قهوة

مقدمة

ندفات مال ثلج چانت توگع على ايده الي فاردها گدامه ، عيونه تراقب سقوطهن واحدة ورة الثانية و هن ينصهرن بحرارة جسمه ، شفته راسمة ابتسامة عريضة بسبب موت و تحلل كل واحدة من هاي الندفات على بشرته

اول مرة بحياته يشوف الثلج، هواي اشياء سواها للمرة الاولى هالسنة بالواقع ، اول مرة يسافر و يزور دولة غريبة، بالاخص تبعد عن دولته آلاف الكيلومترات، اول مرة يترك اهله، اول مرة يحب الحياة... صدرت عنه قهقهات ناصية و مستمتعة و هو متناسي برودة الجو، راسه جاي يبحر بهالندفات البيض الي خلنه ينسى هو ليش واگف هنا و صافن

اللون الحنطي لبشرته چان يمتص هالثلج و يذوبه بحرارته، باوع على ايده الي انملت مي و سدها، رجع فتحها من جديد، شعره الاسود تجمد نوعاً ما، و خدوده توردن بسبب ملاطفة البرد لهن

شهيق عميق و زفير طويل مخلي سحابة تتكوم گدام وجهه، تقوست عيونه بأبتسامة اكبر من الي سبقها و احتضن نفسه الي تناساها لكم دقيقة ، يفرك كفوفه على زنوده حتى يزود جسمه بالدفو

مدينة نوفوسيبيرسك، الجزء الجنوبي الشرقي من روسيا ، طالب عراقي من الاوائل على الدفعة بتخصص الكيمياء الذرية، سفروه على حساب الدولة حتى يدرس بروسيا مع رهن بيته

خريج دفعة سنة 1995 بعد احداث حرب الشيشان و روسيا

چان اول ثلج يوگع من اشهر من جيته، حياته كلها مرتبطة بالبرد و الثلج و الشتا، لدرجة امه سمته ( شَبَم) تيمناً باليوم البارد الي ولدته بيه

تعلم روسية ركيكة للان بفضل اصدقائه ، هو شخص اجتماعي لكن خجول، ممكن يكون هادئ اول ما تتعرف عليه، لكن بعد ما تتعرف عليه تحسه شخص مختلف بالكامل شخص ممتلئ طاقة و حياة و مستحيل تخليه يسكت

اشترى ساندويتش بيض و خضروات بطريقه للكلية و بقى يراقب السماء متناسي المحاظرة الي عالاغلب بدت حالياً ، لفت نظره شخص عالطرف الثاني من الجسر الي واگف عليه ، رجال بمنتصف عقده الأربعين جاي يحاول يفتح علبة المي،  چان يگدر يستخدم اسنانه بس ما سواها، گاعد على واحدة من المصاطب الي تطل عالجسر و يحاول بكل قوته يفتح قبق البطل بأيد واحدة بين ما ساند باقي البطل على خصره

بالنهاية شمر البطل بعصبية و طلعت منه صرخة بؤس و هو يتنفس قوي، شبم لقى شي ثار اهتمامه اكثر من الثلج حتى يصفن عليه، دخل ايديه بجيوبه و استمر يراقب هالشخص الغريب ، شخص بنيته ضخمة و الزي العسكري برتبة جنرال، بشرة قمحية و شعر يعكس النور مال شمس من صفاره، مبين عليه خذلان و ارهاق و تعب

بدون احساس تقرب شبم و عبر الشارع الفاصل بينهم ، بين ما افكار الثاني باحرة بأحداث قبل سنة من هالوكت

عام 1994 قرأ الخبر المتصدر بالصحيفة الروسية

"شنت القوات الروسية على ثلاثة محاور هجوما بريا باتجاه غروزني. اوقف الهجوم الرئيسي مؤقتا بسبب نائب قائد القوات البرية الروسية، الجنرال ادوارد فوروبيوف، الذي استقال احتجاجا، وذكر أن «إرسال الجيش ضد ناس من نفس وطنه جريمة». كثيرون في الجيش الروسي والحكومة عارضوا الحرب كذلك"

وصل شبم گدامه و شال البطل مال مي من الگاع و فتحه وراها سلمه للثاني بدون ابتسامة، راقبه الاكبر بهدوء، الفضول چان اكبر من مجرد "عمل خير" بالنسبة لشبم ، الثلج مستمر ينزل و اخذ حيزه لداخل البطل مال مي ينصهر داخله ، الاشگر رفع عينه عليه بهدوء و بدون اي ردة فعل، اختلاف البنية و العمر بينهم واضح

صراع شب ما بين برود زرقة عيون الاشگر ضد دفو بنيات عيون الاصغر، بعد فترة ما حسبوها شگد، گال الاشگر بنبرة متهالكة متعبة و هادئة يحس الدنيا جاي تحشره بخزانة ضيگة ما يگدر يتنفس داخلها

" мне не нужно.... твое сочувствие"
ما احتاج لعطفك

شبم رمش بصدمة : اشاركك؟؟ تقصد اشرب اني منه اول؟ ترا ما حطيت شي بيه فتحته گدامك هياتني، قابل شستفاد اذا سممتك ؟ لو لان اشگر و عيونگ زرگ رافع خشمك علينا، ترا ما اشتريك بفلس

چان شبم ناسي روحه و يحچي بالعراقي بسبب سوء فهمه بكلمة соучастие بدال сочувствие و الي تعني مشاركة بدال التعاطف، رفعله الاشگر تك حاجب و هو ما مفتهم و لا كلمة طلعت من حلگ الثاني بس صافن على حركات وجهه و ايده الساخرة ، گاعد على نفس وضعيته بدون اي حركة بين ما الاصغر يتخصر، حاول الاشگر يفسر شخصية الي مقابيله

شخص اجتماعي خجول، عجول و منفعل (قدرته الحالية بفهم الروسية 50 بالمية)

End

رواية قصيرة / خفيفة / لطيفة