هي

11إلى20

💫هي💫
الفصل الاول: 🖤حقيقة مخفية🖤
"لكل شخص في الموقف حكاية، و للموقف برمته حكاية"
الجزء 11

عندهم هما لي كانو جالسين منسجمين فالهضرة الاء و نعمة لي تفاهمو و تطلقو مع بعضياتهم خلاو قيس غا جالس و تيشوف فيهم مجمعين مدايينهاش فيه، تا عندهم مرتضى

قيس شاف فيه و تنهد: اخويا فين خليتيني مع هاد الجوجات دارولي مشي

مرتضى تيضحك و عينيه عليها تلف عينيه و جلس باش ميعيقش حدا خوها: هاما هانا جيت اعشيري حنا لي نديرولهم مشي دابا

بقاو مجموعين تيضحكو و الليلة دازت زوينة سلاو العشا ديالهم و كلها توجه لدارو

فالسيارة عند مرتضى: كيجاتك الاء

نعمة تتهضر بحماس: فنة فنة فنة تتحمق و ضريفة و متواضعة حبيتها

مرتضى ابتسم: شنو نجيبوها تولي من العائلة

نعمة شافت بيه باستفهام: كيفاش

شاف فيه و طلع حجبانو و هي عاد فهمات و بدات تتهضر و تصفق بيديها فرحانة : حلف حلف، والله اخويا متلقى حسن منها عرفتي راااه تصلاحليك، و لكن هي واش فخبارها

مرتضى: لا ناوي غدا نهضر مع قيس و نطلب يديها و نشوفو شنو تقول

دار يديه على صدرو و تنهد : دعي مع خوك

نعمة من نيتها: الله يسهل ليك اخويا و ياااا ربي تقبل

عند الاء لي كانو وصلو للدار دخلات هي و خوها و كلها توجه لبيتو دارت روتينها و تخشات فبلاصتها قرات سورة الملك و دعاء النوم * اللهم اسلمت نفسي اليك و فوضت امري اليك، و وجهت وجهي اليك و الجأت ظهري اليك رغبة و رهبة اليك، لا ملجأ ولا منجا منك الا اليك، امنت بكتابك الذي انزلت و بنبيك الذي ارسلت* ، و استسلمات للنوم

اصبحنا و اصبح الملك لله

مروان كيهضر بعصبية: شوف نلقاك تما فالوقت تعطل نتفاهم معاك

قطع و رمى تيليفون بشنتة خلا ماماه لالة رُقية و خوه عثمان غير كيشوفو فيه و حاطين الراس على الراس و كيوشوشو

لالة رُقية: مالو هادا

عثمان: و مااانعرف، ناري الواليدة شي نهار يجمعنا يعطينا شي قتلة ديال العصا بلا منعرفو تا شنو درنا

لالة رُقية: اويلي غا سكت انا لي مو و كنخاف منو

عثمان شاف فيها و ميق: اوالو مفيدكش الحنانة لي تخافي من ولادك

لالة رُقية قرصاتو من جنابو: كنخاف من ولد واحد ماشي من جوج

عثمان بقا تيحك فين قرصاتو: العدل و المساواة مكيناش فهاد الدار

و هما كيوشوشو ضار شاف فيهم و هما يضربو الطم

مروان مخنزر: مالكم اش كاين