاد قالت ليها كدي بالهداوه فشنو يعني؟ انا م فاهمه هوازن مالا بتبكي وانتو منو اصلا؟.. البنت قالت ليها نحن شله هوازن من الجامعه يختي تاني فحاجه؟.. قطوف قالت ليها وكشفو لي حقيقتها الداساها... مهاد قالت ليها حقيقه شنو يا انتي عليك الله ما تعصبوني انا على أخرى وصبري دا ليه حد... و اول شي ليكم انتو يااا الكانت فاكراكم صحباتها وطلعتو بنات ساي هوازن عمرها م كانت منافقه فاهمين؟ هوازن كانت غاااافله ف فرق بين منافقه وغافله تمام معاكم لحد هنا؟؟ بعدين ربنا شنو؟ ربنا هداها ود م اسمو نفاق ي متعلمين دا معناه ان ربنا انتشلها من الظلام الكانت فيه للنور للهدى... ولو المجتمع كلو بي فهمكم د ف عزائاً للراجنكم... ريناد قالت ليها بالك طويل يا مهاد بتشرحي لعالم امخاخها مقفوله محصوره العقليه وبركزو بسس على السلبيات وبعدين تعالن هوازن خلوها انتو م شايفين نفسكم م.... قاطعتها وانا بقول ريناد خلاص.. مسحت دموعي وابتسمت وقلت أن الله يهدي من يشاء.. انا بتمني انكم م تشيلو في بالكم فكره اني سيئه وعاوزاكم تفهمو اننا م ملائكه عشان م نغلط وم شياطين عشان نغلط وبس نحن بشر نخطىء ونعود ونتوب ونتلكك وتاني نقوم ونرجع ونستقيم... انا صحيح زمان كنت غافله بس الحمد لله هسي ربنا اصطفاني وم تتوقعو اني اقعد واردح واقول ليكم لااا ولي تقولو وم ادراك لا اكيد... انا بس حقول ليكم ربنا يسامحكم على القلتو فيني وحسبي الله ونعم الوكيل... طلعت برا وانا رجليني م شايلاني وبتنفس بِقدرة قادر... انا م بحب المشاكل وم بحب الظلم وم بحب الاساءه وم بحب يتقال عني منافقه... انا وحده خاطئه ياخي ربنا يتوب على ويغفر بس الناس م تغفر وم تغض نظر عن كنت وبقيت... الناس دايما بركزو ف العيوب وينسو المحاسن...الناس م بتركز على حالها بل بركزو ع حال الناس الحولها وبنسو نفسهم.... انا جايطه رغم اني واثقه من نفسي بس كلامهم هزاني و تغير قطوف عشان الحاجه دي زعلني وقفل نفسي من البشر شديد.... كنت قاعده ف المصطبه حقت المركز ومغطيه وشي ويا الله بتنفس لم سمعت صوت بقول هوازن؟؟ قمت وانا بقول عااامر قال لي بسم الله مالك؟ سمعت صوت شيخه هاجر بتقول هوازن انتبهت ان عامر واقف قدامي وتقريبا هي م عارفه انو أخوي ف قالت لي عمل ليك شنو الراجل دا؟ وانت نقدر نساعدك بشيء؟ قال ليها انااا... بس قاطعتو وهي بتقول لو سمحت امشي انت م عندك اخوات؟ خاف الله فيهم وخلي بنت الناس ف حالها... قلت ليها شيخه هاجر قالت لي اها مسكت يدها وقلت ليها شيخه هاجر دا عامر اخوي... هي شكلها اتخلعت عشان ما قالت حاجه ودخلت المركز طوالي.. عامر قال لي زوله غريبه خلاص قلت ليه عشان شافتني ببكي وانت قدامي اكيد ما حتفكر انك اخوي قال لي طيب بتبكي لي خليها شيختك قلت ليها بحكي ليك ف العربيه هسي ارح قال لي طيب امشي ناديهم من جوا قلت ليه ممم امشي انت قال لي نعممم قلت ليه اقصد حاضر.... عاوزه ادخل لقيتهم جو وشكلهم حكو لي امي لأنها صاره لمن شافوني ريناد قالت ليها هدي بنتك.... مشيت ركبت وجو ركبو عامر اتحرك وقال فشنو ياا جماعه كلكم صارين كدا وروز بتبكي فهمونا حاجه امي قالت ليه شلتها القديمه عملو ليها دراما جو من وين ما تعرف عامر قال ليها كيف يعني ريناد حكت ليه كل شي قال لي انتي يا هوازن صح عشان ما رديتي ليهم الاساءه بالإساءه وربنا حياخد حقك منهم م تزعلي وتبكي ساي أنتي مش واثقه في نفسك؟ وانك زوله كويسه مهاد قالت ليه صراحه حاجه تزعل وقعدت تبكي انا مقدرت اسكت وبقيت اضحك فيها قلت ليها ي عويره نبذوك انتي ولا انا قالت لي اسكتي انتي زاتك وينو لسانك الطويل م كان تسلطي عليهم والله غظتيني غيظ قلت ليها اعمل شنو ي مهاد عارفه اني م بحب المشاكل وم بحب الجو حقها قالت لي معليش امي اخدت ليك حقك قلت لأمي سجمي ي امي عملتي شنو قالت لي م قلت شي بس فهمتهم انو غلط البعملو دا واحسن يركزو ف حياتهم ويخلو حياه الناس ف حالها وانك م منافقه زي م بقولو وانك كويسه وشديد كمان واني واثقه فيك كتير وكدا قلت ليها بحبك يا امي قالت لي ربنا يحفظكم لي هسي ما تبكي وانتي عملتي الصح لمن رديتي ليهم كدا وهم اتأسفو لي وحتى قطوف اعتذرت من اخواتك ومني بس ريناد ابت ليها قلت ليهم هي ي بنات ومن عفى واصلح اجره على الله.... وانا عافيه ليهم ومسامحاهم... عامر قال لي عشان كلامك الحلو دا عازمك فطور برا... مهاد قالت ليه حترجعنا ولا شنو نحن ضحك وقال ليها ع حسب طلب البرنسيسه.. ريناد قالت لي اها يااا السمحه قلت ليها كدي افكر.. مهاد قالت لي ي بت هوي نحن طالبين يدك ولا حاجه؟ شنو نفكر د بطن اوعه تلعبي ضحكت عامر قال لي اها ي روز قلت ليه خلاص نجيبهم عشان الشفقه عليهم ليس اكثر.. أمي قالت لينا اسكتن عاوزه اخوكم ف موضوع قلت ليها كلناااا عامر... ضحكنا شويتين تاني عامر قال ليها احكي ي مزه امي قالت ليه رأيك شنو في جنات؟ عامر قح وقال ليها امي بسم الله بتين هو.. أمي قالت ليه اها ي ولدي عاوز تقعد كدا لبتين انا عاوزه ليك السمح قال ليها امي انا عجزت للدرجه دي؟ قالت ليه لا عجزت ولا شي بس عاوزين نفرح بيك قال ليها حتفرحي بي ي امي بس م هسي اديني وقت شويه بس وم تقعدي ف الوقت دا تزني لي وتختاري من عندك قالت ليه سمح لكن م كتير قال ليها أهم شي نبطل زن قالت ليه ما بصبر عليك كتير قال ليها والله ي اني انا ايقنت انك عاوزه تتفكي مني بس اوريك حاجه؟ حتى لو عرست بجيبها واقعدها معاك .. مهاد قالت ليه اوعه اوعه نحن م صدقنا حنتفك منك تقوم تجيبها وتجي قلت ليها ي بت خفي كلامك المصلحه كدا ما بتضبط.. قالت ليه احم ي عامر قصدي حبابك ي حباب عيني انت قال ليها كويس بعرف ليك يوم انا.... ضحكنا فيها ريناد كانت برا الشبكه ماسكه التلفون وشغاله بيه... مهاد قالت لي بالله عيونك اتخربو بالبكاء قلت ليها اسكتي م تذكريني الحصل.. عامر قال ليها انتي ي مهاد دايما توقيتك غلط قالت ليه انت ابلع لسانك خااالص قال ليها اناااا؟ يلا يلا من عربتي يلا قالت بيه يرضيك ي عموري قال ليها للأسف لا اي لا قالت ليه فهمت خلاص وقف العربيه ونزلني قال ليها طوالي دقيقه بس وقف العربيه وقال ليها يلاا قالت ليه تسلممم قلت ليها احساس م عارفه اننا وصلنا المطعم يعني... ضحكت وقالت لي بعيش الدور يا زوله مالك... نزلنا بعد عامر قال لينا اننا حنقعد جوا المره دي.. فعلا دخلنا لقينا طاوله فاضيه قعدنا فيها... ريناد قالت لي نفسك فشنو انا عازماك بقروش عامر قلت ليها لو كدي النفتح نفسي.. عامر قال لينا هوي قبل تقعدو تحلمو لي انا م عندي قروش ليكم... أمي قالت ليه خليهن ما بعرفن ياكلن هسي يطلبن ليك اندومي قلت ليها بري انا م بحبها ريناد البتحبها.. ريناد قالت لي م عندي مشكلة معاها.... مهاد قالت ليه طبعا حيعملوها فيني انا... امي قالت ليه حتطلب لينا شنو... قال ليها اصبري يجيبو المنيو بعدها نشوف الانسات عاوزين شنو قلت ليه ي سلام عليك انت.. لم جابو المنيو كل وحده شافت فيه شنو وطلبت العاوزه.. لم جابو الطلب وفطرنا وسط الونسه والمشاغلات وكلماتي البرددها كل شويتين "وطو صوتكم هي"... "بنات براحه"... بعد اللحظات الحلوة دي رجعنا البيت مبسوطين...