نبوءة حلم (متوقفة مؤقتاً)

النبؤة الرابعة

بسم الله الرحمن الرحيم

______________________________نبؤة حلم

بقلمي "ريم السلامي "

لاتنسون المتابعة و التصويت لطفاً

ودي ابوگن جدمي و ابعد
ودي افك باب السنين
السودة و اشرد
ودي لكن ..
شدو برجلي جرس
يشهد عليه
و بس اشيلن خطوتي
الحرس تگعد

......................................................................

_عبد العزيز: ويييين نصرة شنو كل ما اذلف وحدة ترد على گلبي

_ادهم: على كيفك عبد ترى رجلها صاير عندو شغل و خلاها هين چم يوم و يرجع

_نصرة: عبد العزيز ما جاوب ادهم بس طلع من الغرفة اعصاب دحگت عليه امي بنظرة معناها تجاهلي ما يخالف ما بدر مني شي بس انقهرت بداخلي ادهم ما خلص ريوگو من وراي و طلع
عدلت شالي زين و شلت الصينية على المطبخ و غسلت المواعين شوية و جت وراي رؤى زوجة ادهم

_رؤى:هلا نصرة شلونج

_هلا عيني الحمدلله

_اخبارج اخبار عيلتج مرتاحة وياهم

_ما ردت ادخل بالتفاصيل اخباري زينة ان شاءالله وعيلتي كذالك الحمدلله

_دومج مرتاحة روحي اگعدي يم عمتي اني راح ابدي بالغدى

_ماشي عيني
رحت ع امي چانت گاعدة عند شباك الغرفة و الشمس ضاربة ويا لون عيونها الازرك وفاتحة شعرها تمشط بي اخذت المشط منها و مشطت شعرها على كيفي و الشيب ماخذ النصيب الاكبر من لونو و الباقي مو اسود حيل مخلية بسدها دهن الشعر ريحتو طيبة
خلصت تمشيط و ظفرت شعرها لحد الان محد سولف اي كلمة اخذت ظفايرها و لفتهن على راسها و لبست قطعة قماش بيضا يسمونها صمادة و فوگاها ملفع البريسم استغربت عبير ما اكو سألت امي

يما عجل عبير وين ماشفتها

_بالفلاحة هيا و البنوات راحت عندنا شغل

_هممم نسيت سالفة الفلاحة

_لا والله عبير مبتلية خطية

_بلچي ربج يجبر بخاطرها

_بلچي

_گعدت عند امي و تناقشنة بأمور عادية لحد ما صار وكت الغدا طلعت اتمسح على التانكي برى و لمحت
عمر ابن مؤمل بالتركتر طلع خارج الحوش رجعت على البيت مديت سجادتي و صليت گعدت على.السجادة. اسبح و ادعي حسيت امي طبت على الغرفة لميت سجادتي و احترفت اتأكد انها امي
يمه شمسوين غدا

_تشريب لحم و تمن ابيض ادهم منادي ربعو على الغدا

_الله عفية ميته من الجوع صبيتو

_بعد عيني يخسي الجوع جعد تصب رؤى گومي عاونيها و ديريلنة صينية

_ابتسمت لأمي وسفطت السجادة لگحتها بطريقي على المخدة سديت الشبابيج و رحت على المطبخ