س/ امتى أصلي استخارة وبتكون ازاي ؟؟!!
ج/ لما تكون محتار بين حاجتين من الحاجات المباحة هتصلي استخارة
وده معناه إن ماينفعش أستخير في حاجة فرض أو حاجة حرام زي مثلا ألبس الحجاب ولا لا ،أقوم أصلي ولا لا ،أتعامل بالربا ولا لا ...
أما بقى أمور الحياة العادية أدخل علمي ولا أدبي ،الكلية دي ولا دي ،اتجوز دي ولا لا ...هو ده اللي تستخير فيه وده بيكون كالتالي
1️⃣ تصلي ركعتين زي أي ركعتين سنة بتصليهم تقول الفاتحة وسورة قصيرة وبعدما تخلص صلاة عادي خالص وتسلم
2️⃣ ترفع إيديك بعد السلام وأنت في نفس مكانك وتقول دعاء الاستخارة
اللهم إني أستخيرك بعلمك، وأستقدرك بقدرتك، وأسألك من فضلك العظيم، فإنك تقدر ولا أقدر، وتعلم ولا أعلم، وأنت علام الغيوب، اللهم إن كنت تعلم أن هذا الأمر "وتقول طلبك جواز، كلية، أي حاجة" خير لي في ديني ومعاشي وعاقبة أمري فاقدره لي، ويسره لي، ثم بارك لي فيه، وإن كنت تعلم أن هذا الأمر شرّ لي في ديني ومعاشي وعاقبة أمري فاصرفه عني، واصرفني عنه، واقدر لي الخير حيث كان، ثم أرضني به
*******
س/ أصليها في وقت معين ولا أي وقت في اليوم ؟؟
ج/ أي وقت في اليوم ماعدا أوقات التحريم اللي هي:
1️⃣ من شروق الشمس ولمدة 10 دقايق
2️⃣ قبل أذان المغرب بربع ساعة
3️⃣ قبل الظهر بخمس دقايق
********
س/ طيب لو صليتها وماشوفتش حلم يقولي ده خير أو شر ؟؟
ج/ الاستخارة مالهاش علاقة بالاحلام
بتستخير وتمشي في الموضوع وانت واثق إن ربنا هيقدرلك الخير وهيتيسر لو خير ويتعطل لو شر
