احببته قارئا

محاوله التقرب من الله

#بارت1

(هو انت جيت منين، حبيتك بالتلاته.. سهرانه بتاع يومين عاوزاك....)

"يا بنتي اقفلى الزفت  ده بقه، احنا قولنا ايه؟"

"حاضر يا ست الشيخه لا مؤاخده😁"

"لو مش قادره تبطليها على الاقل متخليش حد يسمعها بسببك وبعدين يحبها وتشيلى ذنبه"

" خلاص يا مريم انا اسفه وهحاول ابطل اسمع اغانى، بس برضو انا مش مقتنعه يعني الاغانى حرام ليه،  طيب لما اتخطب او اتجوز اعبر عن فرحتى ازاى!  اعمل فرحى ازاى!؟  منغير ما افرح وارقص واتنطط كدة،، هفرح ازاى انا ها! "

"إحنا مش كل مرة اللى هنعيده هنزيده يا أمنيه، بجد انا مش عارفه اللى هقولهولك صح ولا غلط بس انا تعبت جدا ونفسي اشوفك على الصح، انتِ صحبتي واقرب حد ليا ومليش ف الدنيا دى غيرك واتمنى نكون مع بعض فى الجنه زى ما احنا مع بعض فى الدنيا يا امنيه ارجوكى حاولى علشانى 💔

سكت وبصتلها وانا حاسه بحبها ليا وقد ايه هى بتحاول تساعدنى بس كل الحكايه انامش مقتنعه وعاوزة اللى
يقنعنى اكتر ويفهمنى

" بُصى المحل اللى هناك ده باين عليه حاجته نضيفه  هروح اشوفه كملى اكل انتِ وحصليني"

" تمام "
(رب السموات والأرض وما بينهما فاعبده واصطبر لعبادته هل تعلم له سميا )

ايه الصوت ده!....منين ده، قومت وانا بدور عن الصوت اللى فى لحظه حسيته بيطبطب على قلبي وحسيت قد ايه انا عاوزة اعيط وقد ايه انا حاسه باحساس غريب مش عارفه ايه هو... فضلت امشى ورا الصوت لقيتنى واقفه عند سوبر ماركت دخلت  وبتردد سألت البياع

"هو مين اللى بيقرأ قرآن ده لو سمحت؟"
بصلى وكان راجل كبير مُلتحى وابتسملى ابتسامه نورت وشه  قالى
" والله مش عارفه أصل ابنى هو اللى بيشغل القرآن وبيسمع اكتر من شيخ، هو جاى كمان شويه لو عاوزة اسألهولك "

طبعاً مكنش ينفع استنى لانه ممكن الراجل يفهمنى غلط فشكرته ومشيت وقولت انى هبحث عنه فى اليوتيوب او فى اى حته
"كنتى فين يا امنيه انا خرجت من المحل ملقتكيش"

"لا ابدا كنت بس هنا فى السوبر ماركت بسأل عن حاجة'

"حاجه ايه؟ ومال وشك كده، انتِ كويسه؟، حصل حاجه؟"

"لا مفيش يا مريم يلا بينا بس علشان منتأخرش"

مشيت وانا حاطه الهاند فري وبسمع اغنيه هاديه خدتنى لعالم تانى.......عدت الايام والشهور وفى يوم صحيت الصبح لقيت رساله من حسام فتحتها وكانت الصدمه بالنسبالى كان بيقولى انه آسف وانه غصب عنه هو بيحب واحده تانيه وانه كان بيحاول الفتره اللى عدت يكون معايا وليا بس، لكنه مقدرش.....حسيت بتنميل فى جسمى والدنيا لفت بيا، هو كان اكتر شخص بيفهمنى ومستحمل كل عيوبى ودايماً واقف معايا واكتر حد بيخاف عليا وعلى زعلى هو اللى كان سندى بعد موت بابا، ليه يا حسام تكسرنى كدة ده انا كنت فاكره انك عوض ربنا ليا وان الدنيا لو ادتنى ضهرها انا مش هيفرق معايا لانى هجرى واستخبي فى قلبك وساعتها انت هتطبطب عليا وتاخد منى كل الوجع وكل العذاب اللى شوفته
وانا فى وسط حزنى وعياطى افتكرت صوته وكنت مستغربه جدا، حسيت كأنها إشارة من ربنا انى افتكره وخصوصاً انى كنت نسياه واول مره سمعته كان من شهور وده اللى خلانى بسرعه اخرج اللاب توب بتاعى وعملت سيرش على اليوتيوب بنفس الايات اللى سمعتها فضلت ادور كتير لحد ما لقيته
حطيت الهاند فرى وشغلت القرآن بصوته كنت حاسه انى متخدرة حرفياً،، كل الالم اللى فى قلبي مكنتش حاسه بيه كنت سامعه بس صوت ربنا وهو بيطبطب عليا بآياته وقرآنه ولمست المسافه الشاسعه والاسوار اللى انا حطاها بينى وبين ربنا...صوته خلانى عاوزة اصلى... انا هقوم اتوضى واصلى
وفعلا قومت اتوضيت ولبست الاسدال وصليت ومع اول سجده فضلت اعيط واعيط واشكى لربنا همومى واعترفله بذنوبي، كانت اول مره احس فيها ان ربنا سامعنى واول مره احس انه فيه حد قريب منى اوى وفاهم كل حاجه انا بوصفها ومن قبل ما اوصفها هو سبحانه عالم بيها
خلصت صلاة وانا مرتاحه جداً، جبت الفون بتاعى وعملت لحسام بلوك من كل الابلكيشنز ودعيت ان ربنا يربط على قلبي ويسامحني على ذنبى ويعوضنى خير، لانه سبحانه عالم  انى كنت ضعيفه ومكنتش عارفه انه علاقتى بيه حرام وغلط لانى كنت بعيده عنه سبحانه..بس من النهارده مفيش حواجز واكيد مريم هتفرح بقرارى اللى هقولهولها
" الو...ازيك يا مريم، كنت عاوزة اشوفك بكرة  نخرج فى اى كافيه ايه رايك......تمام هستناكى هناك"

بصيت للسما واتمنيت ان ربنا يكتبلى الخير فى خطوتى الجايه.
#يتبع
رأيكم يهمنى جداً 🫶🏻💜