اسكريبتات بقلم الكاتبة «حنان محمد»©

الثامن

-  بص اول حاجه نتبل الفراخ.
-  فراخ ايه اللى نتبلها؟
-  هنتبلها بفلفل اسود ولمون وبصل.
-  يابنتى هو انا سالتك اصلا!!.
-  وبعدها نقطع البطاطس شرايح كدا وجزر كمان وفلفل  بص اى خضار عندك حطه.
-  فقره الشيف حسن دى هتخلص امتى طيب؟!.
-  بعدين بقى نحط فلفل اسود ومكعب مرقه ونسيبهم هما كمان يتبلوا زى الفراخ عشان ميزعلوش.
-  ابقى فكرينى اقطع علاقتى بيكى ماشى!.
-  وبعدين نحطهم ع بعض بقى ونحطهم فى الفرن اول ما تحس انهم هيتحرقوا تقوم مطلعهم.
-  خلصتى؟!.
-  وبكدا تكون عملت اجمل صنيه بطاطس بالفراخ تحت رعايه شيف حنون!   ،  استنى بقى ادوقها واقولك حلوه ولا لا.
-  هو كل اكله هتعمليها هتقلبى الشات  cbc سفره كدا؟!.
-  تاخد بطاطسايه؟!.
-  اعملك بلوك؟!.

هى ليه الناس خلقها بقى ضيق كدا!
ليه الانسان مبيتحملش اخوه الانسان!
ايه يعنى لما اقعد احكيله ع  اكله عملتها اليوم كله!  ،  حصل حاجه؟ 
والله ما حصل حاجه
دا المفروض يشكرنى اصلا انى بقوله ع معلومات  ،  يقدر يقولى مين اصلا اللى هيعمله يعمل صنيه البطاطس بالفراخ  فى الفرن ازاى!.
هو ليه مش مقدر ان عنده صاحبه فريده من نوعها زيى!
اتخلى عنه يعنى!!.

-  اعلمك تعمل عصير جوافه باللمون ازاى؟!.
-  انا اصلا مهزء عشان قولتلك خدى سكن لوحدك.
-  طيب البرتقان بالجزر.
-  يابنتى بقى ارحمينى،  ارحمى امى ياحنان برتقان وجزر ايه!.
-  بيبقى طعمه حلو اوى علفكره!.
-  ابقى فكرينى لما اشوفك اولع فيكى.
-  ايه دا انت هتشوفنى!.
- لا هقعد طول عمرى اتأمل فى كلامك ع الشات.

وماله الشات؟ 
وحش الشات!
ما سكر وبسمسم اهوه  ،  ليه بقى نتقابل!.
ما نفضل كدا ونتقابل فى الاخره بقى وخلاص،  ليه الفرهده والتعب فى الدنيا! 

-  مصطفى هو لازم نتقابل؟!.
-   لا طبعا..
-  رديت بفرحه...  بجد  ،  طيب خلاص انا...
-  يوم الاربع لو اتاخرتى هاجى اخدك من السكن ماشى!.
-  علفكره انت صاحب مش جدع.
-  تمام نشوف الحوار دا لما اشوفك.
-  ما خلاص ياعم دا انت عايز تشوفنى جدا مش معقول كدا!.

قفلت معاه وكنت بلف فى الاوضه ومش عارفه اعمل ايه بجد
هو انا اللى وافقت انى اقابله صح!.
ينفع ارجع فى كلامى طيب؟
انا عيله صغيره والله!.

بعت ليه تانى..

-  هو لازم نتقابل بجد؟!.
-  ارن عليكى؟!.
-   طيب تصبح ع خير .

انا وهو صحاب من خمس سنين
خمس سنين بنتكلم شات
خمس سنين بنتكلم وبنحكى لبعض كل حاجه..
بطبيعتى شخص قافل ع نفسه،  مبيتعرفش ع حد ولا بيحكى لحد اى حاجه تخصه،  بس من وقت ماهو دخل حياتى كل دا اتغير وبقى كل تفصيله فى حياتى هو عارفها...
معرفش عدوا ازاى الخمس سنين كدا،  بس انا اكتشفت ان بقالنا خمس سنين فعلا نعرف بعض..
كتير الخمس سنين اصلا انا هقطع علاقتى بيه اصلا ومش هقابله.
ايوه انا قررت خلاص!.