حكايات رونى

حماتى ازمة حياتى

اسكريبت ..

دخلت عبير لاوضة بناتها وقالت وهى بتفتح الشباك
-: اصحى يا موكوسة منك ليها اه يانى مخلفة بنات زى قلتهم .

قعدت رباب وقالت
-: فى ايه يا ماما ما النهاردة اجازة عوزانا نصحى بدرى ليه طيب..

عبير: وشغل البيت ده مين هيعمله مش كفاية عليه جدتكم والى بتعمله فيه ..

نيرة : والى بتعمله تيتا هاطلعيه علينا بصي يا ست الكل انتى انزلى روحلها واحنا نص ساعة نص ساعة بس وهنصحى تلاقى الدنيا زى الفل

عبير: متنسوش الغسيل الى عالحبل والى فالغسالة واه كنت هنسى ابقى شيلى السجاد عشان الارض هتتمسح ..

عبير خلصت كلامها ومشيت ونيرة نامت على السرير تانى ورباب قالت
-: هو بعد كل الكلام الى سمعتيه ده لسه هتنامى ..

نيرة : نامى نامى .. امك طالما  نزلت تحت مش هتطلع غير المغرب لما نصحى براحتنا نبقى نعمل الى ماما قالت عليه ..

رباب : تصدقى عندك حق يلا اهو الواحد يخطفله حلم عالسريع ..

جت سمر وقال : لو مصحيتوش انتى وهى انا هنزل وافتن عليكم وهقول لتيتا انكم نايمين مبتعملوش حاجة ..

رباب بصتلها بغيظ وقالت
-: تصدقى انك غلسه وانا الى كنت ناوبة اديكى ١٠٠ جنيه الشهر ده من مصروفى يلا خسارة فيكى

سمر: احم استنى انا مش بحب الفتنة اصلا وبعدين شغل البيت ما يتاجل عادى هو فى احلا من النوم

نيرة : طب اقفلى الشباك بقى وتعالى نامى جنبنا وانا كمان ناوبة تديكى ٥٠ من مصروفى

ابتسمت سمر وقالت
-: ايدكم على ١٥٠ الاول انا مضمنش انكم اما تصحوا تدونى حاجة ..

رباب: اووف بقى النوم شكله هيطير من عينى بسببك انا هقوم اخلص شغل البيت وابقى ارجع انام براحتى

وقفت رباب وكانت خارجة من الاوضة وسمر قالت
-: طب وال١٠٠ جنيه ايه مش هتدهانى

رباب: لا ما انا خلاص رجعت فى كلامى ..
----
عبير كانت نازلة عالسلم وشافت الدخان طالع من شقة فوزية حماتها
عبير : حماتى دى مش هترتاح غير لما تولع فالشقة كل يوم تولع بخور ونار لما هتجيب اجلنا ..

جت امل وقالت : مالك يا عبير واقفة بتكلمى نفسك كده ليه هى عفاريت فوزية هتطلعلنا ولا ايه

عبير: اهو انتى شايفة حماتك كل يوم تلاقيها مولعة البخور وقاعدة تبخر حازم فى الطالعة والنازلة ولا كانه عيل صغير خايفة عليه يتحسد

امل: هههه هى فوزية كده هنعمل ايه بقى مفترية المهم انا هطلع شقتى اجيب حاجة وانزل تانى ...

وفى شقة فوزية ..

كانت فوزية قاعدة مشغلة البخور وجنبها ابنها حازم
فوزية : من عين عبير مراتك وبناتك الاربعة ومن عيد ام سيد جارتنا ومن عين الى يشوفك وميصليش عالنبى