اسكريبتات بقلم الكاتبة «حنان محمد»©

السادس

- تعرف انى مُكتئبه وحزينه؟.
-  لا مش عايز اعرف وقومى من جمبى!.
-  ويعنى لما ارميك فى البحر دلوقت هتتبسط!.
- حنان قومى من جمبى بجد!.
-  واكتئب واحزن لوحدى،  يرضيك يعنى لو يرضيك انا...
-  اه يرضينى.
-  هضربك بالقلم!.
-  خلاص انا اللى هقوم.
-  خلاص خليك وهضربك بالراحه،  ايدى صغيره ومبتوجعش.
-  ابتسم..  حنان انتى بتبررى ايه؟.
-  انا بجد مكتئبه وحزينه..
-  وبعدين.
-  خرجنى وفسحنى وابسطنى وضحكنى..
-  انتى بتختارى اى حاجه على نفس القافيه وخلاص!.
- خلى بالك انت بتسخر من احزانى ودا شئ لا يحتمل بصراحه.
-  وتتحمليه ليه،  قومى من جمبى ومتتحمليهوش!.
-  انت عايز تنضرب بجد،  قول بس متتكسفش!
-  اتنهد بتعب..  حنان انا عايز اقعد لوحدى.
- ما انا فاهمه انك عايز تترزع لوحدك،  وانا مش هسيبك تقعد لوحدك.
-  دا ليه بقى ان شاء الله؟!.
-  عشان مش اسيبك لدماغك،  ولو سيبتك لدماغك هتفضل تفكر كتير اوى وممكن يجيلك افكار لا تتخيلها قد تؤدى الى الشعور بانك ترغب فى القفز فى الماء.
-  القفز فى الماء.
-  ايون ثم تغرق وتعمل بوء بوء بوء.
-  لا متخافيش انا بعرف اعوم ومش هعمل بوء بوء.
- طيب ما تعلمنى اعوم ازاى.
-  يابنتى بقى ارحمينى وسبينى فى حالى!.
-  ولما انا اسيبك فى حالك مين هيسبنى فى حالى!.
- انتى بتقولى ايه؟.
-  عايزه اشرب عصير قصب.
-  هنا عايزه تشربى عصير قصب هنا ياحنان!.
-  ايه هو حرام ولا من الممنوعات!.
-  لا بس احنا ع البحر والوقت اتاخر اجيبلك عصير قصب ازاى دلوقت!.
-  يعنى مش هتجيبلى!  ،  طيب انا حزينه ومكتئبه!.
-  يادى النيله  عليا.
-  الدنيا مرهقه صح!.
-  بص ليا بحزن..  جداا..
-  بس دى دنيا!.
- ودا اللى مهون والله  ،  اللى بيهون عليا انها دنيا مسيرها هتنتهى،  بس بيجيلك وقت ومبتقدريش تتحملى كم الضغوطات اللى حواليكى  ،  وانه كل ما تعدلى حاجه تلاقى حاجه تانيه باظت فبتلاقى طاقتك فجاه خلصت وبتقعدى مش عارفه تعملى ايه...
-  تعرف انا بعمل ايه لما يحصلى كدا..
-  بص ليا بإهتمام..  ايه؟!.
-  بقابلك  ،  لما بشوفك وبقعد معاك بلاقى طاقتى  بترجع تاتى وبقدر اواجهه العالم تانى.

" كان بيبص ليا وساكت 
كنت عايزه اقوله ينفع الشعور يبقى متبادل،  ينفع انت كمان تاخد طاقتك منى!
ينفع اكون الركن الهادى ليك زى ما انت كدا بالنسبالى.
ينفع اواجهه العالم معاك!.  "

- يأست من انه يتكلم فـ بصيت للبحر واتنهدت وبعدها اتكلمت....  الجو هنا حلو اوى..
-  اقولك حاجه؟!.
-  ايه..؟  ،  بقيت مكتئب وحزين؟!.
-  لا طاقتى رجعتلى..
-  ضحكت.. نشرب عصير قصب بقى!.

لـ حنان محمد