صل على النبي ♡..
قالت لينا صراحه ي هوازن ما بقى نفسي ف حاجه وبس منتظره يومي...قلت ليها جنات قالت لي ممكن تخليني براحتي؟....زعلت ايوه بس ف ساعتها و راعيت انها فاقده الشغف وده من حقها ف ما لمتها وم طال زعلي منها وطبطبت على كتفها بِسكات... قالت لي اسفه لو زعلتك بس ي هوازن انا بجد ما حاسه نفسي قادره اعيش وأكمل من بعدها جسد بدون روح بقيت... قلت ليها م زعلت والله عاذراك ي جنات وربنا يكون في عونك ويجبر كسرك ويلم شتات قلبك قالت لي امين.. حاولنا نتونس معاها ونطلعها شويه من جو الكئابه ده لم ريناد قالت ليها انتي خالتو سونه وين قالت لي رجعت بيتها قلت ليها اهااا كويس قالت لي ماف داعي تجيبو طبيخ تاني حأعمل انا قلت ليها بتعرفي لكن؟ قالت لي اي امي كانت بتعلمني نسيتي؟ قلت ليها م نسيت بس بتذكر انها كانت مدلعاك يعني م بتشتغلي الا الحاجات الخفيفه قالت لي يعني م طوالي الدلع ده مرات بعمل فطائر وحاجات زي دي قلت ليها الله كان عملتيها ورسلتي لينا منها كانت عجييبه ي بت ولا قدرات شيف زاتو م شاء الله تبارك الله.... ريناد قالت ليها ولا شيف هوازن زاتو قلت ليها لاااا انتي هنا بتجي للنقطة الما ياها... كان هدفنا اننا نخليها تتناقش معانا حتى لو بسيط بس هي كانت بتبتسم بي برود وبس... لم الوقت جا قمت قلت ليها يلا نحن نمشي... قالت لي ليه اقعدو قلت ليها تاني حتفقدينا ف حاولي اشبعي مننا قالت لي فشنو ماشين وين قلت ليها حننزل تحفيظ ي ستي أن شاء الله.. عاينت لي مسافه بعدها عاينت لي ريناد وهي بتقول وانتي زاتك؟ قالت ليها ايوه انا كمان يحلوه عاوزين نستفيد من زمنا والقرآن ماف احلى منو وتضيع الوقت في الفارغ دي اكعب حاجه ف أن شاء الله ربنا يثبتنا.. قالت لينا والله ما عارفه اقول حاجه غير ربنا يثبتكم... ضميناها على أساس نودعها ونمشي بس فجأه بقت تبكي كأنها كانت منتظره اشاره بس... بكتنا معاها ريناد قالت ليها كفايه يشيخه حرام عليك... قالت لينا والله عمري م لقيت بنات زيكم يتعاملو من قلبهم الزمن بقى كعب شديد وكل حد عندو قناعين.. انا اول مره اشوف ف عيون حد الصدق ده كلو في عالم مليان كذب انا حقيقي بحمد ربنا عليكم م عارفه بدونكم كان حصل معاي شنو... بجد انا هسي مصبرني انتو ولو م وقفتكم معاي دي انا كنت جنيت... ابتسمت بفرح وانا بقول حبيبي ي جنات حبيبي والله ღ.. ريناد قالت ليها سيبك من دي م بتعرف تعبر بس والله ي ستي م عملنا الا الواجب ده انتي اختنا قبل تكوني جارتنا ف لازم نقيف معاك انتي بت الغاليه وبمناسبه المصداقيه ف والله نحن قافلين على نفسنا عشان عارفين العالم البره عامل كيف حتى امي ما كانت بتمشي لزول غير خالتو سلافه...ونحن زمان م كانو بخلونا نطلع وكنا نزعل بس هسي والله عرفنا لي ماما كانت مانعانا نطلع للعالم البرا صح بقولو اطلع وجرب عشان تكون قوي بس انا بفضل دايما الزول يحمي نفسو قبل الحاجه تحصل ويخت توقعات لكل حاجه.. بنسمع كتير من نسوان الحله اننا مفترين ومعقدين وبنحب نسد الحاجة بس ابدا نحن م كدا وكنت بستغرب لم اسمعهم بقولو في حالهم الجماعه ديل بس م كنت بتضايق كنت بفرح عشان نحن في حالنا وم متدخلين في زول ولا بنجيب في سيرة الزول والحاجة دي شجعتنا وخلتنا م نقطع او نبهت زول... وانا شايفه يعني اننا كده بنختصر علينا حاجات كتيره.. قلت ليها انا وجهه نظري شويه مختلفه يعني بشوف انو طلوعنا عادي م بأثر لو نحن متربين ع حاجه م اظن لي تفلت من يدنا وحنكون عارفين نحن شنو وبنسوي فشنو وعارفين تماما الصح من الغلط قالت لي اصلا ماف مفترض زول يطلع الشارع الا يكون فاهم كويس الغلط من الصح والحرام من الحلال ويفرق كويس الحرام من الغلط...لكن انا م معاك ف نقطه الحد ممكن يطلع الشارع بي تربيتو عشان من عاشر قوم اربعين يوم صار منهم وعشان دايما الصاحب ساحب والزميل مميل وممكن اقعد ف شله فاسده ابقى انا منهم لا قدر الله وبرضو الشله الكويسه وعلى فكرة بتحصل كتييييير شديد وكان حصلت لي وحده صحبتي اسمها هُدى و ي هوازن و جنات مهما احكي ليكم البنت دي قدر شنو اتغيرت في لمح البصر وبسبب شله كويسه ياخي م حتصدقو سبحان الله كانو ربنا مختارها بس من بين عبادو زي م حصل معاك ي هوازن بس الاختلاف انها لقت شله عديل... بتذكر انها اتنقبت وحفظت القرآن وكان تقريبا عرست بعدها حفظتو م متذكره عشان م كانت صحبتي شديد كده المهم صحبتها ريان دي كانت منقبه ولو شفتوها ظريفه كيف ياااه بس... تتذكري ي هوازن لم مشينا المول نشتري عشان كان في عروض؟ و وديتك محل فيه بنتين ظريفات كده قلت ليها النعلوووو ديل هن؟ قالت لي ياااهم شفتيهم عسل كيف قالت لي عسل شنو ديل حلاوة بقره بس م شاء الله تبارك الله اخلاقهم على طيبتهم على ملامحهم المريحه بتوريك قد شنو الدنيا بخير.. بجد اللهم بااارك يعني الزول الكويس ده مرات في عيونو ظاهر... جنات قالت لينا م عارفه بس صعب تعرفي الحد د بوش ولا وشين ده نحن اتسيكنا شديد ايام الجامعه بذات يعني كان ف ناس بي خمس وشوش عديل قلت ليها الله يسلمنا... بقينا نتناقش ف حاجات كتيره لم امي دقت تلفون عشان نجي ونجيب معانا جنات وقالت اسرعو عملت ليكم كبسه ورسلت عامر يجيب بارد قلت ليها بوسه ليكك انتي الزيك منووو عاد قالت لي الكلام ده وقت للطقه بس ي فلانه يلا أسرعن عامر د زاتو جاا.. ي مهاااد افتحي الباب لأخوك قلت ليها يلا حبيبه جاين...
