اسكريبتات بقلم الكاتبة «حنان محمد»©

الخامس والثلاثين

-   انا مضايقه ومخنوقه.
-  قومى ذاكرى وانتى هتفكى..
-  وهوا دا وقت مذاكره؟!.
-  يعنى دا وقت  خنقه؟!
-   هوا انا اللى خنقت نفسى يعنى!  ،  انا كنت قاعده فى امان الله لاقيت الخنقه جايالى لوحدها.
-  يعنى مش انتى اللى قعدتى تفكرى فى حاجات حصلت من يوم ما اتولدتى ولا افتكرتى حاجات حزينه متخصكيش اصلا واتخنقتى وبقيتى مضايقه!!
-  تؤتؤ دى جت لوحدها من ربنا كدا.
-  طيب ذاكرى وهى هتروح من ربنا برضو.
- منك لله...
-  نعم!!.
-  انا عايزه اخرج.
-  نامى ياحنان..
-  اتنهدت تنهيده طويله..  انا عايزه اخرج بجد دماغى مش قادره تفصل،  عقلى مبيقفش،  انا تعبت واتخنقت وجيبت اخرى حقيقى جيبت اخرى..
-  البسى وانا مستنيكى تحت...

قفلت معاه ولبست ونزلت ليه لقيته واقف وبينفخ فى ايده عشان يدفيها اول ما شافنى نازله ابتسملى...

انا مخنوقه فعلا  ، كلمته عشان هوا اللى هيقدر يفهمنى لو حكيت هيقدر يفهمنى حتى لو فضلت ساكته ومتكلمتش زى دلوقت...

-  عامله ايه؟.
-  بصيتله وسكت..
-  ازيك طيب..؟
-   هوا انا لو قولتلك انى عايزه اعيط هتعمل ايه...
-  مد ايده ليا  ، همد ايدى ليكى كدا وهقولك...  عيطى.
-   ولو قولتلك مش عارفه.
-  مش عارفه تعيطى!!.
-  اه...   قعدت مكانى واتنهدت..  عارف احساس انك مخنوق وفيه حاجه جواك كبيره كدا وانت حتى مش عارف توصف اللى جواك لو حد سألك مالك دا صعب اوى،  انا مش عارفه انا مالى بس فيه حاجات كتير اوى جوايا مخليانى تعبانه بس مش عارفه اقولها
  بصيتله... انت فاهمنى!!
-  كل دا حصل وانا معاكى؟!.
-  تخيل!!.
-  اجيبلك ايس كريم  معايا؟!.
-  ايس كريم ايه،  يابنى انا بحكى احزانى دلوقت!.
-  هجيبلك ڤانيليا  ،  استنى هنا..
-  فضلت واقفه وانا باصه عليا وهو ماشى،  هو الواد دا غبى،  انا بسحب كل الكلام اللى قولته عليه وهوا لا بيفهمنى ولا اى زفت ع دماغه...

-  خدى الايس كريم دا..
-  اخدته منه وفتحت وبدأت اكله وانا مش طايقاه...
-  بص فى عينى..  حاسه ب ايه؟!.
-  بوجع فى سنانى..
-  لا من جواكى..
-  انى عايزه اقتلك...
-  ضحك  ،  يابنتى مش انتى قولتى قبل كدا لما بتكونى مخنوقه بتبقى عايزه حد جمبك ويجيبلك ايس كريم.
-  بصيتله بإستغراب..  قولت كدا امتى؟!.
-  فى الحلم،  كلى ياحنان...

ابتسمت لما افتكرت انى كتبت كدا ع استورى مره  ،  هوا فاكر دا ازاى...؟.

-  انا فاهمك...
-  بصيتله..  ايه؟!.
-  انا بفهمك لما بتتكلمى وانتى مخنوقه ومش عارفه تجمعى  ،  بفهمك وانتى مضايقه ومش عارفه تعبرى عن اللى جواكى  ،  بفهم كلامك اللى شايفاه مش مفهوم...
بص ليا..  عشان كدا اتكلمى دايما من غير ما تقلقى وانا هفهمك..

-  نرجع الكلام اللى قولته تانى..
-  ايه!!!
-   ابتسمت، هوا انا ممكن اقولك حاجه؟!.
-  ابتسملى بحب..  قولى..
-  انا عايزه ايس كريم.

حنان محمد