حكايات رونى

ولهان .. والقصر الملعون

ولهان ... والقصر الملعون ..

فى مملكة الدرب الاحمر وقف امير الجان قصاد ولهان وقال
-: انت بتعصانى يا ابن الجنية ودى مش اول مرة .. انا قررت انفيك للارض ومش هترجع لهنا تانى غير بعد ١٠٠ سنة ..

ولهان : هو انت هتزلنى كل شوية تقولى هنفيك هنفيك طب يا عم انا اصلا مش عاوز اعيش فى المملكة دى ..

جت نوران زوجة امير الجان وقالت
-: اهدى يا ولهان مش كده وبعدين يا اميرالجان  متنساش ان ولهان خاطب بنتنا سرحانة .. هيتجوزها ازاى بعد ما نفيته للارض

الامير : اعتبر ان الجوازة دى منبوذة ومش هتم يلا اخرج برا مملكتى والا هسخطك تعبان

ولهان : انا اصلا خارج هى يعنى جنة دى جهنم يكش تولعوا كلكم اكتر ما انتم والعين ..

-----
خرج ولهان وكان ماشي فالشارع وهو بيكلم نفسه وقال
ولهان :هعمل ايه انا دلوقتى بعد ما طردونى من جهنم .. هروح فين منك لله يا بنى ادم يا ابن البنى أدمين

قابله صحبه سمعان وقال
-: ايه يا عم الى مخرجك فى وقت زى ده ده الجو برا برد اوى ..

ولهان : امير الجان طردنى من المملكة وكل ده بسبب ولاد الانسية

سمعان : ودول عملولك ايه ! ياما قولتلك متقربش منهم ليحرقوك ..

ولهان : عملهم احمر ومنيل بجاز تخيل انى كنت شغال عادى عالبحث بتاعى وقلت اعمل مشروع عن التغيرات المناخية

سمعان : اه اه عارفها مش دى بسبب السحابة السودة وثقب الازون

ولهان : اه تخيل انى نزلت مصر وقلت اشوف حال المصريين هناك ..

سمعان : ده انا لسه جى من هناك حالهم يصعب عالكافر

ولهان : اه ما هو طلعت لواحد ووسوستله يطلق مراته قالى مش متجوز

سمعان : يا خسارة طب قوله مثلا كان يقوم يسهر فى كباريهات ده الستات هناك غلبو الشياطين

ولهان : طلع معهوش فلوس ده مفلس ده انا كنت ناقص اطلع من جيبى واصرف عليه

سمعان : طب ينتحر ويخلصنا

ولهان : قالى معهوش فلوس السم

سمعان : لا كده كتير طب وانت عملت ايه ..

ولهان ؛ طلعتله كل الفلوس الى معايا وكمان كتبتله حته ارض صغيرة على النجم القطبى يعيش على ارباحها

سمعان ؛ لا انت كده غلطان ملكش حق

ولهان : اه امير الجان لما عرف طردنى .. هروح انا فين دلوقتى

سمعان : معلش بقى انا مضطر امشي لازم ارجع البيت زمان الامير مستنينى انقله الاخبار
----
فى المملكة

كان تيمون اخو ولهان قاعد قدام التليفزيون دخلت تمارا وقالت
-: يا ميلة بختك فى ولادك يا تمارا واحد عبيط والتانى اهبل