#ديه_الصلح
٠٠٠٠٠٠٠٠٠٠٠٠٠٠٠٠٠٠
البارت__17
سولاف : ركضت على أمل صحت عليها شكو شصاير
أمل : مصيبه وكعت على راسنه ولج ارهابين هاجمين على المقر الي بي احمد وماخذيهم
ولج راح يكتلوهم سوده بوجهي ياخويه
سولاف : عززز شلون هيج صار ليش هو مكانه
هيج خطر
أمل : ولج الوضع مو زين ويكلون صاير انقلاب وبايعيهم اللارهاب
سولاف : عززه ليش هيج صار يمه كلبي يالله ليش وياي ياربي شسويت حتى اتعاقب بهيج عقاااب ياربي اخذني
لمن صار زين وبديت احس بالامان ويا تاخذه
طكيت من البجي لدرجة الكل انتبه عليه
رحت على خاله ام احمد الي ملخه نفسهه توسلت بيها على كيفهه وي روحه وان شاء الله يرجع و مابي شي جانت حالتها تكسر الخاطر وكل ساعه تطلع بره تريد تروح عليه اشوفه مثل الطير المذبوح كعدت يمهه
واهون عليه
مااحس الا وحده كبيره بالعمر جايه تدفرني
وتصيح اتشفي بنت القندره انعل ابوج لا ابوه الخلف والله اذا صار عليه شي روحج مقابل روحه صفنت عليه هاي شبيهه قابل اني شعليه
شنو اني موديته وكايلتله روح لو اني انطيته
الهم
كمت عنها ودخلت لغرفتي يالله شبيها الناس وياي هسه اني عايزه
لحكتني أمل للغرفه فتحت الها الباب
كالت لتحجين شي وحاولي لتطلعين هاي عمتي اخت أبويه ترى تأذيج ومنكدر نسوي شي ابقي هنا
سولاف : ماشي بس فدوه لكلبج اذا سمعتي شي جديد كوليلي
أمل : ماشي
سولاف : احنه جاي نحجي ودخلت عمته موتتني من الكتل عضتني من ايدي وملخت
شعري بلكوه خلصتني أمل من عدهه اخذتهه
وطلعت
كمت ركض قفلت الباب وكعدت اندب على حضي
عشت برعب يومين بلا اكل أمل اجيبلي اكل ومي بالبوكه
كضيتها لو نايمه لو ابجي اكعد احجي ويا نفسي ليش هيج جاي يصير وياي ليش ياربي
ضليت الليل كله كاعده الصبح وجان الصبح الاسود سمعت صوت عياط قوي والدنيا احتركت كمت لبست شال وطلعت
لكيتهم ملخين نفسهم واسمعهم يكلون كتلوهم كلهم جماعه قتلهوهم قتل دفنوهم وقسم قتلوهم وشمرهم بالمي
ماااااات احمد
اي مات شهيد مات هو كان احد ضحايا 1700شهيد مات هو كان من ضمن الي قتلوهم وشمروهم بالمي شايفينه بالتصوير
هذاك اليوم الي بي راحو ضحيته شباب بعمر الورود هذاك اليوم الي خله النايحه لكل بيت
هذاك اليوم الي فجع كلب كل والده والي كسر
كلب كل اب والي يتم كل طفل ورمل كل مره والي كسر ضهر كل اخ وخت اوووف
بقيت جامده بمكاني وبس ادموعي تنزل واني اشوف ام احمد الي مال تحملت الخبر وتخربطت وشلوهه المستشفى واني اشوف
كدامي اخت احمد الصغيره وهيه نصدمت وما تحملت خبر استشهاد اخوهه وكانت صدمه جبيره عليهه لدرجه خلتهه تفقد حياتهه وروحه فارقت جسدها حتى قبل لا يلكون
جثه احمد وامه من صدمه الخبر ضربتهه جلطه بقيت مااعرف شسوي احس بشي نكسر بداخلي نفس ذاك الاحساس من مات عمي
اعيط بس مااسمع صوتي كل هذا صار كدامي
وصار بدل الفاتحه فاتحتين بدال الفاجعه فاجعتين وخلصت فاتحته وهو حتى قبر ماله
