جات ماما من عند الجارة لقاتنا انا و سلسبيل في الكوزينة قاعدين . عاودت حكاتلها سلسبيل حتى ماما فرحت بالعرس قاتلي عدنا ياسر مرحناش لعرس . قتلها ايه يخي تديني معاك قاتلي لاه كاش نهار رحت وخليتك ورايا علابالي تقلقي من قعدة الدار وتفاجي على قلبك غير بالعراس . قتلها صح والله نقلق ، ماما زيدي عاودي بابا قوليلو يشريلي تلفون على الأقل ندير لنترنات نعقب بيه الوقت والله يضيق خاطري من القعدة . قاتلي غير لبارح في ليل قتلوا قالي لالا تزوز ودير تلفون عند راجلها دورك ما عندها ما دير بيه . تنهدت بالفذة قاتلي بصح مدلي دراهم قالي اهبطي معاها تتكسا وتشري وش تحب . تبسمت صح بابا حزار وكلش بصح مش باخل علينا بحتى حاجة . فاتت هديك السمانة طيارة بنفس الروتين ، نهار قبل العرس خرجت مع ماما كريت قفطان سامبل تاع بنات قد عمري وكريت صواري نبدل فيها . وشريت لي زاكسيسوار وصندالة وبوشات المهم قلشت روحي روحت. لغدوة الصباح بكري دوشت وبقيت نوجد في روحي شعري جبدتوا برك وطلقتوا هو ديجا ارطب متعبنيش ودرت مكياج سامبل غير غيسيل وغوجلافر ، منعرفش ندير بزاف مكياج . ولبست القفطان وبقيت نشوف مع روحي جيت نهبل الحمد الله يا ربي عطاني الزين اللهم زين خلقي كما زينت خلقي كل ما نشوف روحي في المراية نقولها باه ربي يباركلي في زيني ومنتغرش بروحي . دخلت عندي ماما قاتلي الله يبارك على بنتي بوبيه . حشمت منها ضحكت عليا ، قاتلي اقعدي احشمي هكاك كي تزوزي منعرف كيفاه راح ديري مع راجلك . ضحكت قتلها منا هاداك لوقت تروح الحشمة . رحنا انا وماما للعرس غير دخلنا للصال قابلتنا مولات العرس لي هيا حبيبة ماما سلمنا عليها ودخلنا قعدنا في الطابلة لقينا شوي من جيرانّا بقينا معاهم مقصرين حتى جاو ناسهم جابوا الحنة كلشي بالطبع ، انا عجبوني خلاه سيرتوا طبق تاع الحنة انا نموت على الحوايج تاع العادات بقيت غير نتفرج فيهم ، باينين بلي عند رواحهم ضاربين الحطة و غير التليفونات المركة . بعد ما حناولها وكلشي قاتلي ماما روحي بدلي البسي صواري تاعك . دخلت بدلت عدلت الغوجلافر وخرجت لقيت وحدة من موالين لعريس قاعدة مع ماما تحكي وتضحك كي وصلت عندهم قالتلها ماما هاهي بنتي لي كنتي تسقسي علاها . تبسمت معاها وسلمت وقعدت قاتلي وش اسمك يا الفحلة قتلها اسمي رونق . قاتلي اسم على مسمى الله يبارك ، انا هيا خالة لعريس . تبسمت وسكتت معرفتش وش نرجع انا في المواقف هادوا نحشم وتتلفلي الهدرة ندخل بعضايا خلاه . بقات تشوف معايا من بعد قالت لماما لكان فيها خير راني نجي نزورك واني نعيطلك قبل . قالتلها ماما مرحبا تزورني البراكة الدار دارك تجي وقت ما تحبي .هيا راحت وماما دارتلي قاتلي شفتي راكي عجبتيها وقاتلي نجي نخطب . قتلها لي فيها خير ربي يكتبها . قاتلي امين بصح ان شاء الله فيها خير مشفتيهمش كيفاه كلاس ورزان باين من جماعة الله الله . قتلها المهم التربية ماما .
