- ခိုင်ညှာတံ ပွင့်လန်း ပန်းသို့နှယ် -
၁၉၅၃ ဧပြီလ (၁၂) ရက်၊ မဟာသင်္ကြန်အကြိုနေ့။
" ဟယ် ပိတောက်ပန်းတွေ "
ဝေ အိမ်ပြန်လာလာချင်း ဧည့်ခန်းတွင် ပိတောက်ပန်းခက်များစွာနှင့်အတူ ချိုသာအေးမြသောအပြုံးဖြင့် ရပ်နေသည့် မေရီ့ကိုတွေ့လိုက်ရသည်။
" မမဝေအတွက် ရီကိုယ်တိုင်ခူးလာတာ "
" ကျေးဇူးပါပဲ ရီရယ် သိပ်လှတာပဲ "
" မမဝေ ဘယ်သွားနေတာလဲ ရီဖြင့်မနက်ကတည်း လာစောင့်နေတာ မမဝေကို ပိတောက်ဦးပန်ပေးချင်လို့ "
မေရီ့စကားကိုကြားသောအခါ မမဝေက အားတုံ့အားနာ အပြုံးဖြင့်
" အယ် မမဝေက ဥပုသ်ယူခဲ့ပြီ ရီရဲ့။ ၈ ပါးသီလခံထားတာ ပန်းပန်လို့မရဘူး "
" ဟင် "
" ဟုတ်တယ် ဒီကနေ့က ဥပုသ်နေ့လေ အဲတာ မနက်က ဘုန်းကြီးကျောင်းကို ဆွမ်းသွားကပ်ရင်း တစ်ခါတည်း သီလယူခဲ့တာ။ ဘုန်းကြီးကျောင်းကအပြန် ငါးလည်းသက်စေ့လွှတ်ခဲ့သေးတယ်။ အဲတာကြောင့်ကြာသွားတာ "
" ဒါဖြင့် ပိတောက်ပန်းတွေ ဘယ့်နှယ့်လုပ်မလဲ မမဝေရဲ့ "
" လွယ်ပါတယ်ကွာ ရီလည်း ကုသိုလ်ရအောင် ဘုရားလှူတာပေါ့ မဟုတ်ဘူးလား "
မမဝေက ပြောပြောဆိုဆိုဖြင့် ဘုရားစင်မှ ပန်းအိုးနှစ်အိုးကို ယူကာ ပိတောက်ပန်းများဖြင့် ဝေနေအောင်ထိုးလိုက်သည်။ အိမ်လယ်ခန်းရှိ ပန်းအိုးလေးတွင်လည်း ပိတောက်ပန်းများထိုးကာ အလှဆင်သည်။ သက်ဝေ၏ အိမ်ကျဉ်းကျဉ်းလေးထဲတွင် မေရီ့၏မေတ္တာဖြင့်ထုံမွှမ်းထားသော ပိတောက်ပန်းရနံ့များ သင်းပျံ့ကြိုင်လှိုင်နေသည်။
" မနက်ဖြန်တော့ စောစောလာပြီးကို ရေလောင်းဦးမယ် "
" မနက်ဖြန် ရီ ဒီကိုမလာနဲ့လေ မမပဲ ရီ့ဆီလာခဲ့မယ် မုန့်လုံးရေပေါ်စားချင်ရဲ့ဆို ကြီးစောနဲ့တူတူ လုပ်ကျွေးမယ်လေ ပြီးတော့ သာကူပြင်ရော "
" အင်းပါ အဲတာဆိုရင် အိမ်က စောင့်ပြီးကို ရေလောင်းမယ် "
" သဘောပါရှင် သဘောပါ "
ESTÁS LEYENDO
ချစ်သက်ဝေ
Romance"သက်ဝေ" ဆိုတာ အသက်တမျှ၊ အသက်နဲ့ထပ်တူ ချစ်မြတ်နိုးရတဲ့သူလို့ ဆိုလိုသတဲ့။ မေရီ့အတွက်တော့ "သက်ဝေ" ဆိုတဲ့ အမျိုးသမီးကို အသက်ထက်တောင် ပိုပြီးတော့ ချစ်မြတ်နိုးခဲ့ရပါတယ်လေ...။ "သက္ေဝ" ဆိုတာ အသက္တမၽွ၊ အသက္နဲ႔ထပ္တူ ခ်စ္ျမတ္နိုးရတဲ့သူလို႔ ဆိုလိုသတဲ့။ ေမရီ့အတြ...